Ennaan eo an Būreejtōnji eo Kein Kajuon, Jānwōde 2014
Tōre eo Em̧m̧antata n̄an Katōk juon Wōjke
Ilo Rom jem̧aan, Janus eaar anij eo m̧oktata. Ekkā an kwaļo̧k ruo māj ko—juon ej erelikļo̧k n̄an jem̧aan, eo juon ej erem̧aanļo̧k n̄an ilju im jeklaaj. Kajin ko jet rej ņaetan allōn̄ in Jānwōde ālkin e kōnke jinoin iiō eo eaar juon iien n̄an em̧em̧ļo̧kjeņ n̄an kobaiki ilo pepe.
Taujin iiō ko tokālik, elōn̄ m̧anit ko ipeļaakin laļ in raar etal wōt ilo juon m̧anit n̄an karōki kōttōpar ko n̄an em̧m̧anļo̧k eo an juon make. Aaet, epidodo kōm̧m̧ani kōttōpar ko—kōjparoki ej juon men eoktak jen doon.
Juon em̧m̧aan eo ekar kōm̧m̧ane juon laajrak in kōttōpar eo eaitok kōn New Year eaar en̄jake em̧m̧an kōn eddōkļo̧k eo an. Eaar ļōmņak ippān make, “Ekwe, “Iaar dāpij kallim̧ur eo aō n̄an m̧ōn̄ā jidik, ijan̄in kar illu, iaar dāpij jon̄an bajet eo aō, im iaar jab elotaan kōn kidu eo nejin ro rituru. Ak rainin ej Jānwōde 2 im aļļaam̧ eo ej kab kun im ej iien ruj jen ioon kineed. Ej iien n̄an bōk juon kabwilōn̄lōn̄ n̄an lo̧o̧ri kōttōpar ko aō.”
Bar Jinoe
Ewōr jet kōjatdikdik ko rekbwilōn̄lōn̄ kōn juon ijjino eo em̧m̧an. Iaar kōtmene ilo juon tōre ak eo juon kōm̧ ar aolep kōņaan bar jinoe ilo ejjeļo̧k bōd.
Iaar kōņan bōk juon kam̧putōr ekāāl kōn juon hard drive eo erreo. Eaar em̧m̧an an jerbal ilo tōre eo. Ak ilo an raan ko im wiik ko rej ellāļo̧k im elōn̄ im lōn̄ būrokraam̧ ko kar kōdeļo̧n̄i (kōn elōn̄ wun im jet kōn ejjeļo̧k wun), āliktata kam̧putōr eo eaar jino jorrāān, im men kar m̧ōkaj kōjerbali im jejjet raar jino ar ralo̧kļo̧k. Jet iien ejjab jerbal n̄an jidik. Men̄e kar kajieon̄ kar kōjo e ak eaar erom juon jerbal āinwōt an hard drive eo jino jorrāān kōn data ko rejjab ekkar. Ewōr wōt iien ko n̄e jipan̄ eo wōt ej n̄an jeorļo̧k kobban im bar jino jen jinoin.
Armej ro remaron̄ jorrāān kōn mijak, pere, im eddodo kōn bōd. Bōd ko jaar kōm̧m̧ani (Jimo̧r ilo wun im ejjeļo̧k wun) remaron̄ kōmetak kōj m̧ae iien eo emaron̄ in pen n̄an kōm̧m̧ane ta eo jejeļā n̄an kōm̧m̧ane.
Ilo jekjek eo an jerawiwi, ewōr juon jekjek in iaļen kōm̧anm̧an eo eaiboojoj ņaetan ukwelo̧k me ej kōm̧m̧an bwe jen karreoik lowaan hard drive eo ekōmetak buruwōd make. Kōn ko̧jpeļ eo, Pinmuur eo ekabwilōn̄lōn̄ im tiriam̧o eo an Jisōs Kraist ej kwaļo̧k n̄an kōj wāween eo n̄an karreoik jetōb ko ad jen māār in jerawiwi im bar juon alen erom kāāl, erreo, im āinwōt juon ajri eo ejjeļo̧k ruwōn.
Ak jet iien men ko jet rej karum̧wij kōj im likwōj kōj, kwaļo̧k ļōmņak ko rewaan im m̧akūtkūt ko rej kapen ad jinoe.
Kwaļo̧k Em̧m̧antata eo ilo Kōj
Kwaļo̧k kōttōpar ko ej juon kajieon̄ eo erreeo. Jejeļā bwe Jemedwōj Ilan̄ ewōr kōttōpar Ippān kōnke Eaar jiron̄ kōj bwe jerbal eo An im aiboojoj eo An ej n̄an bōktok mour jab wabanban im mour indeeo an armej (lale Moses 1:39).
