Gikan sa Kangitngit ngadto sa Kahayag

Pangalan gipugngan

Kita masayud uban sa kasiguradoan nga kon ang atong kinabuhi maanaa sa kangitngit si Jesukristo makausab nianang kangitngit ngadto sa kahayag kon kita matinud-anong maghinulsol.

Adunay mga higayon sa akong kinabuhi diin mobati ko nga daw wala nay paglaum alang nako nga magmalipayon ug makabalik ngadto sa atong Amahan sa Langit. Pipila ka tuig na ang milabay na-disfellowship ko sa Simbahan. Nagpakabuhi ko nga puno sa garbo ug sala ug nag-antus og maayo tungod sa akong mga binuhatan. Ang akong engagement sa babaye nga akong gihigugma wala madayon, dili na maayo ang akong relasyon sa uban, ug dili ko malipayon.

Bisan tuod nangandoy ko nga magmapainubsanon sa kaniadto pa, napugos ko sa pagpaubos ug sa pagtinguha sa kabubut-on sa Ginoo. Nagsugod ko nga kanunay nang mobasa sa kasulatan, kanunay nang mag-ampo, ug magtinguha sa pagserbisyo sa uban. Naningkamot kong ayuhon ang relasyon nga dugay na nakong gibaliwala, lakip na ang akong relasyon uban sa Langitnong Amahan. Nagtinguha gyud ko og kausaban sa kasingkasing.

Sayo kadto sa buntag samtang nagdrayb ko padulong sa eskwelahan, ug wala pa mosidlak ang adlaw. Misanag ang kapunaw-punawan sa silangan, ug sa kasadpan ngitngit pa, nga ang takdol nga bulan mikunsad luyo niini. Naanad ko sa pagpakig-istorya sa akong Langitnong Amahan samtang nagdrayb. Samtang nag-ampo ko atol niining pagdrayb sa sakyanan, nalamdagan akong hunahuna, ug nakaangkon og bag-ong paglaum diha sa akong kasingkasing.

Nakaamgo ko nga ang akong kinabuhi naglambo sa hinay-hinay, sama sa kapunaw-punawan sa silangan. Ang kangitngit nagkawala, ug ang akong mga sala, nga ingon og sama nianang takdol nga bulan, nagkakunsad. Wala pa kini mawala, apan nasayud ko nga sa dili madugay mawala kini kon magpadayon ko sa akong sinsero nga paghinulsol. Naglaum ko nga moabut ang adlaw ang akong kinabuhi sama kahayag sa udtong tutok.

Uban sa panahon ug samtang nag-ampo ko sa gugma sa akong Langitnong Amahan ug sa uban, nahimo kong mas mapainubsanon. Dugang pagkamapainubsanon migiya nako sa pagserbisyo sa Dios ug sa uban nga wala maghunahuna sa kaugalingon, ug ang akong paglaum sa kinabuhing dayon ug sa mas nindot nga umaabut nabag-o ug nadugangan. Samtang kana nga paglaum nagtubo, mao sab ang akong hugot nga pagtuo nga ang akong Manluluwas, si Jesukristo, mao ang gamhanan sa pagluwas ug molimpyo nako sa tanang dili matarung. Nasayud ko nga ang mga pulong ni Mormon tinuod: “Kamo magbaton og paglaum pinaagi sa pag-ula ni Kristo ug sa gahum sa iyang pagkabanhaw, aron mabanhaw ngadto sa kinabuhi nga dayon” (Moroni 7:41).

Kalipay pinaagi sa Paghinulsol

Imahe

Elder Neil L. Andersen

“Kita nakasabut ba sa [kadasig] sa atong Langitnong Amahan sa atong matag paningkamot nga makabalik kaniya? Bisan kon kita layo pa kaayo, moabi-abi siya sa atong pagbalik. Kita makasinati og hingpit nga kalipay samtang ang gugma sa atong Manluluwas nagsiguro kanato nga kita malimpyohan, nga kita makabalik pag-usab sa panimalay. Kini nga kalipay moabut lang pinaagi sa paghinulsol.

“Samtang kita mobiya sa sayop nga mga binuhatan ug mogamit og hugot nga pagtuo diha kang Jesukristo, kita makadawat sa kapasayloan sa atong mga sala. Atong mabati nga gibuhat sa atong Manluluwas alang nato ang mga butang nga dili nato mabuhat.”

Elder Neil L. Andersen sa Korum sa Napulog Duha ka mga Apostoles, “The Joy of Becoming Clean,” Ensign, Abr. 1995, 51.

Unsa ang mga Kondisyon sa Paghinulsol?

Si propeta Helaman mitudlo nga ang paghinulsol adunay mga kondisyon:

“Ang Ginoo sa pagkatinuod moabut aron sa pagtubos sa iyang mga katawhan, apan … siya dili moabut aron sa pagtubos kanila sa ilang mga sala, apan aron sa pagtubos kanila gikan sa ilang mga sala.

“Ug siya adunay gahum nga gihatag ngadto kaniya gikan sa Amahan aron sa pagtubos kanila gikan sa ilang mga sala tungod sa paghinulsol; busa siya mipadala sa iyang mga anghel sa pagpahayag sa maayo nga mga balita sa mga kinahanglanon sa paghinulsol, nga nagdala ngadto sa gahum sa Manunubos, ngadto sa kaluwasan sa ilang mga kalag” (Helaman 5:10–11; emphasis gidugang).

Ikonsiderar sa pagtuon sa mosunod nga mga kasulatan aron mas masabtan ang pipila niadtong mga kondisyon: Mga Taga-Roma 3:23; 1 Nephi 10:21; 2 Nephi 2:8; Mosiah 4:9–10; Doktrina ug mga Pakigsaad 58:42–43.