Duol ngadto kang Kristo
Batan-ong mga lalaki sa Aaronic Priesthood, karong tuiga ang tema sa atong Mutual modasig kaninyo sa paghunahuna sa inyong relasyon ngadto ni Jesukristo, atong Manluluwas ug Manunubos, ug unsaon ninyo nga mahisama Kaniya. Ang atong tema mao ang “Duol ngadto kang Kristo, ug paghingpit diha kaniya, ug ilimud ang inyong mga kaugalingon sa tanan nga dili diosnon” (Moroni 10:32).
Kini balaan nga pagdapit nga maduol ngadto sa Anak sa Dios. Tungod sa Iyang Pag-ula, kita makaangkon sa gahum sa pagserbisyo, sa paglimud sa atong kaugalingon sa dili diosnon nga mga butang sa atong kinabuhi, ug mobati sa Iyang mahangturong gugma. Samtang ato kining buhaton, kita makakaplag og tinuod nga kalinaw ug kalipay.
Samtang kamo mobuhat sa imbitasyon sa pagduol ngadto kang Kristo, inyong masabtan usab ang inyong sagrado nga katungdanan nga “magdapit sa tanan sa pagduol ngadto kang Kristo” (D&P 20:59). Ang inyong kasingkasing mapuno uban sa tinguha nga mogiya sa uban sa pagduol Kaniya aron sila makadawat sa samang mga panalangin nga inyong nadawat ug padayon nga madawat.
Usa ka batan-ong lalaki, si Michael, nakatuman niining katungdanan pinaagi sa pagtabang ni Jose, usa ka higala sa eskwelahan.
Usa ka adlaw, si Jose nangutana kaniya, “Michael, nganong kanunay ka malipayon?”
Si Michael miingon, “Tungod kay nagserbisyo ko.”
“Nganong nagserbisyo ka?”
“Tungod kay naghupot ko sa priesthood ug ako kining katungdanan,” mao ang tubag.
Si Jose miingon, “Gusto ko nga mas masayud sa priesthood.”
Gidapit ni Michael si Jose ngadto sa mga kalihokan sa Simbahan ug sa wala madugay ngadto sa mga miting sa Simbahan. Sa katapusan si Jose ug ang iyang pamilya gitudloan sa mga misyonaryo ug nabunyagan. Si Jose miingon, “Ang misyonaryo nga buhat mao ang pundasyon sa atong Simbahan. Kon kita makiangayon ug matarung sa atong inadlaw-adlaw nga pakigsandurot, nan kadtong naglibut kanato makamatikod ug mangutana nato sama sa akong gibuhat. Si Michael usa ka instrumento diha sa dakong plano sa Dios.”
Samtang kamo magkaduol sa Ginoo, kamo makabaton og tinguha sa pagserbisyo sa uban sama sa gibuhat ni Michael. Ug kon inyo kining buhaton, kamo makasinati niining saad gikan ni President Henry B. Eyring, Unang Magtatambag sa Unang Kapangulohan, nga matinuod: “Kon kinasingkasing kamong modapit sa mga tawo sa pagduol ngadto kang Kristo, ang inyong kasingkasing mausab. Kamo mohimo sa Iyang buhat alang Kaniya. Inyong makita nga Siya motuman sa Iyang saad nga mahimong usa diha kaninyo sa inyong pagserbisyo. Kamo mahimong makaila Kaniya. Ug ngadto-ngadto mahimo kamong mahisama Kaniya ug ‘mahimo nga hingpit diha kaniya.’”2
Kana mao ang kahulugan sa tema karong tuiga.