Moabut og pito ka oras alang nako sa pag-adto sa Frankfurt Germany Temple, mao nga ang akong pamilya ug ako makaadto lang og kaduha sa usa ka tuig tagsa ka semana kada higayon. Apan kon ako dunay dugang nga oportunidad nga makaadto, moadto ko tungod kay ako nasayud nga kini mahimong usa ka dako nga panalangin. Batonan nako ang espiritu sa templo pinaagi sa pagbasa sa mga kasulatan matag adlaw. Akong gigamit ang akong rekomend sa templo isip bookmark. Matag higayon nga akong makita ang akong rekomend, ako mangutana sa akong kaugalingon og mga pangutana aron sa pagsiguro nga ako takus sa pagsulod sa templo. Kini nakapalig-on nako ug nakatabang nako nga mobati sa Espiritu. Bisan tuod ang templo layo sa panimalay, sa gihapon ako naningkamot sa pagpuyo ingon og ako makasulod kada adlaw.

Kon baliwalaon lang nato ang templo, layo kini sa atong mga kasingkasing. Kinahanglang atong hunahunaon ang mga panalangin nga ikahatag sa templo ug moadto kon kita makahimo. Bisan kon kamo makabisita lang og pipila sa usa ka tuig, mahimo ninyo kining mas makahuluganon pinaagi sa pagdala og mga family name o pagpuasa. Ang Espiritu diha sa balay sa Ginoo espesyal—gusto kamong makahuluganon ang inyong pagbisita.

Ang templo naghatag og kalipay sa akong kinabuhi karon. Sa akong pag-adto sa templo, ako dugang nga nagkat-on mahitungod sa atong Langitnong Amahan ug ni Jesukristo. Ang akong mga buluhaton sa templo naglig-on ug naghas-has sa akong pagka-espirituhanon. Nakaangkon ako og mas maayo nga pagsabut sa atong katuyoan sa kinabuhi. Ang templo naghatag nako og kaisug sa pag-atubang sa mga pagsulay ug tintasyon ug naghatag nako og kalig-on sa pagbuntog sa akong mga kahuyang. Ang templo mao lamang ang dapit diin kita ma-sealed isip mahangturong mga pamilya, mao nga ako mag-andam sa pagsulod sa templo ug magpabiling putli ug takus.

Ang pagsulod sa templo kaduha o katulo sa usa ka tuig maayo, kon atong gihimo uban sa sinsero ug putli nga kasingkasing. Atong maawhag ang atong mga lider sa Simbahan sa pag-organisar og mga biyahe ngadto sa templo. Kon kita dili makaadto, paningkamutan nato ang pag-andam sa atong mga kaugalingon aron nga kon ang panahon moabut, kita moadto uban sa hingpit nga kalipay. Busy kita sa atong mga kinabuhi, apan ang mga propeta misaad nga kon kita moadto sa balay sa Ginoo, kita mapanalanginan.

Sulayi ang pagpa-frame sa inyong paborito nga mga litrato sa templo uban sa mga pulong “Ako mosulod sa umaabut nga adlaw!” Ibutang kini sa inyong kwarto aron makita ninyo kini matag adlaw. Paghimo og lista sa mga butang nga inyong buhaton ug dili buhaton aron kamo mahimong takus sa pagsulod sa templo. Ibutang ang lista tupad sa litrato.

Isulat sa inyong journal ang mahitungod sa inyong panahon sa templo ug dayon basaha kini nga mga pahina kon moabut na kamo sa inyong balay. Makatabang kini ninyo nga mahinumdom sa inyong mga pagbati. Importante kini ilabi na sa pagrekord sa personal nga pagpadayag. Sa dihang ako misulod sa templo, naningkamot ko sa pagpaminaw pag-ayo sa Espiritu tungod kay Siya kanunay nga andam nga motabang nato nga makat-on. Matag higayon nga ako naminaw, nakakaplag ako og bag-o nga mga kamatuoran mahitungod ni Jesukristo ug sa Langitnong Amahan ingon man usab mahitungod sa buhat sa templo. Kon ako mag-focus sa espirituhanong mga butang samtang didto sa templo, mas ipakabililhon ko kini ug ang templo mahimong labing makahuluganon sa akong kinabuhi.

Nagtuo ko nga ang paghimo sa buhat sa family history makahimo nimo nga daw anaa sa templo bisan og wala ka sa templo. Mahimo ninyong ihatag ang mga pangalan nga inyong nakit-an sa mga tawo sa inyong pamilya o ward aron dad-on ngadto sa templo. Kon kamo mobuhat sa family history ug mohimo sa inyong balay nga usa ka balaan nga dapit, mamahimo kamo nga duol sa templo bisan kamo layo pa niini.