Ang batan-ong mga lalaki ba kinahanglang moserbisyo og misyon inig 18 nila? Ug ang mga batan-ong babaye mas kusganon ba nga giawhag sa pagserbisyo og misyon karon nga sila makaadto sa edad nga 19?

Sa dihang si President Thomas S. Monson mipahibalo sa kausaban sa edad nga mahimo na nga magmisyon, siya miingon, “Ako wala mosugyot nga tanang batan-ong lalaki — kinahanglang — moserbisyo sa mas sayo nga pangidaron. Apan, basi sa indibidwal nga mga kahimtang ingon man sumala sa pagdeterminar sa mga lider sa priesthood, kini nga opsyon mahimo na”¹ Ikonsiderar ang inyong pisikal ug emosyonal nga kahimsog, pinansyal nga pagpangandam, ug espirituhanong pagpangandam. Kamo makigtambag sa mga ginikanan ug mga lider sa priesthood mahitungod niini nga mga butang kon mohukom sa husto nga panahon sa pagserbisyo.

Kabahin sa batan-ong mga babaye, si President Monson miingon, “Batan-ong mga babaye … dili ubos sa samang sugo sa pagserbisyo sama sa batan-ong mga lalaki. Kami nagsiguro hinoon sa batan-ong mga sister sa Simbahan, nga sila nakahatag og bililhong kontribusyon isip mga misyonaryo, ug among dawaton ang ilang serbisyo”²