Family History Naghiusa sa mga Pamilya

Akong nasugatan ang usa ka tumong sa Personal nga Kauswagan nga midasig nako sa pagsugod sa akong family tree. Matag higayon nga moadto ko sa akong mga apohan alang sa paniudto, sila moistorya nako sa ilang mga kinabuhi ug sa akong ubang mga paryente. Misugod ko sa pag-adto sa family history center ug nangolekta og impormasyon mahitungod sa akong pamilya.

Nakahinumdom ko sa dihang nakakita ko og impormasyon mahitungod sa apohan sa akong apohan sa tuhod. Samtang nagmabdos, miadto siya sa Argentina sakay sa barko. Atol sa paglawig, iyang gilubong ang iyang anak sa dagat. Usa ra siya ka istorya hangtud akong nakita ang iyang ngalan sa usa ka rekord. Mas nasuod nako ang akong mga apohan, ug akong nailhan ang akong mga katigulangan ingon og nagpuyo ako uban nila. Nakakita ko og impormasyon mahitungod sa akong mga katigulangan, mipakigbahin sa maayong balita sa mahangturong pagkabugkos, ug mitabang sa pagpanalangin sa daghang mga henerasyon.

Nagpadayon ko sa pagpangita sa natago nga mga bahandi salamat sa FamilySearch. Ganahan ko sa gisulti ni President Thomas S. Monson: “Ako mopamatuod nga kon kita mobuhat sa tanan natong mahimo sa pagtuman sa buhat nga anaa sa atong atubangan, ang Ginoo mohatag nato sa sagrado nga mga yawe nga gikinahanglan sa pag-abli sa mga bahandi nga atong gipangita.”¹ Pinaagi sa atong mga paningkamot, kita makadiskobre sa mga yawe sa atong mahangturon nga mga bahandi, ug moabut ang adlaw nga atong mahimamat ang atong mga katigulangan sa linawas.