Адам

Ихэнх хүмүүс намайг дэлхий дээр амьдрахаар ирсэн анхны хүн гэдгээр минь мэддэг ч дэлхий дээр ирэхээс өмнө надад онцгой үүрэг хариуцлага байсныг тэд мэддэггүй. Мөнх бус байдлын өмнөх оршихуйд тэнгэрт болсон дайнд би Сатаны их цэргийн эсрэг тулалдсан Бурханы их цэргийг удирдсан² бөгөөд дэлхийг бүтээхэд нь Есүс Христэд тусалсан билээ.³ Тэр үед намайг Михаил гэдэг байсан нь “Бурхантай адил хүн” гэсэн утгатай юм.⁴

Бурхан намайг дэлхийд ирэх анхны хүн байхаар сонгож, олон зүйлийн ургамал, амьтантай диваажин болох Эдэний цэцэрлэгт байрлуулсан билээ. Тэр надад “амин амьсгалыг”⁵ оруулж, Адам хэмээх шинэ нэрийг өгсөн юм.⁶

Бурхан миний эхнэр Ева бид хоёрт сайн ба муугийн мэдлэгийн модны жимснээс идэж болохгүй гэсэн юм.⁷ Бид тэр жимсийг идээгүй бол цэцэрлэгт үлдэж, тэндээ үүрд амьдрах байсан ч “мөнх бус байдлын эсрэг тэсрэг талыг мэдсэнээр өсч хөгжих”⁸ болон үр хүүхдүүдтэй байх боломжгүй байх байсан.⁹ Сонголт бидэнд өгөгдсөн байлаа.

Бид уг жимсийг идэхээр сонгосон учраас цэцэрлэг болон Бурханы оршихуйг орхих шаардлагатай болсон билээ. Үүнийг уналт гэдэг. Бид мөнх бус болж; амьдралын сайн, муу талыг аль алиныг нь мэддэг болж; дэлхийд хүүхдүүдийг авчирсан юм.¹⁰

Уналт болно гэдгийг Бурхан мэдэж байсан учраас бид бүгд үр хүүхдүүдийнхээ хамт Түүнд эргэн очих боломжтой байхын төлөө нүглүүдийг минь цагаатгаж, үхлийг ялахын тулд Есүс Христийг илгээсэн билээ.¹¹

Ева бид хоёр Есүс Христийн сайн мэдээний тухай, түүний дотор Есүс Христэд итгэх итгэл, наманчлал, баптисм, Ариун Сүнсний бэлэг хүлээн авах болон эцсээ хүртэл тэвчих тухай заалгасан бөгөөд үүнийгээ хүүхдүүддээ заасан юм.¹²

Эдгээр туршлагууд байсан учраас нүд минь нээгдэж, энэ амьдралд би баяр баясгалантай байсан билээ.¹³ Та нар ч бас Есүс Христийг дагавал миний сурч мэдсэний нэгэн адил¹⁴ Бурханы хайрыг мэдэрч, Түүнд эргэн очиж чадна гэдгийг санагтун.