Mga Higala sa Tibuok Kalibutan
Ako si Tendai gikan sa Zimbabwe
Mhoroi, shamwari! *
Himamata si Tendai, kinsa nagpuyo sa nasud sa Zimbabwe. Ang Zimbabwe anaa sa habagatang bahin sa Africa. Adunay daghan kaayong mga hayop sa Africa, sama sa mga rhino, mga elepante, Cape buffalo, mga leon ug mga giraffe. Apan si Tendai dili makakita niini nga mga hayop duol sa iyang balay tungod kay nagpuyo siya duol sa Harare, ang labing dako nga siyudad sa Zimbabwe. Sa gihapon, mapasalamaton si Tendai nga kining maanindot nga mga hayop anaa sa iyang nasud.
Ang akong paborito nga istorya sa kasulatan mao nga sa dihang si Nephi gisugo sa paghimo og barko. Manghinaut ako nga ako kanunay adunay kaisug sa pagbuhat unsay matarung, sama ni Nephi.
Ang akong paborito nga bahin mahitungod sa Primary mao ang paghimo sa pasundayag sa Primary. Ganahan ko nga mopakigbahin sa akong pagpamatuod ni Jesukristo.
Kon mahuman na ko sa akong homework, motabang ko sa akong magulang nga babaye sa iyang mga leksyon. Duna siyay pipila ka mga hagit nga nakapalisud niya sa pagkat-on. Ganahan usab akong motabang sa ubang mga bata sa akong eskwelahan kinsa dunay mga hagit. Kataw-an sa ubang mga bata kini nga mga bata, apan wala gayud nako kana buhata.
Usa ka adlaw nagdula ang uban nakong mga higala sa among nataran. Usa kanila misulti og ngil-ad nga pulong. Nangatawa ang ubang mga bata, apan ako wala. Misulti ko nila nga dili kini kataw-anan ug nga kami dili angay nga mosulti og ngil-ad nga mga pulong.
Ang akong pamilya importante kaayo nako. Duna koy magulang nga babaye ug kaluha nga babaye. Ang akong duha ka igsoong babaye ug ako nagpuyo uban ni mama ug among apohan sa tuhod, o Gogo. Mao kana ang pagsulti sa “lola” sa among lumad nga pinulongan sa Shona.