Matinuoron ug Matinud-anon

Sama sa ubang mga propeta sa Dios, si Joseph Fielding Smith giorden nang daan nga matawo sa kalibutan sumala sa balaang panahon sa Ginoo (tan-awa sa Mga Buhat 17:26). Si Joseph mao ang ikaupat nga anak apan ang unang anak nga lalaki ni Julina Lambson Smith. Sama sa mapainubsanong diwa sa matinud-anong inahan diha sa Daang Tugon nga si Ana (tan-awa sa 1 Samuel 1:11), si Julina misaad nga kon ang Ginoo mohatag kaniya og usa ka anak nga lalaki, “iyang buhaton ang tanan sa pagtabang kaniya nga mapuslan sa Ginoo ug sa iyang amahan.”³ Wala lang gitubag sa Ginoo ang iyang pangamuyo apan gipakita usab ngadto kaniya, sa wala pa matawo ang iyang anak, nga ang bata sa umaabut tawagon sa pagserbisyo isip usa sa Iyang linain nga saksi sa Korum sa Napulog Duha ka mga Apostoles.⁴

Si Joseph natawo niadtong Hulyo 19, 1876, ngadto ni Joseph F. ug Julina Lambson Smith. Sa panahon nga natawo si Joseph, ang iyang amahan usa ka Apostol ug counselor ni President Brigham Young. Sa dihang si Joseph siyam na ka bulan, gidala siya sa iyang mga ginikanan sa pagpahinungod sa St. George Utah Temple. Sa wala madugay siya nangomedya, “Ang akong unang buluhaton sa simbahan mao ang pag-uban ni Brigham Young sa pagpahinungod sa St. George Temple.”⁵

Sa dihang nadawat ni Joseph ang iyang patriyarkal nga panalangin sa edad nga 19, usa ka dinasig nga patriarch mipandong sa iyang mga kamot diha sa ulo ni Joseph ug mipahayag: “Imong pribelihiyo nga mabuhi og dugay ug kabubut-on sa Ginoo nga ikaw mahimong gamhanan nga tawo sa Israel … Ikaw mobarug taliwala sa katawhan isip usa ka propeta ug tigpadayag ngadto kanila, kay ang Ginoo mipanalangin ug miorden kanimo niini nga calling.”⁶

Alang kang Joseph Fielding Smith, “ang pamilya mao ang labing importanting organisasyon karon o sa kahangturan.”⁷ Nagdako siya sa usa ka pamilya nga giniyahan sa gugma, hugot nga pagtuo, taas og mga sumbanan sa moral, ug makugihon sa pagtrabaho, ug siya kanunay nagtinguha nga ang maong mga baruganan masunod mismo sa iyang pamilya (Tan-awa sa mga kapitulo 4, 15 ug 16 sa Mga Pagtulun-an sa mga Presidente sa Simbahan: Joseph Fielding Smith.)

Iyang giminyoan si Louie Emily Shurtliff sa Salt Lake Temple niadtong 1898. Paglabay sa usa ka tuig siya gitawag nga mag-misyon sa Great Britain sulod sa duha ka tuig ug matinud-anong gisuportahan sa iyang asawa. Sa iyang pag-uli, nag-uban na usab silang duha ug napanalangin og duha ka anak nga babaye. Subo lang, atol sa lisud kaayo nga pagmabdos sa ikatulong anak si Louie namatay.

Sa iyang kasubo si Joseph nag-ampo, “Tabangi ko, nag-ampo ko Kanimo, nga ako magpakabuhi nga takus sa pakighimamat sa akong asawa sa mahangturong himaya, aron ikauban siya pag-usab, dili na gayud magkabulag … Tabangi ko nga makaatiman sa bililhon nakong mga anak nga magpabilin silang putli ug walay buling sa tibuok nilang kinabuhi.”⁸

Sa pag-awhag sa iyang amahan, ang nagsubo nga amahan sa duha ka bata mainampoong nagtinguha og asawa ug inahan para sa iyang mga batang anak. Ang Iyang matarung nga tinguha napanalangin sa dihang si Ethel Georgina Reynolds miabut sa iyang kinabuhi. Naminyo sila niadtong Nobyembre 1908 sa Salt Lake Temple. Kining talagsaon nga babaye nahimong inahan sa unang duha ka anak nga babaye ni Joseph ug sa wala madugay nanganak og siyam pa ka bata.

