Pagpalambo og Espirituhanong Gahum diha sa mga Korum sa Priesthood
Ang Ginoo nagpanalangin nato og mga korum sa priesthood aron sa pagtudlo nato nga “ang [atong] kasingkasing mobati nga magkahiusa ug mohigugma sa usag usa.”
Kaniadto si Elder Paul V. Johnson sa Seventy, uban sa iyang asawa, nagserbisyo sa Area Presidency sa Chile. Usa ka Biyernes kinahanglan niyang mobiyahe og 900 ka milya (1,450 km) gikan sa ilang balay sa Santiago aron sa pagtawag og bag-ong kapangulohan sa stake.
Sa iyang pag-abut sa dapit pagka-Biyernes sa gabii, siya gitawagan diha sa telepono nga ang iyang asawa na-ospital. Sa dihang nagkaistorya sila ni Sister Johnson, siya iyang gipasabut nga siya nahulog sa hagdanan ug nabuak ang iyang tuway-tuway. Gipaniguro ni Sister Johnson nga siya giatiman ug sa Lunes o Martes pa operahan, iyang giawhag si Elder Johnson nga humanon ang iyang buluhaton sa pagtawag sa bag-ong kapangulohan sa stake ug sa pagdumala sa stake conference.
Nahupay sa mga pulong ni Sister Johnson, diha-diha dayon mi-email si Elder Johnson ngadto sa iyang lider sa korum sa Siyudad sa Salt Lake sa pag-report sa sitwasyon. Dayon mihimo siya sa mga plano sa pagpadayon sa iyang buluhaton. Adunay leksyon nga makat-unan sa iyang tubag: una, siya mireport sa sitwasyon ngadto sa iyang lider sa korum, ug dayon mipadayon siya sa iyang buluhaton.
Ang mga Korum sa Seventy giorganisar sa paagi nga ang matag miyembro adunay piho nga responsibilidad ngadto sa uban, lakip ang malumong pag-amuma sa emeritus nga mga sakop sa korum. Tungod sa mga buluhaton sa tibuok kalibutan, kasagaran ang mga miyembro sa korum dili makaduaw sa tawo; bisan pa niana, sila magkinontakay gamit ang telepono, email, text, ug uban pang elektronik nga mga himan. Ang matag miyembro gihangyo sa pagpahibalo sa iyang lider sa korum diha-diha dayon sa bisan unsang importante nga mga kausaban sa personal o mga kahimtang sa pamilya, nga mao gyud ang gibuhat ni Elder Johnson.
Sa kaso ni Elder Johnson, ang iyang lider sa priesthood mao si Elder Claudio R. M. Costa, nga kaniadto nagserbisyo isip sakop sa Presidency sa Seventy. Gitawagan ni Elder Costa si Elder Johnson pagkasunod buntag samtang si Elder Johnson nag-interbyu sa lokal nga mga lider. Si Elder Costa mibati nga si Elder Johnson kinahanglang mopauli apan naminaw og maayo samtang gipasabut siya ni Elder Johnson nga ang iyang asawa maayo ra ug iyang mahuman ang pag-organisar og usab sa stake. Si Elder Costa miingon kang Elder Johnson nga magpadayon siya samtang aduna siyay susihon.
Duha ka oras ang milabay gitawagan ni Elder Costa si Elder Johnson ug miingon kaniya nga siya nakigsulti sa mga lider sa korum kabahin sa sitwasyon ug sila mibati nga siya kinahanglang makauban ni Sister Johnson. Gisultihan si Elder Johnson nga may giandam nang tiket sa airport ug padulong na si Elder Carlos H. Amado aron tiwason ang pag-organisar og usab sa kapangulohan sa stake.
Sa dihang miabut si Elder Johnson sa ospital, iyang nakita iyang asawa sa hilabihan nga kasakit. Nakadugang sa iyang kasakit mao nga dili siya makasulti sa pinulongan sa mga kawani sa medikal nga naglibut kaniya. Kinahanglan niya iyang bana. Ang dinasig, inigsoonay nga kabalaka sa iyang mga lider sa korum nakapadala ni Elder Johnson sa iyang kiliran.
“Mibati ko nga giatiman niining korum,” miingon si Elder Johnson, “ug may kusog kaayo nga pagtuo ug pwersa sa luyo nianang pag-atiman. Tinuoray nakong gibati nga kabahin sa usa ka korum. Sa akong hunahuna kon ako tawagon ngadto sa kapangulohan sa elders quorum, ako mahimong mas maayo nga presidente tungod niini nga kasinatian.”
Mouyon ko. Ang panaghiusa ug gugma nga akong nakita diha sa akong kaigsoonan magsilbi nga panig-ingnan sa tanang mga korum sa priesthood. Kon kana nga panig-ingnan sundon, ang mga korum ug miyembro sa tibuok Simbahan mapanalanginan og maayo.
