2014
Noe
Pebrero 2014


Ang mga Propeta sa Daang Tugon

Noe

“Nagbarug [si Noe] nga may awtoridad sunod ni Adan diha sa Priesthood; gitawag siya sa Dios niini nga katungdanan, ug mao ang amahan tanang buhi sa iyang panahon.”1—Propeta Joseph Smith

Ginganlan ko sa akong amahan og Noe, nga nagpasabut og “kapahulayan”, tungod kay siya mituo nga ako makahatag og kahupayan sa akong pamilya. Nagpuyo ko atol sa panahon sa kadautan nga gihugpaan sa kasamok, kasilag, ug ubang mga sala.2

Ang Dios, nagpasidaan nako nga ang lunop molaglag sa dautan, misugo nako sa paghimo og arka ug pagpundok og pagkaon ug mga hayop. Uban sa tabang sa akong tulo ka anak ug pinaagi sa inspirasyon sa Dios, akong gihimo ang arka sulod sa 120 ka tuig. Wala gani mag-ulan bisag gamay.3

Gisangyaw usab nako ang paghinulsol, nanghinaut nga pipila ang maminaw ug makalikay sa Lunop. Sukad sa pagkahimaya ni Enoch hangtud sa Lunop, daghang matinud-anong mga tawo nakaadto sa langit nga wala makatilaw og kamatayon, apan ang uban midumili sa paghinulsol.4

Sa dihang ang akong pamilya misakay na sa arka, among gisaraduan ang pultahan ug wala kini ablihi hangtud mihunong ang ulan ug miuga ang yuta, hapit usa ka tuig ang milabay.5 Sa among pagkanaog, ang Dios mipakigsaad nga dili na Niya lunupan pag-usab ang yuta. Usa ka bangaw ang makita sa langit isip simbolo sa Iyang saad. Iya kaming gimandaon sa pagpadaghan sa among pamilya ug padayon sa pagsunod sa ebanghelyo, ug nahimo kong ikaduhang amahan sa katawhan.6

Mga siglo ang milabay, isip usa ka anghel nga ginganlan og Gabriel,7 gipahibalo nako ang pari nga si Zacarias nga siya ang mahimong amahan ni Juan Bautista, ug ako mipakita ngadto kang Maria ug misulti kaniya nga siya manganak sa Manluluwas.8

Ang akong kinabuhi nagpakita nga, bisan atol sa lisud nga mga panahon, dili gayud kamo mag-inusara kon kamo mosunod sa Dios. Sa katapusan ang mga lunop sa kinabuhi mawala, ug inyong makita ang kanindot sa ebanghelyo diha sa inyong kinabuhi, sama sa bangaw nga mipakita sa kalangitan.