Matavuvale kei na iTokani Tawamudu

Se evei ga na vanua o bula kina, era na tiko na nomu itokani ka ra vaqara tiko na marau levu o sa sotava tiko ni ko sa bulataka tiko na kosipeli vakalesui mai i Jisu Karisito. Era na sega beka ni vakamacalataka rawa vakavosa na marau o ya, ia e rawa ni ra na kila ni ra sa raica ena nomu bula. Era na sasagataka saraga mera kila na ivurevure ni marau oqori, vakabibi ni ko sotava tale tikoga na dredre era sotava tiko.

Ko sa vakila na marau ena nomu talairawarawa tiko ena ivakaro ni Kalou. Oqori na vua ni bulataka na kosipeli ka a yalataki mai (raica na Mosaia 2:41). E sega ni talairawarawa tiko kina ivakaro ni Turaga mo laurai mai kina vei ira na tamata, ia o ira era sa raica tiko na nomu bulamarau era sa vakarautaki tiko mai vua na Turaga mera rogoca na itukutuku vinaka ni Vakalesuimai ni kosipeli.

Na veivakalougatataki sa soli vei iko sa vakavurea na madigi vivinaka me na yaco ena nomu bula. Ni ko tisaipeli ni veiyalayalati nei Jisu Karisito, ko sa vakavuna mo na dolava vei ira e so tale na madigi ni kunei vakalevu ni marau, vakabibi vei ira na nomu itokani kei ira na lewe ni nomu matavuvale.

E a raica na Turaga na nomu madigi ka vakaroti iko mai vakaoqo: “Sa nodra itavi na tamata yadua era sa rogoca na ivunau mera vunauci ira na wekadra” (V&V88:81).

E vakarawarawataka na kena muri na ivakaro oya na Turaga ena veisau e yaco e lomamu ena nomu sa vakadonuya ka bulataka na kosipeli i Jisu Karisito. Sa kena isoqoni na nomu lomani ira na tani sa tosocake, kei na nomu gadreva me ra sotava talega na marau vata ga ko a sa sotava tiko mai.

Dua na kena ivakaraitaki na nomu sa veisau mo sa ciqoma mo vakaitavi ena cakacaka ni kaulotu ni Turaga. Era sa na kila ga na daukaulotu tudei ni rawa ni ra ciqoma e dua na yacasoli mai vei ira na curuvou ka ra yalodina ena veisau. Sa gadreva vakalevu sara na curuvou me wasea kei nona itokani kei ira na nona matavuvale na nona marau.

Sa dua na ka ni veivakacaucautaki dina vei iko, ni ra dau kerea na iliuliu ni kaulotu ena nomu tabanalevu se o ira na daukaulotu tudei na yacadra eso mera laki vakavulica. Era kila ni o ira na itokani era sa raica na nomu mamarau, ka ra sa nanuma, ni o ira na itokani oqori era sa vakarautaki tiko mera digitaka me ra rogoca ka ciqoma na kosipeli. Sa ra yalodei ni ko ni sa na nodra itokani ena gauna era sa na curu mai kina ki na matanitu.

Kakua ni leqataka ni ra na yali yani eso na nomu itokani ena nomu sureti ira na daukaulotu mera laki sota kei ira. Era tu na noqu itokani ka ra sega ni ciqomi ira na daukaulotu, ia era dau vakavinavinakataka vei au na vica na yabaki ni noqu dau wasea tu vei ira e dua na ka era kila me iyau vakamareqeti sara vei au. E rawa ni ko vakaitokani tawamudu ena nomu wasea na kosipeli, ena nodra a raica ni kauta mai vei iko na marau. Kakua ni calata na madigi mo sureta e dua na itokani vakabibi na lewe ni matavuvale me digitaka me muria na yavu ni bula marau.

Ena sega tale ni dua na madigi levu ni kena soli na veisureti mai na valetabu ni Lotu. Ena rawa ni solia mai kina na Turaga na cakacakatabu vakalotu ni veivakabulai vei ira na tubuda vakavica ka a sega ni rawa mera ciqoma ena bula oqo. Era sa raici iko sobu mai ena loloma kei na vakanuinui. Sa yalataka oti tu na Turaga ni ra na sotava na madigi ni curu kina Nona matanitu (raica na V&V 137:7–8), ka sa teivaka tu o Koya na loloma baleti ira e yalomu.

E lewe levu vei kemuni sa vakila na yalomarau ena kena soli na cakacakatabu vakalotu ena valetabu vei ira e so, me vaka ga na nomuni solia e so na yaca ni tamata vei ira na daukaulotu mera laki sota. Ko sa vakila oti na marau levu ena nomu a cakava na nodra cakacakatabu vakalotu na tukamu vakavica. E a vakatakilai vua na Parofita Josefa Simici ni na vakatau na noda laki marau tawamudu ena noda solia na veivakalougatataki oqo vei ira na tukada vakavica ena qaravi ni nodra cakacakatabu vakalotu ena valetabu (raica na V&V 128:18).

Dau vagolea na yaloda vua na iVakabula na gauna ni Siganisucu, vakakina na marau e kauta mai vei keda na Nona kosipeli Eda vakaraitaka Vua na noda vakavinavinaka ena noda solia na marau oqo vei ira na tani. Na vakavinavinaka ena vuki me yalomarau ni da solia na yaca vei ira na daukaulotu, vakakina ena noda sa kauta na yacadra na tukada vakavica ki na valetabu. Na ivakadinadina ni noda vakavinavinaka ena rawa ni tauyavutaka na vakaitokani kei na matavuvale era tawamudu.