Ang Tinubdan sa Kalig-on sa usa ka Korum
Adunay dakong gahum sa mga korum sa Aaronic ug Melchizedek Priesthood—o mahimong maanaa! Kini nga gahum nagagikan sa awtoridad nga hinatag sa Dios sa paglihok diha sa Iyang ngalan ug maanaa sa mga pagpamatuod, kalig-on, ug tibuok kalag nga debosyon sa indibidwal nga mga miyembro.
Ang resulta talagsaon kaayo: ang mga miyembro sa korum ug ang ilang mga pamilya mas malig-on sa espirituhanon nga paagi, mas siguro sa personal nga paagi, ug mas epektibo nga mga disipulo ni Jesukristo. Akong nakita ang epekto niini nga kadasig nga nag-umol og lig-on kaayong panag-igsoonay nga dili nako makita sa gawas sa Simbahan sa Ginoo.
Napahinumduman ako sa ideya ni Presidente Henry B. Eyring, Unang Magtatambag sa Unang Kapangulohan, kausa nga gipakigbahin. Siya miingon: “Akong nakat-unan sulod sa mga katuigan nga ang kalig-on sa usa ka korum wala naggikan sa gidaghanon sa mga naghupot sa priesthood nga sakop niana. Ni kini diha-diha moabut gikan sa pangidaron ug kahingkuron sa mga sakop. Hinoon, ang kalig-on sa korum naggikan sa kinabag-an kon unsa ka hingpit naghiusa ang iyang mga sakop diha sa pagkamatarung.”1
Kon ang mga miyembro sa korum maghiusa diha sa pagkamatarung, ang gahum sa langit dili mapugngang modagayday ngadto sa ilang kinabuhi ug mapalambo diha sa serbisyo nga ilang gibuhat sa usag usa, ngadto sa ilang mga pamilya, sa Simbahan, ug ngadto sa mga komunidad diin sila nagpuyo.
Setenta y sais ka tuig ang milabay, si Elder Stephen L. Richards, nga kaniadto sakop sa Korum sa Napulog Duha ka mga Apostoles, mihulagway sa korum nga “una, usa ka klase; ikaduha, usa ka panag-igsoonay; ug ikatulo, usa ka unit sa pagserbisyo.”2 Kana nga walay paglubad nga kahulugan gamhanang gihulagway sa mga Korum sa Seventy.
Ang Korum isip Klase
Matag semana ang mga sakop sa Seventy kinsa nagpuyo sa Siyudad sa Salt Lake magpundok sa usa ka miting sa korum sa punoang buhatan sa Simbahan. Didto magpuli-puli sila sa pagtudlo sa doktrina sa Simbahan, mga pamaagi, ug polisiya sumala sa ika-88 nga seksyon sa Doktrina ug mga Pakigsaad: “Pagtudlo diha sa inyong mga kaugalingon og usa ka magtutudlo, ug dili ang tanan magdungan sa pagpamulong; apan himoa nga ang usa mamulong sa tagsa-tagsa ka higayon ug himoa nga ang tanan maminaw ngadto sa iyang mga gipamulong, nga sa diha nga ang tanan mahuman sa pagpamulong nga ang tanan unta mahatagan og kaayohan sa tanan” (D&P 88:122).
Kini nga mga miting mao ang bililhong mga kasinatian diin ang inspirasyon moabut ug ang panag-igsoonay malig-on. Ang diwa sa panag-uban ug pagbati sa pagsuporta sa usag usa ug paghigugma mopuno niini nga mga miting. Tungod kay dili tanang mga sakop sa Seventy makatambong, ang mga miting girekord ug maanaa sa Internet alang sa mga sakop nga nagserbisyo layo sa punoang buhatan sa Simbahan.
Ang akong kauban sa korum nga si Elder Don R. Clarke naghulagway niining mga miting nga “espirituhanong mga pagbusog sa doktrina ug paggamit.” Sa dihang nagserbisyo siya sa internasyonal nga Area Presidency, siya miingon, “Kami naghinam-hinam sa pagribyu [sa mga video] matag semana sa among sinemana nga miting sa Area Presidency. May mga higayon nga ang hilisgutan mao gyud ang among kinahanglang masayran.”
Salamat niining girekord nga mga miting sa korum ug sa pag-amuma nga nabati sa Seventy ug ilang mga pamilya gikan sa mga lider sa Simbahan ug sa ilang kaigsoonan sa korum, “kami wala gayud mobati nga pinasagdaan,” si Elder Kevin R. Duncan miingon. “Bisan asa sa kalibutan mi moserbisyo, dili gyud mi mobati nga nag-inusara.”
