2013
Maqusataki na iTuvatuva Qaqa ni Turaga!
Noveba 2013


Maqusataki na iTuvatuva Qaqa ni Turaga!

iVakatakilakila

Sa dodonu vei keda yadua meda sa tauyavutaka ka vakayacora ena gugumatua na noda dui ituvatuva qaqa ena yalomarau meda veiqaravi gumatua vata kei ira na daukaulotu tudei.

Ena vica na yabaki sa oti au a gadreva me keirau veivosaki kei na marama watina e dua vei ira na bisopi ena neimami iteki, kau sa mani qiri sara i nodratou vale. A sauma sara mai na talevoni e dua na luvena gonetagane. Au a kaya sara, “Ni bula. E tiko beka qori o tinamu”

A sauma mai: “Io, e tiko oqo. Au na kacivi koya mai. O cei beka qo?”

Au a sauma: “Tukuna vua ni o Peresitedi Nielsen.”

A vagagalu mada vakalailai, ka oti, a voqa na domona mamarau, kau rogoca sara, “Io, Na, e via vosa vei iko o Peresitedi Hinckley!”

Au sega ni raitayaloyalotaka rawa na veika e veinanuyaka o tinana. A rairai dua beka na ilakolako balavu duadua vua ki na talevoni. Au sa vakasamataka sara: “Meu cakava beka vakacava?” Au a sega ni cakava, ka keirau mai veidredrevaki vinaka yani. Ia oqo niu sa mai vakasamataka tiko, a rairai rarawataka beka ni a o au me keirau veivosaki vata.

Na cava beka o na cakava ke qiriti iko dina mai na parofita ni Turaga? Io, sa yaco dina! Sa mai kacivi keda tale vakayadua ena mataka oqo o Peresitedi Thomas S. Monson ki na dua na cakacaka bibi sara. E kaya o koya, “Oqo na gauna mera lako vata mai kina na lewenilotu kei na daukaulotu, mera cakacaka vata, mera veiqaravi ena loga ni vaini ni Turaga ka kauta mai na yalo kivei Koya” (“Vakabauta ena Cakacaka ni Veivakabulai,” [veituberi kaburaki ni veiliutaki e vuravura raraba, June, 2013]; lds.org/broadcasts).

Eda sa vakarorogo tiko beka?

E vuravura taucoko, era sa vakila na iteki, tikina, kei na tabana ni kaulotu e dua na kaukauwa vou, me vaka ni sa mai yaco na ka a kaya na iVakabula vei Josefa Simici ena 1832: “Io au na kitaka kusarawa na noqu cakacaka e na kena gauna” (V&V 88:73).

Kemuni na taciqu kei na ganequ, na gauna o ya sai koya sara ga na gauna oqo! Au sa vakila, kau kila ni ko ni sa vakila tale tikoga.

Au sa vinakata meu sa cakacakataka yani na yaloqu mamarau kei na noqu vakabauti Jisu Karisito. Niu dauqito vutupolo, au sa vakasamataka sara na ituvatuva qaqa vakaqito. E sega tale ni vakataratututaki na sotavi ni qito kevaka me sa vakavakarau tu na neitou timi ena iqitoqito e tuvai donu, ni keitou na qaqa dina kina. Ia, keirau a veivosaki ena dua na gauna sa oti kei dauniveivakatavulici rogolevu ni BYU o LaVell Edwards me baleta na neimami ituvatuva qaqa, ka kaya mai, “Au sega ni via kila na iwalewale cava ni qito mo dou cakava ia me tou tabaka ga na polo!” Me vaka niu dua vei ira na nona kotabeki, au nanuma ni na vereverea cake mai na kena o ya, ia ni mai nanuma tu ga vaka o ya sai koya beka na vuna e vakayacani kina vua e dua na vale ni sarasara.

Me vaka ga ni da sa lewena kece na timi ni Turaga, eda sa yadua tiko beka na ituvatuva qaqa? Eda sa tu vakarau beka meda qito? Kevaka, oi keda na lewenilotu, eda sa lomani ira dina na noda matavuvale, itokani, kei ira eda veikilai, eda na sega beka ni vinakata meda wasea yani na noda ivakadinadina baleta na kosipeli vakalesuimai kivei ira?

Ena semina baleti ira na peresitedi vou ni tabana ni kaulotu ena June, era a ciqoma rawa kina e dua na iwiliwili levu duadua ni 173 na peresitedi vou kei na dui watidra na iotioti ni nodra ivakasala ni bera ni ra laki tekivu veiqaravi yani. Era a vosa taucoko kina na lewe 15 ni Mataveiliutaki Taumada kei na Kuoramu ni iApositolo Le Tinikarua kivei ira na ilawalawa digitaki oqo.

