2014
Mijen eo Ekwojarjar an Jisōs Kraist: Seperd Em̧m̧an
Pāpode 2014

Naan in Katak an Kōrā, Pāpode 2014

Mijen eo Ekwojarjar an Jisōs Kraist: Seperd Em̧m̧an

Jar im katak ennaan in im pukōt n̄an jeļā ta eo n̄an kwaļo̧k. Ewi wāween meļeļe mour im mijen eo an Rilo̧mo̧o̧r eo naaj kōļapļo̧k tōmak eo am̧ ilo E im kōjeram̧m̧an ro otemjej kwōj oņaaki jen loļo̧k ko an kōrā? N̄an elōn̄ļo̧k meļeļe, etal n̄an reliefsociety.lds.org.

Tōmak, Baam̧le, Deeor

Jisōs Kraist, Seperd eo Em̧m̧an, ar katakin:

‟Armej ōt iaami jibuki sip ippān, eļan̄n̄e juon iaer ejako, ejab likūt ruwatimjuonn̄oul im ruwatimjuon ilo āne jem̧aden, im pukōt eo ejako n̄an tōre eo enaaj loe? …

‟Ij ba n̄an kom̧, bwe āindein enaaj wor lan̄lōn̄ ilan̄ kōn juon rijero̧wiwi eo ej ukeļo̧k ippān” (Luk 15:4,7).

Ilo ad itok n̄an meļeļe bwe Jisōs Kraist ej Seperd eo Emm̧an, kōņaan eo ad eļapļo̧k n̄an ļoor waanjon̄ak eo An im jipan̄ ro repād ilo aikuj. Jisōs ej ba: ‟N̄a seperd em̧m̧an, im Ijeļā ro Aō, im ro Aō rejeļā N̄a. … Im Ij likūt Aō mour kōn sip ko” (Jon 10:14–15). Kōn wōt Pinmuur eo an Kraist, ejjeļo̧k iaad enaaj bar jebwābwe me jejjab maron̄ lo iaļ eo ad n̄an m̧weo (lale Luk 15).

Būreejtōn Thomas S. Monson eaar ba, ‟Ad eddo n̄an kea kōn bwij in sip ko. … Kōj kajjojo jen maron̄ bōk iien em̧m̧an n̄an jerbal.”1

Jān Jeje ko Rekwojarjar

Sam ko 23; Aiseia 40:11; Mosaia 26:21

Jān Bwebwenato eo Ad

Elizabeth Ann Whitney, eo ekar pād ilo kweilo̧k eo kein kajuon an Doulul eo an Kōrā ro, kar ba kōn oktak eo an ilo 1830: “Ke ej m̧ōj aō ron̄ kōn Ko̧jpeļ eo ilo an Elder ro kwaļo̧k kake, ijeļā bwe ej ainikien Seperd Em̧m̧an.2 Elizabeth ar ļoor ainikien Seperd Em̧m̧an im kar peptaij im kapen.

Jemaron̄ barāinwōt ron̄ ainikien Seperd Em̧m̧an im kwaļo̧k kōn katak ko An ippān ro jet. Būreejtōn Monson ar ba, ‟Kōj jej pein Irooj ijin ioon laļ in, kōn kean̄ n̄an jerbal im n̄an lijur ro Nejin.”3

Baj āinwōt an juon seperd kappukōt sip eo ejebwābwe, ro jinen im jeman remaron̄ kappukōt ālkin an juon ajri jabwebwe. Būreejtōn James E. Faust (1920–2007), Rikakpilōklōk eo Kein Karuo ilo Būreejtōnji eo Kein Kajuon, ar ba: ‟N̄an ro jinen im jemān rej būrom̧ōj ro rekar mour jim̧we, niknik, im kar lukkuun jar n̄an katakin ro nejier rejjab pokake, kōm̧ij ba n̄an kom̧, Seperd eo Em̧m̧an ej kōjparok er. Anij ejeļā im meļeļe kōn liājļōļ eo am̧ eļap. Ewōr kōjatdikdik.”4

© 2014 jen Intellectual Reserve, Inc. Aolep jim̧we rej pād ippān. Jeje ilo USA. Kōmālim ilo kajin English: 6/13. Kōmālim an ukook: 6/13. Ukook eo an Visiting Teaching Message, February 2014. Marshallese. 10862 874

Kakeememej ko

  1. Thomas S Monson, “Heavenly Homes, Forever Families,” Liahona, June 2006, 70.

  2. Elizabeth Ann Whitney, ilo Daughters in My Kingdom:The History and Work of Relief Society (2011), 128.

  3. Thomas S. Monson, “Ta Em̧ōj Aō Kōm̧m̧ane n̄an Jabdewōt Rainin?” Kweilo̧k eo Eļap, Okt. 2009, 41.

  4. James E. Faust, “Dear Are the Sheep That Have Wandered,” Liahona, May 2003, 68.

Ta Eo Imaron̄ Kōm̧m̧ane?

  1. Ekōjkan jeļā bwe Rilo̧mo̧or ej Seperd eo Em̧m̧an eo ej bōktok aenōm̧m̧an n̄an mour ko ad?

  2. Ilo wāween ta ko jemaron̄ katakin ro me ‟rejebwābwe” jān m̧akūtkūt an Kabun̄ ak ro rejjab jen tōmak eo ad?

  3. Ekōjkan Aō maron̄ jipan̄ ro jinen im jemān me ro nejier ejako aer mour kōn ko̧jpeļ eo?