2014
Kinsa ang Gusto nga Mag-ampo?
Enero 2014


Kinsa ang Gusto nga Mag-ampo?

Jarrel M., Philippines

Sa akong misyon, ang akong kompanyon ug ako mitudlo sa usa ka pamilya nga dunay daghang mga anak. Atol sa usa ka higayon sa among pagplano, nag-ampo ug gihisgutan namo unsa nga leksyon ang among itudlo sa mga bata sa sunod, ug nagkauyon mi sa pagtudlo mahitungod sa pag-ampo.

Sa dihang miadto kami sa ilang balay, ang lola ug ang mga bata naghinam-hinam na. Gisugdan namo ang leksyon sa usa ka pag-ampo. Hilom ang mga bata ug andam na nga maminaw. Gipasabut namo sila kon unsaon ug nganong mag-ampo. Sa pagtapos sa among leksyon, nangutana mi, “Kinsa ang gusto nga mohatag og panapos nga pag-ampo?” Silang tanan gustong mag-ampo! Mao nga giiskedyul namo sila nga mohatag sa pag-ampo matag higayon nga kami moanha sa pagtudlo sa leksyon. Gidapit usab sila namo nga mag-ampo kon kami wala diha.

Human niana nga leksyon, ako naghunahuna, “Nganong ang gagmayng mga bata sayonan nga mag-ampo samtang ang among mas magulang nga mga investigator mas maglisud mag-ampo?” Nakita nako ang tubag sa Bible Dictionary: “Samtang kita makat-on sa tinuod nga relasyon ngadto sa Dios (ang Dios atong Amahan, ug kita Iyang mga anak), diha-diha dayon ang pag-ampo mahimong natural ug kinaiyanhon sa atong bahin (Mat. 7:7–11). Daghang gitawag nga mga kalisud sa pag-ampo moabut tungod sa pagkalimot niini nga relasyon” (“Prayer”, tan-awa usab sa Giya ngadto sa mga Kasulatan, “Pag-ampo” scriptures.lds.org).

Gikan niana nga panahon, ako naningkamot sa pagtabang sa mga tawo nga makasabut sa ilang tinuod nga relasyon sa atong Amahan sa Langit. Ang atong Amahan sa Langit gusto nga makig-istorya sa Iyang mga anak, sama sa atong yutan-ong mga ginikanan nga gustong makig-istorya nato. Siya nahigugma nato, Siya gusto nga makig-istorya nato, ug gusto Siya nga makig-istorya kita Kaniya.