Randall L. Ridd

Me vaka ni luvena e dua na dautaravale, a vulica taumada o Randall L. Ridd na bibi ni kena caka ena sala dodonu e dua na cakacaka. Ena vica vata na gauna, ni vakaotia na gonetagane o Randall e dua na cakacaka, qai rogoca ni tukuna mai na tamana, o Leon Ridd, “Se bera ni oti.”

Na mataqali cakacaka vakamatai lalai vakaoqori e vakamawe tu vua na tagane sa veiqaravi tiko vaka ikarua ni daunivakasala ena mataveiliutaki raraba ni Cauravou ena gauna oqo. Me yacova mai nikua se dau rogoca tikoga ena so na gauna na nona vosa kaukauwa ni loloma na tamana ni qarava tiko nona itavi vakacakacaka, matavuvale, kei na lotu: “Se bera ni oti; cakava vakadodonu.”

E kaya o Baraca Ridd na ivakavuvuli ni cakacaka ena nona matavuvale sa ka ni veivakalougatataki tu ena nona bula. Vakakina vei ira nona dauvakasala kei na iliuliu vakamatabete era dau biligi koya vakamalua ena so na gauna ena sala vakosipeli. Ena gauna era ciqoma kina e vuqa nona kalasivata mai koronivuli levu na veikacivi ni kaulotu ena yabaki 19, a digitaka o Randall me laki vakacuru yaca ena koliji ka curu ena mataivalu. A qai taura e muri e dua na cakacaka vakadaunimisini ni ilovi yago ni tomana tiko nona vuli ena University of Utah. E vica wale na turaga yalomatua era a doudou me ra tukuna vua ni dodonu me tiko ena buturara ni kaulotu. A muria nodra ivakasala ka biuta nona ivolakerekere me laki veiqaravi. Sega ni dede sa wasea voli na kosipeli ena Tabana ni Kaulotu na Mexico North. “Au sega ni rawa ni vakasamataka se na vakacava tu beka noqu bula kevaka au a sega ni kaulotu,” e kaya o koya.

A lesu mai ki vale, tomana nona vuli, ka vakamautaki Tamina Roark ena Valetabu e Salt Lake ena 1975. Erau a susuga cake na Ridd e va na gone ni vakatorocaketaka tiko o Baraca Ridd nona cakacaka ni volitaki iyauqaqa kei na bisinisi tale eso.

E tu ga nona taleitaka na cakacaka ni kaulotu. A vakatulewataka tu na tabana ni Kaulotu na Ecuador Guayaquil North mai na 2005 ki na 2008 ka vakadinadinataka tale kina na veisau e rawa ni kauta mai na kaulotu tudei ena nona bula e dua na cauravou se goneyalewa.

A veiqaravi tiko o Baraca Ridd vakalewe ni matabose raraba ni Cauravou ena nona kacivi ki na mataveiliutaki raraba ni Cauravou ena Me ni 2013.