Mahimo bang Mobasa Ko Nianang Basahon?

Mga 50 ka tuig ang milabay, ang akong kompanyon ug ako nag-tracting duol sa University of Córdoba sa Argentina, usa ka batan-ong lalaki midapit namo sa iyang apartment. Diha-diha dayon nahimong klaro nga siya ug ang iyang mga kauban sa kwarto midapit namo aron lang makigdebate sa pagkaanaay Dios.

Dili namo gustong makigdebate, busa nagsabut mi nga magkita mi pagkataud-taud aron sa paghisgot sa among mensahe sa usa ka palibut nga haum sa pagkat-on. Sa among pagbalik, ang batan-on mipasabut nganong nagtuo siya nga walay Dios. Siya miingon nga gimugna sa tawo ang Dios tungod sa iyang panginahanglan sa usa ka butang nga mas halangdon, sa usa ka butang nga balaanon.

Dihang turno na namo, nangutana ko, “Giunsa nimo pagkasayud nga adunay Estados Unidos?” Ako nagpamatuod sa katinuod niini ug nangutana kon aduna pa bay laing mga ebidensya nga momatuod nga anaa kini. Siya miingon nga iya kining nabasa sa mga libro ug mga newspaper. Dayon nangutana ko kon siya mituo ba sa akong pagpamatuod ug sa iyang nabasa. Siya kusganong miuyon.

“Busa dili nato malimod ang mga pagpamatuod niadtong, sama nako, gikan sa Estados Unidos,” miingon ko. “Ni atong malimod ang mga pagpamatuod niadtong nagsulat kabahin niini.” Ang batan-ong lalaki miuyon.

Dayon nangutana ko, “Base niini nga ideya, malimod ba nato ang mga pagpamatuod niadtong nakakita sa Dios ug nagsulat sa ilang kasinatian?” Gipakita nako niya ang Biblia, nagsulti nga kini naglangkob sa mga pagpamatuod sa mga tawo kinsa nakakita ug nakigsulti sa Dios ug ni Jesukristo. Nangutana ko kon kita ba makalimod sa mga pagpamatuod nga anaa diha sa Biblia, ug nagpanuko siyang misulti og dili.

Dayon nangutana ko, “Unsay imong hunahuna sa basahon nga gisulat sa mga tawo nga wala diha sa Biblia, kinsa nakakita sa pareho nga Dios sama sa mga tagsulat sa Biblia? Siya mitubag nga wala kining libroha.

Among gipakita kaniya ang Basahon ni Mormon ug mitudlo niya sa katuyoan niini. Kami mipamatuod nga kini tinuod ug ang Dios padayong nakigsulti pinaagi sa buhing mga propeta karon.

Nasurprisa, ang batan-ong lalaki miingon, “Napalibog nako ang tanang mga tigsangyaw sa ubang mga simbahan. Kamo misulti og usa ka butang nga wala pa nako madungog kaniadto. Mahimo bang mobasa ko nianang basahon?” Amo siyang gihatagan sa basahon ug mipamatuod sa gugma sa Dios alang sa Iyang mga anak.

Tungod kay pahuman na ang semester, wala na namo mabisita pag-usab kining batan-ong lalaki sa wala pa siya miuli sa Bolivia. Hinoon, nag-ampo ko nga magbasa siya ug makadawat og pagpamatuod.

Niadtong 2002 gitawag ko sa pagserbisyo isip Spanish branch president sa Provo Missionary Training Center. Usa ka Dominggo akong gisaysay ang istorya sa ibabaw ngadto sa mga misyonaryo. Pagkahuman usa ka misyonaryo gikan sa Bolivia miingon nako nga siya nakadungog og usa ka tigulang nga lalaki sa iyang stake nagsaysay sa istorya sa iyang pagkakabig—sama nga istorya nga akong gisaysay dinhi.

Nakahilak ko. Human sa 40 ka tuig, nakadawat ko og tubag sa akong mga pag-ampo mahitungod sa batan-ong lalaki gikan sa Bolivia. Nasayud siya sa pagkaanaa sa Dios ug sa Iyang talagsaong plano sa kalipay. Nasayud ko nga magkita ra mi pag-usab, ug maglipay ko uban niya diha sa ebanghelyo.