A kuria o Elder L. Tom Perry ena itinitini ni vosa: “Oqo e dua na gauna cecere duadua ena itukutuku ni Lotu. Oqo e dua na ka sa mai vakatauvatani vata kei na veigauna cecere sa mai yaco ena itukutuku makawa sa sivi yani, me vakataka na iMatai ni Raivotu, me vakataka na isolisoli ni iVola i Momani, me vakataka na Vakalesuimai ni kosipeli, me vaka ga na veika taucoko sara sa mai tarai cake kina na yavu o ya meda sa lako yani ka veivakavulici ena matanitu nei Tamada mai Lomalagi” (“iOtioti ni Vosa” [na vosa ena semina baleti ira na peresitedi vou ni kaulotu, 26 ni June, 2013] 1, Church History Library, Salt Lake City).

Sa gadrevi sara meda vakaitavitaki keda me vaka e se bera mada vakadua ni da cakava me veiraurau kei na nodra yalo marautaka tiko na noda iliuliu kei na nodra yalo dina tiko na noda daukaulotu tudei. Na cakacaka oqo ena sega ni toso ki liu ena sala sa nakita na Turaga ke sega kina oi keda! Me vaka sa vakaraitaka tiko o Peresitedi Henry B. Eyring, “Se cava ga na noda yabaki, na veika eda rawa ni cakava, ilesilesi vaka-Lotu, se na vanua eda tiko kina, eda sa duabau ki na veikacivi ki na cakacaka me da vukei Koya ena Nona tatamusuki vakayalo” (“Eda sa Duabau,” Liaona, Me 2013, 62).

Meu wasea mada vei kemuni e dua na ituvatuva qaqa au a vakauqeti meu cakava ni oti noqu masumasu, kau wilika na wase 13 ni Vunautaka Noqu Kosipeli, ka vakananuma vakatitobu na veika eso sa yaco oti vei au? Au sureti kemuni mo ni raica na tolu na tikina bibi oqo ni ko ni vakasamataka na nomuni dui ituvatuva.

Matai, masulaka vakaidina e dua mo kauti koya vakavoleka mai vua na iVakabula kei na Nona kosipeli ena veisiga. Sa rawa mo cakava oqo ena nomu raici ira na tamata kecega vaka luvena tagane kei na luvena yalewa na Kalou ena nodra veivukei tiko vakai ira ena nodra ilakolako ki vale. Vakasamataki ira na itokani vou ko na kunea.

Karua, mo masulaki rau na daukaulotu rau veiqaravi tiko ena nomu yasayasa kei na yacadra na dauvakatataro ena veisiga. Na sala duadua ga me vakayacori kina oqo o ya mo kidavaki rau, raica na beji ni yacadrau, cavuta na yacadrau, ka taroga o cei e rau vakavulica tiko. A cauraka ena yalomatua o Elder Russell M. Nelson, “Me yacova ni ko kila na yacana kei na matana, ena sega ni vukei iko na Turaga mo kila na yalona.”

Au a tiko ena nona a papitaisotaki e dua na sisita vinaka, ka wasea na nona ivakadinadina. Au na dau nanuma tikoga na ka a kaya, “Se bera vakadua me lewelevu vakaoqo era masulaki au kau vakila na levu ni loloma vakaoqo. Au kila ni dina na cakacaka oqo!”

Katolu, sureta e dua na itokani ki na dua na itaviqaravi ena loma ni nomu itikotiko se dua tale na vanua. Na vanua cava ga o lako kina se cava ga o vakayacora, vakasamataka vakatitobu o cei mena taleitaka na soqo o ya ka vakarorogo sara ki na domo ni Yalotabu ena Nona dusimaki iko.

A vakavulici au na iVakabula ena dua na lesoni bibi sara niu vulica tiko na kosipeli kau vakabauta, e salavata vakavinaka sara ki “na maqusataki.” Na gauna e dau vakauqeti kina na yaloqu me baleta e dua na ka, e dau laki vakaraitaki ena veika au vola ka tini ena ivakatakilakila ni kurabui ka tukuna tiko ni o ya e dua na “yalo veivakauqeti kaukauwa [se dua na] ivakatakilakila ni dua na ka cecere” (Merriam-Webster’s Collegiate Dictionary, 11th ed. [2003], “ivakatakilakila ni kurabui”).

E tarai na yaloqu ena ivolanikalou me baleta “na vakasokomuni,” ka tini toka ena ivakatakilakila ni pagitueti ena kena sa lasika cake mai, me vaka a vakamamasu kina o Alama: “Raica meu agilosi mada ga meu tabalaka na domoqu me vaka na davui ni Kalou, sa yavalati vuravura, meu vunauci ira kina na tamata kecega me ra veivutuni!” (Alama 29:1).

