Adan

Kadaghanan sa mga tawo nakaila nako isip unang tawo nga nagpuyo sa kalibutan, apan daghan ang wala masayud nga ako adunay espesyal nga responsibilidad sa wala pa ko moanhi sa kalibutan. Sa kinabuhi sa wala pa dinhi sa yuta, nangulo ko sa kasundalohan sa Dios batok sa kasundalohan ni Satanas sa Gubat sa Langit,² ug mitabang ko ni Jesukristo sa paglalang sa kalibutan.³ Naila ko nga si Miguel kaniadto, nagpasabut nga “kinsa sama sa Dios.”⁴

Ang Dios mipili nako nga mahimong unang tawo sa kalibutan ug gibutang ko sa Tanaman sa Eden, usa ka paraiso nga adunay daghang mga matang sa tanom ug hayop. Iya kong gihuypan sa “gininhawa sa kinabuhi”⁵ ug gihatagan ko og bag-ong ngalan: Adan.⁶

Ang Dios misulti sa akong asawa, si Eva, ug nako nga dili mokaon sa bunga sa kahoy sa kahibalo sa maayo ug dautan.⁷ Kon dili namo kaunon ang bunga, kami magpabilin sa tanaman ug magpuyo sa kahangturan, apan dili mi “mouswag pinaagi sa pagsinati og oposisyon sa kinabuhi”⁸ o makabaton og mga anak.⁹ Anaa kanamo ang pagpili.

Tungod kay mipili mi sa pagkaon sa bunga, kinahanglan namong mobiya sa tanaman ug sa presensya sa Dios. Kini nailhan nga Pagkapukan. Kami nahimong mortal, nakasinati sa maayo ug sa dautan sa kinabuhi, ug nanganak.¹⁰

Ang Dios nasayud nga ang Pagkapukan mahitabo—Iyang gipadala si Jesukristo aron sa pagtubos sa atong mga sala ug sa pagbuntog sa kamatayon aron kita ug ang atong mga anak makabalik ngadto Kaniya.¹¹

Ako ug si Eva nakakat-on sa ebanghelyo ni Jesukristo—lakip na ang hugot nga pagtuo diha kang Jesukristo, paghinulsol, bunyag, pagdawat sa gasa sa Espiritu Santo, ug paglahutay hangtud sa kahangturan—ug amo kining gitudlo sa among mga anak.¹²

Tungod sa akong mga kasinatian, nabuksan akong mga mata, ug hingpit ang akong kalipay niining kinabuhi.¹³ Hinumdumi nga mabati usab ninyo ang gugma sa Dios ug makabalik Kaniya kon kamo mosunod ni Jesukristo,¹⁴ sama sa akong nakat-unan nga buhaton.