Kausa, naghunahuna og maayo ang Apostol sa kabug-at sa palas-unon sa iyang asawa kon siya mobiyahe para sa komperensya sa stake. Siya misulat kaniya: “Ako naghunahuna kanimo ug nanghinaut nga kanunayng makauban ka sa sunod pipila ka semana, aron sa pagtabang kanimo. Tabangan tikaw kutob sa akong mahimo, ug nanghinaut nga imong mabati ang akong impluwensya. Tudloi ang mga bata nga magmabination kanimo ug sa usag usa.”⁹ Iya dayong gipakigbahin ang iyang lalum nga pagbati sa iyang kasingkasing diha sa usa ka balak, nga sa wala madugay nahimong usa sa atong mga himno, “Does the Journey Seem Long? [Halayo Pa Ba ang Panaw?]” (nu. 127).

Subo lang, si Ethel namatay niadtong 1937. Panahon sa iyang kamatayon, adunay lima ka mga bata ang wala pa maminyo. Si Elder Smith nadasig sa pagpangita og lain nga asawa ug kauban. Niadtong 1938 iyang giminyoan si Jessie Evans Smith sa Salt Lake Temple.

Usa ka tawo kinsa nakaila kaayo kanila misulat: “Bisan pa sa diperensya sa ilang edad nga baynte sais anyos ug sa kalahi sa kinaiya, kaagi ug pagbansay, si Joseph Fielding ug Jessie Evans Smith nagkasinabot ra … Ang butang nga nagsumpay sa dakong kalainan niining duha ka mga personalidad mao ang tinuod nga gugma ug pagtahud sa usag usa.”¹⁰ (Tan-awa sa mga pahina 7–28 sa manwal.)

Si Joseph Fielding Smith inila sa Simbahan isip usa ka batid sa kasulatan [scriptorian] ug eskolar sa ebanghelyo. Sukad pa sa iyang pagkabatan-onan, siya adunay usa ka dili mapugngan nga tinguha sa “[pagpangita sa] pagtulun-an, gani pinaagi sa pagtuon ug usab pinaagi sa hugot nga pagtuo” (D&P 88:118). Kaduha niya nabasa ang Basahon ni Mormon sa wala pa siya mag-10 anyos. Kon ang iyang mga higala mingawon kaniya, siya ilang makit-an sa hayloft nga nagbasa sa mga kasulatan.¹¹

Siya misulti sa kongregasyon mga pipila ka tuig ang milabay “sa unang higayon nga ako makabasa, mas nalipay ko ug dunay dakong katagbawan sa pagtuon sa mga kasulatan … kay sa bisan unsang butang sa tibuok kalibutan.”¹² (Tan-awa sa mga kapitulo 10 ug 18.)

Kausa si President Heber J. Grant (1856–1945) midayeg sa pagka-eskolar ni President Smith pinaagi sa pag-ingon, “Ikaw akong gikonsiderar nga pinakabatid sa kasulatan sa mga General Authority sa simbahan nga anaa kanato.”¹³

Ang iyang kauhaw sa pagkat-on wala magpasabut nga dili siya moapil sa sport ug mga dula isip usa ka batang lalaki o gani isip usa ka hamtong. Malingaw siyang magdula og baseball ug sa daghang mga dula nga dulaon sa mga kabatan-onan nga nagpuyo sa mga umahan. Isip usa ka hamtong siya nahimong maabtik nga handball player ug kanunayng motambong sa mga dula sa sports sa iyang mga anak. Siya usab miapil sa mga sport sa reunion sa pamilya. Mawili kong makahinumdon sa usa ka softball game sa dihang ang akong lolo nakaigo sa bola nga paspas ug diretsong milupad [line drive] nga miigo sa kamera sa usa ka uyoan nga nagkuha og mga litrato gikan sa left field.

