Mensahe sa Unang Kapangulohan
Ang Labing Maayo nga Panahon sa Pagtanom og Kahoy
Sa karaang Roma, si Janus mao ang dios sa mga sinugdanan. Sa kanunay siya ihulagway nga adunay duha ka nawong—ang usa naglantaw sa nangagi, ang pikas naglantaw sa umaabut. Daghan sa mga pinulongan nagngalan sa bulan sa January [Enero] gikan kaniya tungod kay ang sinugdanan sa tuig panahon sa pagpamalandong ingon man usab sa pagplano.
Liboan ka mga tuig ang milabay, daghang mga kultura sa tibuok kalibutan nagpadayon sa tradisyon sa paghimo og mga resolusyon sa bag-ong tuig. Siyempre, ang paghimo og resolusyon sayon ra—ang pagtuman niini lain na nga hilisgutan.
Ang usa ka tawo nga naghimo og taas nga listahan sa resolusyon sa Bag-ong Tuig mibati og maayo sa iyang kalamboan. Naghunahuna siya, “Sa karon, nagpadayon ko sa pag-diyeta, nagpasensya ko, nagsunod ko sa budget, ug wala pa ko’y reklamo bisan kausa sa iro sa silingan. Apan karon Enero 2 ug mao pay pagtingog sa alarm ug oras na para mobangon. Nagkinahanglan og milagro para mapadayon nako akong resolusyon.”
Pagsugod og Usab
Adunay usa ka butang nga malaumon kaayo sa pagsugod og bag-o. Nagtuo ko kausa o sa laing higayon nga kitang tanan kinahanglang magsugod nga limpyo.
Ganahan kaayo ko og bag-ong computer nga adunay limpyo nga hard drive. Sulod sa mubong panahon maayo pa kaayo ni. Apan sa paglabay sa mga adlaw ug semana ug daghang mga program ang i-install (ang pipila tinuyo, ang uban wala tuyoa), sa katapusan ang computer mosugod sa pag-ungot, ug dayon mohinay na. Usahay dili kini mogana. Gani ang pagpa-start niini mahimong dugay tungod kay ang hard drive napuno sa wala kinahanglana nga mga file ug mga program. May higayon nga ang bugtong paagi mao ang pag-reformat sa computer ug sa pagsugod og usab.
Ang tawo mahimong mapuno usab sa kahadlok, pagduha-duha, ug kabug-at sa kahasol sa konsensya. Ang mga sayop nga atong nahimo (tinuyo ug wala tuyoa) makapabug-at sa atong pagbati hangtud mahimong lisud para nato sa pagbuhat sa angay natong buhaton.
Kabahin sa sala, adunay nindot nga proseso sa pag-reformat nga gitawag og paghinulsol nga makalimpyo sa atong kalag sa mga palas-anon nga mipuno sa atong kasingkasing. Ang ebanghelyo, pinaagi sa milagruso ug manggiloy-ong Pag-ula ni Jesukristo, nagpakita kanato sa paagi sa paglimpyo sa atong kalag sa lama sa sala ug sa makausa makapahimo nato nga bag-o, putli, ug inosente sama sa usa ka bata.
Apan usahay adunay mga butang nga makapahinay ug makapugong kanato, maoy hinungdan sa dili maayo nga mga panghunahuna ug mga lihok nga nakapalisud nato sa pagbag-o.
Paghimo sa Atong Pinakamaayo
Ang paghimo og mga tumong maayo nga paningkamot. Nasayud kita nga ang Langitnong Amahan may mga tumong tungod kay Siya misulti kanato nga ang Iyang buhat ug himaya mao ang “pagpahinabo sa pagka-imortal ug sa kinabuhi nga dayon sa tawo” (Moises 1:39).
Ang atong personal nga mga tumong makapahimo nato sa atong pinakamaayo. Apan, usa ka butang nga nagpugong sa atong mga paningkamot sa paghimo ug pagtuman sa mga resolusyon mao ang paglangay-langay. Usahay atong langanon ang pagsugod, nagpaabut sa sakto nga panahon sa pagsugod—unang adlaw sa bag-ong tuig, sinugdanan sa ting-init, kon kita tawagon isip bishop o Relief Society president, human makagradwar ang mga bata sa eskwelahan, kon kita moretiro na.