Kōttōpar ko ad make remaron̄ bōktok em̧m̧antata eo ilo kōj. Ijoke, juon iaan men ko me rekabņōņōik kijejeto ko ilo ad kōm̧m̧ani im dāpij kōttōpar ko ej aipādpād. Jet iien jej aipādpād, kōttar iien eo em̧m̧an n̄an jinoe—raan eo m̧oktata ilo juon iiō ekāāl, jinoin jōm̧ar, ke jaar kūr āinwōt bisop ak būreejtōn n̄an Doulul eo an Kōrā, n̄e ajri ro rejino pād ilo jikuul, ālkin ad retire.
Kwoj jab aikuji juon kūr m̧okta jen am jino em̧akūt ļo̧k ilo iaļen kōttōpar ko am̧ rejim̧e. Kwoj jab aikuj in kōttar mālim n̄an erom armej eo kwōj kōņaan erom. Kwoj jab aikuj in kōttar n̄an juon kūr n̄an jerbal ilo Kabun̄ in.
Jet iien jemaron̄ jerwaane iiō ko ilo mour ko ad n̄an kōttar n̄an kūr (lale D&C 121:34–36). Ak ej juon ļōmņak ebōd. Kwar kālet kadede!
Ilo tōre ko ilo mour eo aō iaar jab kiki ilo bon̄ ļōmņak kōn men ko, inepata ko, ak būrom̧ōj ko aō make. Ak jekdo̧o̧n ewi jon̄an marok in bon̄ōn eo, aolep iien ij peran kōn ļōmņak in: ilo jibbon̄ al eo enaaj tak.
Ilo kajjojo raan kāāl, ej jerkan juon al kāāl—ejjab wōt n̄an laļ in ak n̄an kōj barāinwōt. Im ilo juon jerkan raan ekāāl—juon oktak ej bar ijjino.
Ak Ta Eļan̄n̄e Jej Likjab?
Jet iien men ko me rej likwōj kōj ej mijak. Jemaron̄ in mijak bwe jemaron̄ jab tōprak, ak jenaaj tōprak, ak jemaron̄ in jook, ak tōprak emaron̄ ukōt kōj, ak bwe emaron̄ ukōt armej ro jej iakwe.
Im āidein ad kōttar. Ak ebbwer.
Bar juon men jej aikuj in kememej n̄e ej itok n̄an karōk kōttōpar ko ej en̄in: Jemaron̄ in naaj likjab—diktata ilo naan ekadu in. Ak ijjelo̧kin ebbweer, jemaron̄ in bōk kajoor kōnke meļeļein ekōm̧akūt abwilōn̄lōn̄ eo n̄an wānōk kiiō. Ej kalikar jān jinoin bwe ilo juon tōre ak eo juon, jemaron̄ likjab. Jeļā menin jān jinoin ekōm̧akūt bwilōn̄ im ebbweer an likjab.
N̄e jej tōpar kōttōpar ko ad ilo wāween in, likjab ejamin bōk jikin ilo kōj. Kememej, men̄e jej likjab n̄an tōpar jem̧ļo̧k eo ad, mejān kajjik eo jekōņaan ilo iien eo emōkajtata, jenaaj eddōkļo̧k ilo iaļ in me ej tōl ļo̧k n̄an e.
Im jekjek kein—eļap meļeļeier.
Men̄e jemaron̄ in likjab jidik ilo jem̧ļo̧kin iaļ in ad, baj etal wōt ilo iaļ in enaaj kōm̧anm̧an ļo̧k kōj jen kar m̧okta.
Tōre eo Em̧m̧antata n̄an Ijjino Ej Kiiō
Juon jabōn kōņņaan ej ba, “Tōre eo em̧m̧an tata n̄an katōk juon wōjke ej 20 iiō ko rem̧ootļo̧k. Tōre eo em̧m̧antata kein karuo ej kiiō.”
Ewōr men eaiboojoj im ekōjatdikdik kōn naan in kiiō. Ewōr jet men rekajoor kōn m̧ool eo me eļan̄n̄e jej kālet n̄an kōm̧m̧ane kiiō, jemaron̄ em̧akūt m̧aanļo̧k ilo iien in.
Kiiō ej tōre eo em̧m̧antata n̄an ijjino erom armej eo jaar lukkuun kōņaan—ejjab 20 iiō jān kiiō ak barāinwōt n̄an indeeo.
© 2014 jen Intellectual Reserve, Inc. Aolep jim̧we rej pād ippān. Jeje ilo USA. Kōmālim ilo kajin English: 6/13. Kōmālim an ukook: 6/13. Ukook eo an First Presidency Message, January 2014. Marshallese. 10861 874
Katakin jān Ennaan In
Būreejtōn Uchtdorf eaar kōmeļeļeik bwe n̄e jej likjab n̄an tōpar kōttōpar ko ad, “jemaron̄ bōk mālim. … Men̄e jemaron̄ in likjab jidik ilo jem̧ļo̧kin iaļ in ad, baj etal wōt ilo iaļ in enaaj kōm̧anm̧an ļo̧k kōj jen kar m̧okta. Kajjitōk ippān ro uwaan baam̧le eo n̄an kwaļo̧k en̄jake ko me raar ekkatak jān jekjek in, āinwōt kadiwōjļo̧k jān jikuul ak bōk juon nōbar.