2014
Seves mo Laef we I No Save Finis
Maj 2014


Fas Presidensi Mesej, Maj 2014

Seves mo Laef we I No Save Finis

Pikja
Presiden Henri B. Aering

Sevya i eksampol blong yumi long saed blong givim seves wetem fasin we i no selfis. Laef blong Hem we i stret evriwan, Hem i givim blong givim seves long Papa long Heven mo evri pikinini blong Papa blong Hem. Stamba tingting blong Papa long Heven mo Pikinini blong Hem i blong givim evriwan long yumi, presen blong fasin blong nomo save ded mo blesing blong kasem wan laef we i no save finis (luk long Moses 1:39)

Blong kasem laef we i no save finis, yumi mas jenis fulwan tru long Atonmen blong Jisas Kraes—we yumi bon bakegen mo yumi kam klin long sin. Be, ol smol pikinini, eit yia i go daon, oli no gat sin mo Lod i pemaot olgeta tru long Atonmen (luk long Mosaea 3:16, 21; Moronae 8:10 –12).

Yumi evriwan we i kasem yia blong stap akaontebol, i gat wan naesfala plan we i letem yumi blong kam klin long sin mo rere long laef ia we i no save finis. Fasin ia blong stap rere i stat wetem baptaes tru long atoriti blong prishud mo blong kasem Tabu Spirit. Mo oltaem yumi mas tingbaot Sevya mo kipim ol komanmen we Hem i bin givim long yumi.

King Benjamin i talem long ol pipol blong hem long Buk blong Momon abaot bigfala glad we bae i kam tru long filing ia blong kasem fogivnes from sin tru long Atonmen blong Jisas Kraes. Mo afta, Hem i tijim olgeta se blong holemtaet fasin blong kam klin aot long ol sin blong olgeta, oli mas tijim ol pikinini blong olgeta blong stap givim seves long wanwan long olgeta mo oli mas save givim fulap samting olsem we oli save givim blong help blong lukluk long ol nid long saed blong bodi mo spirit blong olgeta we oli stap raonabaot long olgeta.(Luk long Mosaea 4:11–16.)

King Benjamin i bin tijim tu: “Mo luk, mi talem ol samting ia long yufala blong yufala i save lanem waes tingting, blong yufala i save lanem se taem we yufala i stap wok blong ol narafala man, yufala i stap mekem wok blong God blong yufala nomo” (Mosaea 2:17).

Jisas i bin go mo tijim gospel blong hem mo stap mekem gud (luk long Ol Wok 10:38). Hem i hilim olgeta sikman. Hem i mekem olgeta we oli ded oli girap.Wetem paoa blong Hem, Hem i fidim taosen man we oli bin hangri mo oli no bin gat kaekae (luk long Matiu 14:14 –21; Jon 6:2–13). Afta we Hem i bin laef bakegen long ded, Hem i givim kaekae long sam long ol Aposol blong Hem taem oli stap kam so long solwota blong Galili (luk long Jon 21:12–13). Long Amerika, Hem i hilim ol sikman mo blesem wanwan pikinini (luk long 3 Nifae 17:7–9, 21).

Aposol Jemes i tijim yumi olsem wanem nao ol strong tingting blong givim seves long ol narawan i kamaot long ol fasin blong yumi blong talem tangkyu long Lod long wanem hem i stap mekem long yumi:

“Be loa ya we i save mekem man i fri, i stret olgeta. Mo man we i stap luklukgud long hem, mo i stap tingbaot oltaem, hem i no save fogetem ol samting we loa ya i talem. Hem i save mekem ol samting ya, mo taem hem i stap mekem olsem, God i stap mekem hem i harem gud long olgeta laef blong hem. 

“God i Papa blong yumi, mo prapa fasin blong ona long hem, we hem i luk se i klin gud mo i stret gud i olsem. Man i mas givhan long ol pikinini we oli no gat papa blong olgeta, mo long ol widowoman, long ol trabol we i kasem olgeta. Mo hem i mas lukaot gud long laef blong hem, blong i stap klin oltaem, we bambae ol rabis fasin blong wol i no spolem hem” (Jemes 1:25, 27).

Wan long ol promes taem yu kam klin gud hem i blong yu kam antap wetem wan strong tingting blong givim seves long ol narawan long bihaf blong Sevya. Hom tijing mo visiting tijing i kam wetem moa glad mo bae hem i no wan hevi wok blong mekem. Yu kam blong stap olsem wan volontia moa long wan lokol skul o blong givim gud kea long olgeta puaman long komuniti blong yu. Nomata yu gat smol mane blong givim long olgeta we oli gat samting i daon i no kasem blong yu, yu wantem nomo se yu gat moa, blong yu save givim moa (luk long Mosaea 4;24). Bae yu wantem tumas blong stap givim seves long ol pikinini blong yu, mo yu wantem tumas blong soem olgeta ol wei blong givim seves long ol narawan.

Taem yu jenis, bambae yu filim se yu wantem tumas blong givim bigfala seves mo no wantem blong oli presem nem blong yu. Mi save sam disaepol blong Sevya we oli givim bigfala presen we i mane mo seves wetem strong tingting se i no gat wan man moa, be God mo ol pikinini blong hem nomo bae oli save long hem. God i luksave seves blong olgeta taem Hem i blesem olgeta long laef ia, mo Hem bae i blesem olgeta long laef ia we i no save finis we bae i kam (luk long Matiu 6:1–4; 3 Nifae 13:1–4).

Taem yu stap kipim ol komanmen blong givim seves long ol narawan (luk long Matiu 22:39), yu filim wan jenis long filing blong yu blong gat hae tingting. Sevya i talemaot rong blong ol Aposol taem oli stap rao se huia nao hem i hae moa long olgeta. Sevya i talem:

“Mo bambae yufala i no letem ol man oli singaot yufala se ‘Masta’, from se yufala i gat wan Masta nomo blong yufala, we Hemia mi ya, mi Mesaea.

“Man we i haeman blong yufala hem i mas kam man blong wok blong yufala. (Matiu 23:10–11).

Sevya i tijim yumi olsem wanem blong lanem blong givim seves long ol narawan. Hem i givim seves wetem klin tingting, mo yumi mas lanem blong givim seves olsem we Hem i bin lanem—laen folem laen (luk long D&C 93:12–13). Tru long ol seves we yumi stap givim, yumi save kam moa olsem Hem. Bae yumi prea wetem ful paoa blong hat blong lavem ol enemi blong yumi semmak olsem we Hem i lavem olgeta (luk long Matiu 5:43–44; Moronae 7:48). Long wei ia nao yumi save kam inaf blong kasem laef we no save finis wetem Hem mo Papa blong yumi long Heven.

Mi promes se bae yumi save kam blong givim seves moa gud evriwan taem yumi folem ol tijing blong Sevya mo eksampol blong Hem.

Yusum Mesej Ia blong Tij

Elda M. Rasel Balad blong Kworom blong Olgeta Twelef Aposol i leftemap tingting blong yumi blong prea from ol janis blong givim seves: “Long moning prea blong yu long evri niu dei, askem Papa long Heven blong lidim yu blong luksave ol janis blong givim seves long wan long ol naes pikinini blong Hem. Mo afta go aot long dei … mo lukaotem wan we yu save helpem hem” (“Be Anxiously Engaged,” Ensign o Liahona, Nov. 2012, 31). Stap lukaot blong invaetem olgeta we yu tijim blong putum ol gol blong prea evri moning blong gat janis blong givim seves, mo afta, lukaotem olgeta long dei ia.