Adto ug Ayoha ang Iyang Stereo

Ang tapad sa among balay usa ka ministro sa mga kabatan-onan sa usa ka lokal nga simbahan, ug ang mga batan-on sa iyang simbahan kanunay mobisita niya. Komon lang nga daghang sakyanan ang mo-parking sa atubangan sa iyang balay matag adlaw ug gabii.

Pipila niining mga batan-on mopatukar og kusog nga musika diha sa mga stereo sa ilang sakyanan. Amo na silang madungog pipila ka block pa ang gilay-on, kon magkaduol na sila, ang mga bintana sa among panimalay mouyog. Kasagaran ang kusog nga musika makapabangon nako inigka gabii. Migrabe ang akong kalagot ug misugod ko sa paglantaw niining mga batan-on nga daw mga kaaway.

Usa ka adlaw samtang nag-rake ko sa mga dahon, nakadungog ko sa stereo sa sakyanan nga nagtingog pipila ka block ang kalay-on. Ang tingog nagkaduol ug nagkalanog. Sa dihang ang drayber miliko sa eskina ug mipaingon sa balay sa akong silingan, nasuko ko ug nag-ampo nga gub-on sa Langitnong Amahan ang stereo.

Ang akong desperado nga pag-ampo nahimong pagdayeg ug pasalamat dihang ang stereo kalit lang nahilom sa iyang paghunong. Nakatrabaho ko sa mga stereo sa sakyanan ug nasayud pinaagi sa tingog nga wala kini ma-off—kini naguba.

Ang batan-ong lalaki naglagot nga wala na motingog ang iyang stereo, ug nagpundok ang iyang mga higala aron sa paghupay kaniya. Ako, sa laing bahin, mibati nga natagbaw nga nakasaksi nga sa akong hunahuna ang kamot sa Dios miguba sa stereo.

Apan samtang nagpadayon ko nga nagtan-aw, nakaamgo ko nga sama usab ko kanila mga daghang katuigan na ang milabay. Ang akong kasingkasing nalukmay, ug ako nagsugod sa paghunahuna nga tingali kining batan-ong lalaki dili diay akong kaaway. Dayon ang Espiritu mihunghong, “Adto ug ayoha ang iyang stereo.”

Nakuratan ko sa aghat ug naningkamot nga ibaliwala kini. Nganong ako mang ayuhon ang usa ka butang nga nakapamiserable sa akong kinabuhi? Apan mibalik ang aghat, ug ako kining gisunod.

Human nga mitanyag ko og tabang, diha-diha dayon akong nakita ang hinungdan sa pagkaguba. Dali ra ning ayuhon. Sa wala madugay nagtukar na usab ang stereo ingon ka grabe kalanog.

Ang batan-ong lalaki nagpasalamat ug nangutana kon aduna ba siyay mahimo para nako. Giingnan nako siya nga kinahanglan ko nga mobangon og sayo para sa trabaho, ug kon iyang pahinayan ang iyang musika magabii, makadayeg ko niini. Mipahiyom siya ug misiguro nako nga iya kining buhaton.

Wala lang niya pahinaya ang iyang stereo magabii, apan siya nahimo nakong personal nga tigbantay sa mga stereo ug nagsiguro nga pahinayan usab sa iyang mga higala ang ilang mga stereo. Sukad adto, wala na ko magproblema sa kusog nga musika magabii.

Gipaminaw ug gitubag sa Langitnong Amahan ang akong pag-ampo. Ang Iyang solusyon naghatag og kalinaw ug kahilom, bililhong leksyon kabahin sa pagsunod sa Espiritu, ug mas maayo nga panabut kon unsay ipasabut nga “higugmaa ninyo ang inyong mga kaaway” (Lucas 6:27).