Ang Balaang Dios nga Kapangulohan

Nagtuo ko sa walay pagduha-duha, ug uban sa hingpit nga pasalig diha sa Dios, ang Amahan sa Kahangturan. Siya ang akong Amahan, ang Amahan sa akong espiritu, ug ang Amahan sa mga espiritu sa tanang tawo. Siya ang makagagahum nga Tiglalang, ang Tigmando sa Uniberso. … Sa Iyang panagway ang tawo nalalang. Siya personal. Siya tinuod. Siya indibidwal. Siya adunay “lawas nga unod ug mga bukog nga mahikap ingon sa tawo” (D&P 130: 22).

Sa nahisulat nga kasaysayan sa paglalang sa kalibutan, “Miingon ang Dios, Buhaton nato ang tawo sumala sa atong dagway, ingon sa kasama nato” (Genesis 1:26).

Aduna pa bay pinulongan nga mas klaro? Kini ba nagpakaubos sa Dios, sama sa gusto sa pipila nga atong tuohan, nga ang tawo gilalang sumala sa Iyang dagway? Hinoon, kinahanglang matisok kini diha sa kasingkasing sa matag tawo og mas dakong pagdayeg sa iyang kaugalingon isip anak sa Dios. …

… Isip misyonaryo, namulong ko [didto sa London, England, dihang may samukang tawo nga misyagit], “Nganong dili ka magtamod lang sa doktrina sa Biblia nga nag-ingon diha sa Juan (4:24), ‘Ang Dios Espiritu’?”

Akong giablihan ang akong Biblia sa bersikulo nga iyang gikutlo ug gibasa ngadto kaniya ang tibuok bersikulo: “Ang Dios Espiritu: ug ang mga magasimba kaniya kinahanglan managsimba diha sa espiritu ug sa kamatuoran.”

Miingon ko, “Siyempre ang Dios espiritu, ug ikaw sab, sa paghiusa sa espiritu ug lawas kana nakapahimo nimo nga buhi nga tawo, ug nako pud.”

Ang matag usa kanato adunay espiritwal ug pisikal nga aspeto. Ang tanan nasayud sa katinuod sa kamatayon … , ug kitang tanan nasayud nga ang espiritu magpadayon nga buhi isip usa ka indibidwal ug moabut ang panahon, ubos sa balaanong plano nga nahimong posible pinaagi sa sakripisyo sa Anak sa Dios, maghiusa ang espiritu ug lawas. Ang pamahayag ni Jesus nga ang Dios usa ka espiritu wala maglimod nga Siya adunay lawas sama sa pahayag nga ako usa ka espiritu samtang adunay lawas usab.

Wala nako gipakahisama ang akong lawas ngadto sa Iyang lawas sa kalunsay, sa kapasidad, sa katahum ug kahayag niini. Ang Iyang lawas walay katapusan. Ang akong lawas mortal. Apan kana nagdugang sa akong balaan nga pagtahud alang Kaniya. … Nagtinguha ko sa paghigugma Kaniya uban sa tibuok nakong kasingkasing, gahum, hunahuna, ug kusog. Ang Iyang kaalam mas labaw pa kay sa kaalam sa tanang katawhan … Ang Iyang gugma naglangkob sa tanan Niyang mga anak, ug kini Iyang buhat ug himaya sa pagpahinabo sa pagka-imortal ug kinabuhi nga dayon sa Iyang mga anak … (tan-awa sa Moises 1:39). …

Nagtuo ko ni Ginoong Jesukristo, ang Anak sa mahangturon, buhi nga Dios. Nagtuo ko Kaniya isip ang Unang Natawo sa Amahan ug ang Bugtong Anak sa Amahan diha sa unod. Nagtuo ko Kaniya isip indibidwal, nahibulag ug nalahi gikan sa Iyang Amahan. …

Nagtuo ko nga sa Iyang mortal nga kinabuhi Siya ang bugtong hingpit nga tawo nga nabuhi sa kalibutan. Nagtuo ko nga diha sa Iyang mga pulong makaplagan ang kahayag ug kamatuoran nga, kon sundon, makaluwas sa kalibutan ug makadala og kahimayaan sa katawhan. Nagtuo ko nga sa Iyang priesthood anaa ang balaanong awtoridad—ang gahum sa pagpanalangin, ang gahum sa pag-ayo, ang gahum sa pagdumala sa mga kalihokan sa Dios dinhi sa kalibutan, ang gahum sa pagbugkos didto sa kalangitan nianang gibugkos dinhi sa kalibutan.

Nagtuo ko nga pinaagi sa Iyang maulaon nga sakripisyo, sa paghalad sa Iyang kinabuhi didto sa bungtod sa Kalbaryo, Siya nag-antus alang sa mga sala sa katawhan, naghupay kanato sa palas-anon sa sala kon atong isalikway ang dautan ug mosunod Kaniya. Nagtuo ko sa reyalidad ug gahum sa Iyang Pagkabanhaw. … Nagtuo ko nga pinaagi sa Iyang Pag-ula, … gitanyag kanatong tanan ang gasa sa pagkabanhaw gikan sa pagkamatay. Dugang pa nagtuo ko nga pinaagi niadtong sakripisyo gihatag ngadto sa matag tawo, sa matag anak sa Dios, ang oportunidad sa kinabuhing dayon ug kahimayaan diha sa gingharian sa atong Amahan, samtang kita … nagsunod sa Iyang kasugoan.