Wala mo magkinahanglan og imbitasyon aron magsugod mo sa direksyon paingon sa inyong matarung nga mga tumong. Wala mo magkinahanglan og pagtugot aron mahimo kamong tawo nga giplanong mamahimo. Dili na kamo kinahanglang magpaabut nga imbitaron sa pagserbisyo sa Simbahan.
Usahay nausik ang daghang mga tuig sa atong kinabuhi nga nagpaabut aron pilion (tan-awa sa D&P 121:34–36). Sayop kana nga ideya. Gipili na kamo!
Usahay adunay mga higayon sa akong kinabuhi nga ako dili makatulog sa paghunahuna sa mga isyu, kabalaka, o personal nga mga kasub-anan. Apan bisan unsa pa kangitngit ang kagabhion, kanunay kong madasig niini nga hunahuna: sa buntag mosidlak ra ang adlaw.
Sa matag bag-o nga adlaw, usa ka bag-ong sinugdanan moabut—dili lang alang sa kalibutan apan alang usab kanato. Ug uban sa bag-o nga adlaw mao ang bag-ong sinugdanan—usa ka kahigayunan sa pagsugod og usab.
Apan Unsa Kaha Kon Kita Mapakyas?
Usahay ang butang nga nagpugong kanato mao ang kahadlok. Tingali kita nahadlok nga kita dili molampus, nga kita molampus, nga kita maulawan, nga ang kalampusan tingali makapausab kanato, o kini makapausab sa mga tawo nga atong gihigugma.
Ug busa kita magpaabut. O moundang.
Usa pa ka butang nga kinahanglan natong hinumduman kalabut sa paghimo og mga tumong mao kini: Kita mahimo gyud nga mapakyas—bisan sa mubong panahon. Imbis nga mawad-an og kadasig, kita makaangkon og gahum tungod kay kini nga pagsabut makapawala sa pagpamugos nga mahingpit karon. Giila na gikan pa sa sinugdanan, nga kita mahimong mapakyas. Ang pagkasayud niini gikan pa sa sinugdanan makapawala sa daghang katingala ug kawala sa kadasig gumikan sa kapakyasan.
Kon atong buhaton ang mga tumong niini nga paagi, ang kapakyasan dili kinahanglang mopugong nato. Hinumdumi, bisan kon kita mapakyas sa pagkab-ot sa atong katapusan, gitinguha nga destinasyon diha-diha dayon, kita mahimong nag-uswag sa dalan padulong niini.
Ug kana mahinungdanon—makahuluganon kaayo.
Bisan tuod kita wala makaabut sa finish line, ang pagpadayon sa panaw mas makaayo nato kay sa una.
Karon ang Pinakamaayong Panahon sa Pagsugod
Usa ka karaang proverbio miingon, “Ang labing maayo nga panahon sa pagtanom og kahoy mao ang 20 ka tuig kaniadto. Ang ikaduhang labing maayo nga panahon mao karon.”
Adunay usa ka butang nga talagsaon ug malaumon sa pulong karon. Adunay usa ka butang nga naghatag og gahum sa kamatuoran nga kon kita mopili sa pagdesisyon karon, kita makapadayon sa unahan karon mismong higayuna.
Karon mao ang pinakamaayo nga panahon sa pagsugod nga mahimong tawo nga gusto natong mamahimo—dili lang 20 ka tuig gikan karon apan hangtud sa kahangturan.
Pagtudlo Niini nga Mensahe
Si President Uchtdorf mipasabut nga kon kita mapakyas sa atong mga tumong, “kita makaangkon og gahum … Bisan tuod kita wala makaabut sa finish line, ang pagpadayon sa panaw mas makaayo nato kay sa una.” Hangyoa ang mga sakop sa pamilya sa pagpakigbahin og mga kasinatian diin sila mas nakakat-on gumikan sa proseso kaysa resulta, sama sa paggradwar sa eskwela o pagdawat og ganti.
Litrato gikan sa iStockphoto/Thinkstock