Unsay akong buhaton kon ako pugson sa pagsupak sa mga sumbanan sa Simbahan sa ubang kabatan-onan kinsa aktibo usab nga mga miyembro sa Simbahan? Dili ko gustong makita nga nagtan-aw ko sa akong kaugalingon nga mas matarung kay sa uban.

Pagbaton og kaisug sa pagbarug sa mga sumbanan sa Simbahan, bisan kon ang pagpamugos nagagikan sa ubang kabatan-onan nga mga Santos sa Ulahing mga Adlaw kinsa nasayud sa mga sumbanan ug kinsa tingali naghunahuna nga kamo nagtan-aw sa inyong kaugalingon nga mas matarung kay sa uban. Hain ang mas dunay dakong risgo: ang pagsupak sa mga sugo sa Ginoo o ang pagtan-aw sa kaedad nga nagpabuotan-buotan mo? (Karon, kon sila mamugos ninyo sa pagbuhat og usa ka butang nga personal nga dili makakomportable o makasupak sa sumbanan sa inyong pamilya kay sa Simbahan, mahimo gihapon mobarug kamo alang sa inyong kaugalingon pinaagi sa yanong pag-ingon nga dili kamo gusto nga mobuhat niini ug sa paghangyo nila sa pagtahud sa inyong mga pagbati.)

Siyempre, kinahanglan nga maningkamot kamong mabuot nga moatubang sa sitwasyon. Sama sa gisulti ni propetang Alma sa iyang misyonaryong anak nga si Shiblon, “Gamita ang imong kaisug, apan dili ang pagpalabi-labi” (Alma 38:12). Wala kinahanglana ang mapintas nga panghimaraut o arogante nga kinaiya. Kamo mahimong mopahibalo lang sa mga tawo kon unsa nga mga sumbanan ang inyong gipili nga sundon. Ug kon ang aktibong mga miyembro sa Simbahan magsugo ninyo sa pagsupak sa klaro nga mga sumbanan sa Simbahan, hinumdumi ang gisulti ni President Dieter F. Uchtdorf, Ikaduhang Magtatambag sa Unang Kapangulohan: “Higalaa ang tanan, apan ayaw ipaubos ang inyong mga sumbanan.”¹