2014
Ang Dalan sa Kadaugan
Enero 2014


Ang Dalan sa Kadaugan

Imahe
Rosemary M. Wixom

“Unsa ka mahinungdanon sa laraw sa atong Dios” (2 Nephi 9:13).

Atol sa tingpamulak, ang akong bana ug ako mitambong sa dula sa football sa among upat ka tuig nga apo. Diha ang kahinam samtang ang mga bata nagdagan-dagan nga naggukod sa bola. Sa dihang gipito na ang pagtapos sa dula, ang mga tigdula wala makahibalo kon kinsa ang nakadaug o kinsa ang napilde. Yanong nagdula ra sila.

Ang mga coach mihangyo sa mga magdudula sa pagpakiglamano sa pikas team. Dayon among nakita ang usa ka butang nga talagsaon. Gidapit sa ilang coach ang tanan nga moapil sa iyang gitawag nga dalan sa kadaugan.

Mga ginikanan, apohan, ug si bisan kinsa nga mitan-aw sa dula mibarug ug nagporma og duha ka linya nga nag-atubang sa usag usa. Dayon ilang gipataas ang ilang mga bukton ug mihimo og usa ka arko. Ang mga bata naninggit sa kalipay samtang sila nagdagan ilawom sa mga bukton sa naghugyaw nga mga hamtong ug subay sa dalan.

Sa wala madugay ang mga bata sa laing team mihukom nga moapil sa mga kalingawan. Tanang mga magdudula gihugyawan sa mga hamtong samtang sila nagdagan sa dalan sa kadaugan.

Sa akong hunahuna akong nakita ang lain nga hulagway. Aduna akoy pagbati nga ako nagtan-aw niini nga mga bata nga nagsunod sa plano nga gihimo sa Langitnong Amahan alang sa matag bata. Sila nagdagan sa tul-id ug pig-ot nga dalan, ilawom sa kamot sa mga tawo nga nahigugma kanila. Matag bata mibati og hingpit nga kalipay sa pagsubay sa dalan.

Si Jesukristo adunay “dalan nga may timaan” alang sa matag usa nato.1 Kon kita magsunod sa Iyang giya, kitang tanan makabalik sa atong langitnong panimalay ug luwas diha sa mga bukton sa Langitnong Amahan.

Mubo nga sulat

  1. “Unsa ka Dako sa Kaalam ug sa Gugma,” Mga Himno ug mga Awit sa mga Bata, nu. 19.

Gilitratohan sa Busath Photography; paghulagway pinaagi ni Katie McDee