Bisan sa wala pa ang iyang calling isip usa ka Apostol, si Joseph Fielding Smith nailhan isip usa ka tigpanalipod sa tinuohan, nga usahay masaypan siya nga strikto nga tawo. Bisan tuod walay puas ang iyang tinguha nga magmatinud-anon sa iyang mga pakigsaad ug sa pag-awhag sa tanan sa pagdawat sa gipahiuli nga ebanghelyo ni Jesukristo, adunay mas mabinationg bahin kaniya nga daling makita sa iyang pamilya ug mga kaubanan. Si President Spencer W. Kimball (1895–1985) miingon: “Kadaghan namong gisulti nga tungod ang Napulog Duha mao ang maghuhukom sa Israel, bisan kinsa kanamo magmalipayon nga siya ang mahimong maghuhukom, kay ang iyang paghukom mabination, maloloy-on, makiangayon ug balaan.”¹⁴

Si President Smith mipakita og ehemplo niining pagkamabination diha sa miting nga gihisgutan ang aksidente sa sakyanan nga gipanag-iya sa Simbahan. Usa ka tigulang nga lalaki nagdrayb sa trak nga kargahanan og mga utanon nga walay insurance maoy hinungdan sa aksidente. Human sa pipila ka diskusyon, girekomendar nga ang Simbahan mopasaka og kaso ngadto sa korte. Apan, misulti si President Smith: “Oo, mahimo nato nang buhaton. Ug kon ato gyud ning tinud-on, mahimo natong kuhaon ang trak niadtong pobre nga tawo; nan unsaon na man niya pagpakabuhi?” Giusab sa committee ang ilang rekomendasyon ug gipasagdaan na lang nila kini.¹⁵

Akong nasinati ang gugma sa uban alang kaniya samtang akong giduol si President Harold B. Lee (1899–1973) sa Salt Lake Cemetery human sa pagpahinungod sa lubnganan ni President Smith. Ako miingon ngadto kaniya, “President Lee, isip sakop sa pamilya gusto nakong ipaabut nimo nga kami mapasalamaton sa pagkamabination nga imong gipakita sa akong lolo. Agi og tubag mitan-aw siya sa akong mata ug malumong miingon, “Gihigugma ko kanang tawhana!”

Ang pangalagad ni President Smith naila nga nagmasulundon sa mando sa kasulatan sa pagsangyaw sa paghinulsol (tan-awa, pananglitan, D&P 6:9; 11:9). Miingon siya: “Misyon ko kini, nadasig kaayo niini, nagtuo ko, nga pinaagi sa Espiritu sa Ginoo sa akong pag-adto sa mga stake sa Zion, sa pagsulti sa mga tawo nga karon ang adlaw sa paghinulsol ug pagtawag sa mga Santos sa Ulahing mga Adlaw sa paghinumdom sa ilang mga pakigsaad, … nagdasig kanila nga magmatinuoron ug magmatinud-anon sa tanang butang.”¹⁶ (Tan-awa sa kapitulo 5.)

Hapit sa tibuok niyang 96 ka tuig sa kinabuhi, si President Smith nag-ampo nga siya magpabilin nga matinuoron ug matinud-anon ug molahutay hangtud sa katapusan. Sa pagkatinuod, si President Boyd K. Packer, President sa Korum sa Napulog Duha ka mga Apostoles karon, nakaobserbar: “Bisan kon siya lapas na nuybenta siya padayong nag-ampo nga iyang “matuman ang iyang mga pakigsaad ug mga obligasyon ug molahutay hangtud sa katapusan.’”¹⁷

Alang ni President Smith, ang “magmatinuoron ug magmatinud-anon” sobra pa sa pulong nga gibalik-balik. Kini kinasingkasing nga pahayag sa iyang paglaum alang sa tanang katawhan—alang sa mga miyembro sa Simbahan kinsa nakahimo og mga pakigsaad ug tinuoray alang sa tanang mga anak sa atong Amahan sa Langit. “Kinahanglan kita una ug labaw sa tanan, …” mihangyo si President Smith, “alang sa gingharian sa Dios ug sa Iyang pagkamatarung. Kita magmatinuoron ug magmatinud-anon kanunay, uban sa tinguha nga sundon ang mga sugo sa Ginoo ug mopasidungog Kaniya ug mohinumdom sa mga pakigsaad nga atong gihimo Kaniya. Kini akong pag-ampo alang sa tanang Israel.”¹⁸ (Tan-awa sa kapitulo 19–22.)

Samtang kamo mainampoong mamalandong sa iyang dinasig nga mga pagtulun-an, ang inyong pagpamatuod malig-on ug kamo mapanalanginan og dugang pagsabut sa mga putli ug yano nga kamatuoran sa ebanghelyo ni Jesukristo. Kini nga tun-anan makadugang sa inyong tinguha nga magpakabuhi nga “magmatinuoron ug magmatinud-anon.”