Kon ang tanan nga mga miyembro sa korum sa Aaronic o Melchizedek Priesthood moapil, molambo ang kalig-on ug diwa sa panag-igsoonay samtang ang mga sakop sa korum magtudlo ug makigbahin og daghang ideya. Daghang korum adunay daghang mga magtutudlo, nga maayo nga buhat.
Ang mga lider sa korum sa tibuok Simbahan makasunod sa ehemplo sa Seventy. Alang niadtong dili makatambong sa mga miting sa korum, pangita og mga pamaagi sa pagpaapil nila. Hunahunaa unsa ang epekto sa usa ka tawag diha sa telepono ngadto sa usa ka high priest kinsa anaa na lang sa balay o sa usa ka pasilidad sa pag-atiman. Dili ba siya makadayeg sa tawag gikan sa iyang kaigsoonan sa korum kon unsa ang gihisgutan sa ilang miting sa korum? Ang teknolohiya makapasayon sa pagpakigbahin.
Ang Korum isip usa ka Panag-igsoonay
Ang mga miting sa korum mapalambo usab pinaagi sa mga agenda nga nag-focus sa mahinungdanong mga butang. Sa kanunay ang mga kalihokan ug pahibalo sa korum mohurot sa oras nga unta mas magamit sa pag-amuma ug paglig-on sa panag-igsoonay. Ang epektibong agenda sa korum mo-focus sa tulo ka aspeto nga gihisgutan ni Elder Richards sa iyang pagpasabut—klase, panag-igsoonay; ug pagserbisyo.
Sa among korum kami mopakigbahin sa nahisgutan sa miting ug mga pahibalo pinaagi sa email. Sa among mga miting sa presidency ang una namong hisgutanan mao ang kaayohan sa mga miyembro sa korum. Mangutana mi kon kinsa ang nanginahanglan. Kami mag-ampo nga isulti ang mga ngalan sa sakop sa korum—nag-serbisyo ug na-release—ilang mga anak, ug ilang mga apo. Kasagaran ang among agenda gipahiangay kon unsay among mahimo aron makatabang.
Ang mga kalihokan sa korum ug mga buluhaton sa pagserbisyo nagkinahanglan og pagtagad, apan ang maalamong mga lider sa korum mogahin lang og gamayng oras sa petsa ug mga pahibalo (ipadala kini sa email, o isulat kini sa usa ka handout) ug mas daghang panahon sa doktrina, sa paglig-on sa panag-igsoonay, ug sa paagi nga ang korum makatabang sa uban.
Isip panag-igsoonay, walay sama ang mga korum sa priesthood sa tibuok kalibutan. Mga tuig ang milabay si Presidente Boyd K. Packer, Presidente sa Korum sa Napulog Duha ka mga Apostoles, mipasabut nga “sa karaang kapanahunan kon ang usa ka tawo gitudlo ngadto sa pinili nga pundok, ang iyang buluhaton, kanunay nasulat sa Latin, naglatid sa responsibilidad sa organisasyon, nagpasabut kon kinsa ang angay nga mga sakop, ug dayon kanunay anaa ang mga pulong: quorum vos unum, nagpasabut nga ‘kang kinsa kami buot nga kamo magkahiusa.’”3
Walay mas maayong makapahiusa sa kasingkasing sa tawo kaysa Espiritu sa Dios. Ubos sa impluwensya sa Espiritu, gidasig sa pagkamatarung sa mga sakop sa korum ug sa diwa sa kabalaka sa usag usa, ang mga korum mahimong tinubdan sa talagsaong espirituhanong gahum alang sa mga sakop sa korum ug sa ilang mga pamilya, ingon man usab sa uban nga ilang giserbisyuhan.
Dugang pa, ang sosyal nga inter-aksyon importante. Ang lig-on nga korum panagsa magtigom sa sosyal nga mga kalihokan nga naghatag og mga oportunidad alang sa mga miyembro sa korum ug sa ilang mga pamilya nga makig-interact sa relaks, makalingaw nga paagi. Ang panag-uban importante nga bahin sa pagpalambo ug pagmentinar sa relasyon sa panag-igsoonay.
Ang Korum isip usa ka Unit sa Serbisyo
Sa daghang paagi ang panag-inigsoonay sa korum sa priesthood modasig nga moserbisyo ang korum. Ang mga korum sa priesthood, nagkahiusa sa diwa sa panag-igsoonay ug gugma, makahimo og mga milagro.
Usab makahunahuna ko ni Elder Paul ug Sister Jill Johnson. Sila nakasinati og daghang lisud nga mga hagit sa pamilya. Sila adunay usa ka anak nga babaye ug batan-ong apo nga lalaki kinsa nanlimbasug sa kanser. Niining duha ka sitwasyon ang mga pag-ampo ug pagpuasa sa mga sakop sa korum ni Elder Johnson nakahimo og milagrosong kalainan.
