iVaqa ni Veisiko, Tiseba 2013

Na iLesilesi Vakalou i Jisu Karisito: Na Luvena E Duabau Ga

Masulaka na vulici ni itukutuku oqo ka segata mo kila na ka mo na wasea. Ena kuria vakacava na nomu vakabauta na iVakabula na nomu sa kila na nona bula kei na nona ilesilesi ni ko sa vakaraici ira tiko o ira ko na veisiko tiko vei ira? Me ikuri ni tukutuku, lako ki na reliefsociety.lds.org.

iVakatakilakila

iVakatakilakila ni iSoqosoqo ni Veivukei

Vakabauta, Matavuvale, Veivukei

Na Noda iVakabula o Jiasu Karisito, e vakatokai me Luvena e Le Duabau Ga, baleta ni o Koya duadua ga na tamata e bula tiko e vuravura e sucu mai vua e dua na tina e vakayago kei na dua na Tama e tawa mate rawa. A rawata na kaukauwa vakalou mai vei Tamana, na Kalou. E rawata mai vei Tinana o Koya na bula vakayago ka rawa kina me vakila na viakana, viagunu, na oca, na mosi, kei na mate.¹

Me vaka ni o Jisu Karisito e Luvena Le Duabau Ga na Tamada, sa tiko vua na kaukauwa me solia na Nona bula ka taura cake talega. E vakatavulica na ivolanikalou ni “ena veisorovaki i Karisito,” eda “na rawata kina na tucaketale” (Jekope 4:11). Eda vulica talega ni o keda kece “eda na vakaturi meda kakua ni mate rawa tale kei na bula tawamudu” kevaka meda “sa vakabauta” (V&V 29:43).

Ni da sa na mai kila taucoko na ibalebale ni nona mai Luvena E Le Duabau Ga na Tamada, o Jisu, sa na tarai cake kina na noda vakabauti Karisito. Elder D. Todd Christofferson ena Kuoramu ni iApositolo Le Tinikarua e kaya, “Na vakabauti Jisu Karisito sa ikoya na vakadinadinataki kei na vakadeitaki ni (1) Nona itutu vaka Luvena e Duabau ga na Kalou, (2) Na Nona Veisorovaki tawayalani, kei na (3) Nona Tucaketale.”² Era sa vakadinadinataka na Parofita nikua ni o: “[Jisu Karisito] na … Luvena e Duabau ga ka sa mai sucu vakatamata, na Dauveivueti kei vuravura.”³

Mai na iVolanikalou

Joni 3:16; Vunau kei na Veiyalayalati 20:21–24; Mosese 5:6–9

Mai na Keda iTukutuku Makawa

Eda wilika ena Veiyalayalati Vou na kedra italanoa na yalewa vakayacani kei ira e sega na yacadra, ka ra vakabauti Jisu Karisito, era vulica ka bulataka na Nona ivakavuvuli, vakadinadinataka na Nona cakacaka, cakamana, kei na itutu vakatui. O ira na yalewa oqori era a ivakaraitaki ni tisaipeli ka ivakadinadina bula ni cakacaka ni veivakabulai.

Kena ivakaraitaki ni o Maca e a vakaraitaka na nona ivakadinadina ni iVakabula e vakalou, ni ena nona a kaya Vua, “Au sa vakadinata ni sa Karisito koi kemuni na Luve ni Kalou, ko koya sa dodonu me lako mai ki vuravura” (Joni 11:27).

E so tale na ivakadinadina ni vakalou na iVakabula o Meri na tinana kei Elisapeci na tacina. Ni sikovi Meri oti ga na agilosi o Keverieli, e a lako sara me laki sikovi Elisapeci. Na gauna ga e rogoca kina o Elisapeci na vakabula nei Meri, e a “vakasinaiti ena Yalo Tabu ” (Luke 1:41) ka vakadinadinataka ni o Meri ena vakasucuma na Luve ni Kalou.

© 2013 by Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/13. Vakadonui me vakadewa: 6/13. Vakadewa ni Visiting Teaching Message, December 2013. Fijian.10672 858

Na Cava e Rawa Niu Cakava?

Na cava e bibi kina vei au meu kila vinaka na ilesilesi nei Jisu Karisito?
Ena vakalevutaka vakacava na noda vakabauta na noda maroroya na noda veiyalayalati?