Ang Langitnong Amahan Adunay Plano alang sa Iyang mga Anak

Si Oliver nakapanimaho sa giluto ni Lola nga brownies, ug dihay usa ka pagbati sa balaan nga pagtahud sa balay ni Lola ug Lolo. Si Oliver nagpaabut niining espesyal nga family home evening tibuok adlaw.

“Ang atong leksyon mahitungod sa plano sa kalipay nga gihimo sa Langitnong Amahan alang natong tanan,” miingon si Lolo. “Karong gabii ang kusina magrepresentar sa langit, diin kita nagpuyo uban sa Langitnong Amahan sa wala pa kita moanhi aron mopuyo sa yuta,” siya miingon.

“Didto ba ako, Lolo?” nangutana si Archie. Mitan-aw si Oliver libut sa kwarto nila Lola ug Lolo, ni Mama ug Papa, ug sa iyang mga manghud nga lalaki, Archie ug si Ethan.

“Oo,” miingon si Lolo “Didto kitang tanan. Ug sa dihang ang Langitnong Amahan misulti nato mahitungod sa Iyang plano nga magbuhat og kalibutan ug magpadala og Manluluwas alang nato, kita nalipay kaayo nga misinggit kita sa kalipay.”

Si Archie ug si Ethan mikatawa ug nag-ambak-ambak.

“Kinsa ang unang tawo sa atong pamilya ang mibiya sa langit ug mianhi sa kalibutan?” Nangutana si Lolo.

“Ikaw,” miingon si Oliver.

Si Lolo mibiya sa kusina. Sunod si Lola ang mibiya. Dayon tagsa-tagsa sa matag sakop sa pamilya ni Oliver miapil nila sa kwarto.

“Kini nga kwarto magrepresentar sa kalibutan,” miingon si Lola. “Unsa ang pipila ka mga butang nga mabuhat nato dinhi aron sa pagtabang nato nga makabalik sa Langitnong Amahan?” nangutana siya.

“Magpabunyag,” miingon si Oliver.

“Moadto sa templo,” miingon si Mama.

“Mopili sa matarung,” miingon Archie.

Mitando si Lola ug mipahiyom. Dayon siya miingon nga panahon na nga mobiya sa kalibutan ug mobalik-balik ngadto sa Langitnong Amahan.

“Akoy una, miingon si Lolo.

“Oh, Lolo ayaw pagbiya!” Miingon si Ethan.

“Ayaw kabalaka,” miingon si Lolo. “Ang pagbiya sa kalibutan kabahin sa plano sa Langitnong Amahan sa kalipay. Sa dili madugay magkahiusa ra kita pag-usab.”

Tagsa-tagsa, ang tanan mibalik ngadto sa kusina. “Kitang tanan nahibalik na sa langit!” Miingon si papa samtang si Archie ug Ethan midagan paingon kaniya.

Mibati si Oliver og kalipay sa pagkakita sa iyang pamilya ingon og nalayo siya kanila sa dugayng panahon. Midagan siya aron gakson ang iyang mga igsoong lalaki ug sila si Mama ug Papa. Karon siya nakasabut nganong gitawag kini ni Lolo nga plano sa Langitnong Amahan sa kalipay.