E dikevi rawa ni 65 taucoko na tikina a vakaraitaki kina na mataqali veivakauqeti kaukauwa ni kaulotu, oka kina oqo:

“Raica sa levu vakaidina na nona marautaki ira era sa veivutuni! …

“Ia kevaka drau sa vunau tiko e na nomudrau bula taucoko ka sa saumaki mai kina e dua na tamata, sa na vuabale sara na nomudrau marau e na matanitu i Tamaqu!

“Ia kevaka sa vuabale na nomudrau marau ni drau sa vakabula mai e dua ki na matanitu i Tamaqu, sa na uasivi sara na nomudrau marau kevaka drau sa vakabula rawa e lewe vuqa!” (V&V 18:13, 15–16).

Au sa mai vakayadrati tiko ki na veitikina cecere oqo sa mai vakayaco-ka sara ki na isevu ni noqu ilesilesi ni dua na lewe ni Vitusagavulu ni iWasewase. Au a via taqaya vakalailai niu a laki itokani toka kei na dua na iApositolo, o Elder Quentin L. Cook, ena dua na koniferedi ni iteki. Niu sa lako yani ki na valenivolavola nei peresitedi ni iteki ena isevu ni bose ena mua ni macawa o ya, au raica rawa sara e dua na veisa ivava varasa kabasu e toka ena vatavata ena daku ni nona teveli, ka kabi toka kina e dua na tiki ni ivolanikalou e tini toka ena dua na ivakatakilakila ni kurabui. Niu wilika, au vakila ni wanonovi au tiko niu dau vuli na Turaga ka sa sauma mai na noqu masu, ka sa kila vakavinaka tu o Koya na veika e gadrevi me vakacegui kina na noqu lomatarotaro.

Au a kerei peresitedi ni iteki sara me talanoataka mada vei au na ivava.

A kaya:

“Oqo na ivava ni dua na cauravou curuvou ki na Lotu e dravudravua sara na nona matavuvale, ia e gu ga o koya me laki kaulotu vakavinaka sara ka laki yaco dina oqo mai Guatemala. Ni sa lesu mai o koya ena kaulotu keirau sa mai sota sara meu sa mai dolea ena vakavinavinaka na nona vakacegui kau raica sara ni sa ca tu na nona ivava. A laki solia o cauravou oqo na nona ka taucoko vua na Turaga ena nona dravudravua, ke dua beka na ka, na veitokoni wale sara ga ni matavuvale.

“A siqema sara o cauravou niu vakaraica tiko na nona ivava ka tarogi au sara, ‘Dua beka na ka e leqa Peresitedi?’

“Au a sauma, ‘Sega Elder, totoka na veika kece! E rawa beka ni noqu na ivava oqori?’”

A tomana tale o peresitedi ni iteki: “Sa dua na ka na noqu doka ka lomani koya vakalevu na daukaulotu sa lesu mai na kaulotu oqo! Au sa gadreva dina me dua na ivakananumi ni gauna o ya, kau boroya varasa kina na nona ivava. Ena dauvakavotuya tiko vei au niu curu ki na valenivolavola oqo me baleta na itavi taucoko meda na vakayacora se cava ga na keda ituvaki. Na tikina e kune ena Aisea: ‘Na kena lagilagi e na ulunivanua na yava i koya sa kauta mai na irogorogo vinaka, sa vakarogoya mai na sautu, sa kauta mai na irogorogo vinaka ni ka vinaka, ka vakarogoya mai na veivakabulai, ka sa tukuna mai ki Saioni, Sa lewa na nomu Kalou!’ (Aisea 52:7).”

Kemuni na taciqu kei na ganequ, a rairai vakasamataka beka o wati bisopi vinaka na vuna a qiriti koya mai kina na parofita. Au vakadinadinataka ni o koya vata kei keda e dodonu meda sa kakua ni vakasamataka tale tiko na—IVAKATAKILAKILA NI KURABUI!

Au kila ni sa dodonu vei keda yadua meda sa tauyavutaka ka vakayacora ena gugumatua na noda dui ituvatuva qaqa ena yalomarau meda veiqaravi gumatua vata kei ira na daukaulotu tudei—IVAKATAKILAKILA NI KURABUI!

Au sa mai kuria kina na noqu ivakadinadina ki na nona ivakadinadina na Parofita Josefa Simici: “Ia me ikuri ni ivakadinadina kece ka sa mai tukuni me baleti Koya, keirau sa tukuna oqo na kena iotioti me yacova edaidai: Raica sa bula dina tiko ko Koya!” (V&V 76:22). Ena yaca tabu i Jisu Karisito, emeni.