Ang Simbahan ug ang mga komunidad diin anaa ang mga unit sa Simbahan kadaghan napanalanginan sa matinud-anong pagserbisyo sa mga korum sa priesthood. Kana nga serbisyo nahimong gamhanan kon ang mga sakop sa korum mohiusa sa ilang kalig-on sa katarung, sama sa gugma ni Kristo.
Sa kanunay akong naobserbahan nga ang kalig-on ug gugma moabut nga may dakong sakripisyo, nga nasinati gayud sa mga asawa sa Seventy. Daghang katuigan ang milabay mibisita ko ni Elder Claudio ug Sister Margareth Costa samtang nagserbisyo sila sa Bogotá, Colombia. Human sa panihapon ang mga Costa nakig-istorya sa ilang mga apo gamit ang internet. Samtang gihubad ni Elder Costa alang nako ang ilang pag-istoryahanay, akong nasayran nga ang mga apo nagtawag ni Sister Costa isip “Computer Grandma.” Sa pagtapos sa pag-istoryahanay, duha ka mga apo nga nag-edad og duha ug upat migakos sa monitor sa computer, sama nga ilang gigakos si Sister Costa. Pagkahuman giingnan ko ni Sister Costa nga kadtong mga apo naghunahuna nga siya ug si Elder Costa nagpuyo sulod sa computer.
Ang mahilayo sa mga anak ug mga apo atol sa importanting mga hitabo lisud para sa mga inahan ug mga lola. Apan, sila nagserbisyo tungod kay sila nahigugma sa Ginoo ug mibati nga kabahin gyud sila sa calling sa ilang bana.
“Ang among mga asawa nakatabang sa makahuluganong paagi,” nakaobserbar si Elder Duncan. “Wala lang sila mosuporta sa ilang mga bana sa bug-at nga mga palas-anon nga ilang giabaga, apan sila usab nakig-interact sa mga miyembro ug mga lider sa tibuok kalibutan sa makapadasig nga mga paagi. Ang among mga asawa mao ang tinuod nga mga ehemplo sa malipayong pagpahinungod.”
Kana nga matang sa panaghiusa tali sa mga Seventy ug sa ilang mga asawa adunay dakong gahum. Nakahinumdom ko sa buluhaton didto sa Japan ug nagbiyahe sa mga dakbayan uban ni Elder Yoon Hwan ug Sister Bon Choi, nagserbisyo kaniadto sa Asia North Area Presidency. Nasayud ko sa problema sa ilang nasud sa Korea, ug ako kining gihisgutan. Human sa gamayng awhag, si Sister Choi misulti nako sa kagrabe sa problema. Dayon siya mihatag og mga sugyot nga nakatabang kaayo sa pagpangita og solusyon.
Si Presidente Thomas S. Monson mipahinumdom kanato, “Mga kaigsoonan, ang kalibutan nagkinahanglan sa inyong tabang. May mga tiil nga kinahanglang tabangan, mga kamot nga alalayan, mga panghunahuna nga awhagon, mga kasingkasing nga dasigon, ug mga kalag nga luwason. Ang mga panalangin sa kahangturan nagpaabut kaninyo. Anaa kaninyo ang pribilehiyo nga dili lang magtan-aw apan mga partisipante sa pagserbisyo diha sa priesthood.”4
Sa pagkatinuod, ang tinuoray nga panag-igsoonay sukdanan sa pagkadiosnon. Kon kita mas nagkaduol nianang sulundon, mas nagkaduol kita sa kabalaan. Nagkahiusa gayud ang Amahan, ang Anak, ug ang Espiritu Santo diha sa gugma, sa espirituhanon nga gahum, ug sa kahibalo nga ang kasulatan nagpasabut Kanila nga usa (tan-awa sa Juan 17:21–23; 2 Nephi 31:21; 3 Nephi 11:27, 36). Ang Ginoo nagpanalangin kanato og mga korum sa priesthood aron sa pagtudlo nato sa matang sa panaghiusa nga malumong gihulagway diha sa basahon ni Mosiah: “ang ilang mga kasingkasing nabugkos diha sa pagkahiusa ug diha sa gugma sa usag usa” (Mosiah 18:21).
Akong pag-ampo nga ang matag lider sa korum ug mga miyembro motabang sa matag brother ug masayud sa panginahanglan niya ug sa iyang pamilya. Ang pagpili og usa ka Dominggo matag bulan aron mainampoong maghisgot diha sa mga miting sa korum makatabang sa pagtuman niining importanting buhat. Uban sa kahibalo sa panginahanglan, ang mga sakop sa korum makakita og mga paagi sa pagpanalangin og mga kinabuhi ug mas abundang moambit sa mga gahum sa langit, sa ingon makadugang sa espirituhanong gahum sa mga korum sa priesthood.