Walay tawo nga sama ka halangdon ang nakapuyo dinhi sa kalibutan sukad. Walay laing tawo ang nakahimo sa susamang sakripisyo o mihatag sa susamang panalangin. Siya mao ang Manluluwas ug Manunubos sa kalibutan. Nagtuo ko Kaniya. Akong ipahayag ang Iyang kabalaan … Ako nahigugma Kaniya. Ako mosulti sa Iyang ngalan uban sa balaan nga pagtahud ug pagdayeg. …

… Ang kasulatan nagsaysay [niadtong] mga tawo nga Siya Mismo nagpakita kanila ug niadtong kang kinsa Siya nakigsulti isip buhi, nabanhaw nga Anak sa Dios. Sa samang paagi Siya nagpakita niini nga dispensasyon, ug kadtong nakakita Kaniya mideklarar:

“Ug karon, human sa daghan nga mga pagpamatuod nga gihatag mahitungod kaniya kini mao ang pagpamatuod, ang katapusan sa tanan, nga kami naghatag mahitungod kaniya: Nga siya buhi!

“Kay kami nakakita kaniya, gani diha sa tuo nga kilid sa Dios; ug kami nakadungog sa tingog nga nagpamatuod nga siya mao ang Bugtong Anak sa Amahan—

“Nga pinaagi kaniya, ug ngadto kaniya, ug tungod kaniya, ang mga kalibutan nalalang, ug ang mga lumulupyo niana mao ang anak nga mga lalaki ug anak nga mga babaye sa Dios” (D&P 76:22–24).

Kini mao ang Kristo kinsa akong gituohan ug gipamatud-an.

Kana nga kahibalo nagagikan sa pulong sa kasulatan, ug kana nga pagpamatuod nagagikan sa gahum sa Espiritu Santo. Kini usa ka gasa, sagrado ug talagsaon, gihatag pinaagi sa pagpadayag gikan sa ikatulo nga sakop sa Dios nga Kapangulohan. Nagtuo ko sa Espiritu Santo isip usa ka personahe sa espiritu nga kauban sa Amahan ug sa Anak, silang tulo naglangkob sa balaang Dios nga Kapangulohan. …

Ang Espiritu Santo giila sa karaang panahon isip sakop sa Dios nga Kapangulohan nga naklaro gikan sa panagsultihanay ni Pedro ug ni Ananias sa dihang wala gihatag ni Ananias ang tanang halin gikan sa pagbaligya sa yuta.

“Apan si Pedro miingon kaniya, Ananias, naunsa bang giyawaan man pag-ayo ni Satanas ang imong kasingkasing aron imong bakakan ang Espiritu Santo … ?

“… Ang imong gibakakan dili tawo kondili ang Dios” (Mga Buhat 5:3–4).

Ang Espiritu Santo [mao] ang Maghuhupay nga gisaad sa Manluluwas kinsa motudlo sa Iyang mga sumusunod sa tanang butang ug mopahinumdom kanila sa tanang butang … (tan-awa sa Juan 14:26).

Ang Espiritu Santo mao ang Tigpamatuod sa Kamatuoran, kinsa makatudlo sa katawhan sa mga butang nga dili nila matudlo sa usag usa. … Ang pagkasayud sa katinuod sa Basahon ni Mormon gisaad “pinaagi sa gahum sa Espiritu Santo.” Gideklarar kaniadto ni Moroni, “Ug pinaagi sa gahum sa Espiritu Santo kamo mahimo nga masayud sa kamatuoran sa tanan nga mga butang” (Moroni 10:4–5).

Nagtuo ko nga kining gahum, kining gasa, anaa kanato karon.

… Ako nagtuo sa Dios, ang Amahan sa Kahangturan, ug sa Iyang Anak, si Jesukristo, ug sa Espiritu Santo.

Nabunyagan ko diha sa ngalan nilang tulo. Naminyo ko diha sa ngalan nilang tulo. Ako walay pagduha-duha sa ilang reyalidad ug pagka-indibidwal. Kana nga pagka-indibidwal klaro kaayo dihang si Jesus gibunyagan ni Juan sa Jordan. Sa tubig nagbarug ang Anak sa Dios. Ang tingog sa iyang Amahan nadungog nga nagpahayag sa kabalaan sa Iyang anak, ug ang Espiritu Santo nakita sa porma sa usa ka kalapati (tan-awa sa Mateo 3:16–17).

Sayud ko nga si Jesus miingon nga kinsa nakakita Kaniya nakakita sa Amahan [tan-awa sa Juan 14:9]. Dili ba masulti gihapon ni sa daghang mga anak nga lalaki nga naliwat sa iyang ginikanan?

Sa dihang si Jesus nag-ampo sa Amahan, sigurado wala Siya nag-ampo sa iyang Kaugalingon!

Sila managlahi nga binuhat, apan usa sila sa katuyoan ug paningkamot. Sila nagkahiusa sa pagpahinabo sa dako, balaan nga plano alang sa kaluwasan ug kahimayaan sa mga anak sa Dios.

… Si Kristo mihangyo sa Iyang Amahan mahitungod sa mga Apostoles, kinsa Iyang gihigugma, nag-ingon:

“Ug nangamuyo ako dili lamang alang kanila ra, kondili alang usab sa mga mosalig kanako pinaagi sa ilang pulong;

“Aron silang tanan ma-usa; maingon nga ikaw, Amahan, ania kanako, ug ako anaa kanimo, aron sila usab maania kanato” (Juan 17:20–21).

Kini mao ang hingpit nga panaghiusa tali sa Amahan, sa Anak, ug sa Espiritu Santo nga nagbugkos nilang tulo sa panaghiusa sa balaang Dios nga Kapangulohan.