Kamo Giimbitar
Kinsay dili ganahan nga makadawat og imbitasyon? Kon kita makadawat og imbitasyon sa pagtambong og birthday party o salo-salo sa kasal, kita malipay nga makigsaulog sa uban sa importanting mga hitabo sa ilang mga kinabuhi. Ang tema sa Mutual sa 2014 naglangkob og usa ka malipayong imbitasyon nga adunay mahangturong importansya: “Duol ngadto kang Kristo, ug paghingpit diha kaniya, ug ilimud ang inyong mga kaugalingon sa tanan nga dili diosnon” (Moroni 10:32).
Daghang imbitasyon kinahanglang tubagon—usa ka RSVP—aron ipakita kon ato kining gidawat o wala. Nakatubag na ba kamo niining sama nga imbitasyon sa inyong kinabuhi? Ang pagduol ngadto kang Kristo nagpasabut nga atong tumanon ang sagradong pakigsaad sa bunyag. Kini nagpasabut nga atong gidawat si Jesukristo isip atong personal nga Manluluwas ug Manunubos. Kini nagpasabut nga atong giila ug nagtuo sa gitudlo ni Alma ngadto sa iyang anak nga si Shiblon: “Walay lain nga paagi o mga pamaagi diin ang tawo maluwas, diha lamang ug pinaagi ni Kristo” (Alma 38:9). Ang pagdawat niining imbitasyon nagpasabut nga kita mipasalig sa pagsunod sa hingpit nga ehemplo ni Kristo pinaagi sa pagpuyo og mahiyason ug gipahinungod nga kinabuhi ug pinaagi sa paghigugma ug pagserbisyo sa uban.
Kini nga imbitasyon dili lang kausa nga mahitabo; kini usa ka proseso. Kita giimbitar sa pagsunod sa dalan nga mogiya kanato padulong sa templo, diin kita mohimo og dugang mga pakigsaad ngadto sa atong Amahan sa Langit ug mopahigayon sa mga ordinansa nga importante sa atong kahimayaan. Kini nga dalan mahimong naglakip sa pag-misyon. Kini naglakip nga maminyo diha sa templo ug mahimong matarung nga mga tawo sa gingharian sa Dios. Kini nagpasabut usab sa paglahutay hangtud sa katapusan. Sama sa gisulat sa imbitasyon, kon kita moduol ngadto kang Kristo, kita mahingpit diha Kaniya. Si Kristo mihimong posible nga magpabilin sa dalan sa pakigsaad pinaagi sa hugot nga pagtuo diha Kaniya ug sa paghinulsol. Kining proseso nga mahimong hingpit magsugod karon; ang Pag-ula ni Kristo nakapaposible niini.
Kini nga imbitasyon naghangyo kanato sa pagsalikway sa tanang dili diosnon—mahimong malahi sa mga uso, mga sumbanan, ug mga praktis sa kalibutan. Kita giimbitar nga “mosalikway sa mga butang niini nga kalibutan, ug pangitaa ang mga butang nga maayo” (D&P 25:10). Kami mopamatuod nga ang pagdawat sa imbitasyon sa “[pag]duol ngadto kang Kristo ug paghingpit” makahatag og kalipay niining kinabuhia ug sa kinabuhing dayon sa umaabut nga kalibutan. Giimbitar kamo sa pagtubag karon!