Nawala Na Ang Palas-anon

Bag-ohay lang nakatambong ko og leksyon sa Relief Society diin ang usa ka sister mibasa og kinutlo kabahin sa mga epekto sa pisikal ug sekswal nga pang-abuso sa bata. Una nakong nahunahunaan, “Kaguol gyud.” Dayon akong nabati ang Espiritu, kinsa mihatag og pagsaksi kanako sa milagro sa sa Pag-ula sa Manluluwas. Ako biktima sa sekswal nga pang-abuso sa bata pa. Atol niana nga leksyon sa Relief Society, ako nakaamgo nga wala na ako mobati og kasakit ug kahadlok sa usa ka butang nga misanap ug naghadlok nako sulod sa katuigan. Usa kadto ka milagro. Sa akong kasingkasing nagpasalamat ko sa Manluluwas nga nag-ayo kanako.

Sa dihang bata pa nanlimbasug ug mibati ko og kaulaw sa daghang katuigan sa wala pa makadesisyon nga sultian ang usa ka tawo nga giabusohan ko. Sa dihang 13 anyos ko, mibati ko og impresyon nga panahon na isulti kini. Human sa kalihokan sa Mutual, miduol ko sa usa ka kasaligan nga lider, kinsa malumong nakig-istorya nako ug giubanan ko sa pagpakigkita sa bishop sa samang gabii. Nahupay ko sa mabinationg panagway sa bishop samtang iya kong gidapit sa pagsulod sa iyang opisina. Nakahinumdom ko nga mibati nga nawagtang ang gibug-aton sa akong mga sekreto sa katuigan samtang naminaw akong bishop. Nakahinumdom ko sa iyang putli nga mga luha samtang siya naminaw sa akong istorya. Nabati ko ang gugma sa Langitnong Amahan, ug mibati ko og kasiguroan nga ang pag-abuso dili akong sayop ug ako putli ug hiyasnon ra gihapon. Kini ang sinugdanan sa akong dalan ngadto sa pagka-ayo, usa ka dalan nga nagpadayon sa daghang katuigan.

Dili lang kadto usa ka higayon sa pagkaayo—usa kadto ka proseso sa kalinaw, pagsabut, ug ang mga tubag miabut samtang nagtuon ko sa akong kasulatan, nag-ampo matag adlaw, ug mas nakaila ni Jesukristo. Samtang nagtuon ko sa kinabuhi sa Manluluwas, mibati ko og dugang gugma alang Kaniya. Ang Espiritu mipamatuod sa kamatuoran ngari nako, lakip na ang akong kaugalingong bili isip anak nga babaye sa Dios. Samtang akong gihalad akong kasingkasing ngadto sa Ginoo, nagsunod sa Iyang mga sugo, ug nagtinguha sa Iyang kabubut-on, mibati ko og kahupayan ug kalinaw. Samtang nakaila ko Kaniya, mas nailhan nako akong kaugalingon. Sa katapusan, ang akong nangagi wala na mopasakit nako. Nawala na ang palas-anon. Ang Manluluwas miayo kanako.

Karon aduna na koy mahangturong pamilya uban sa talagsaong bana ug tulo ka matahum nga anak nga mga babaye. Napanalanginan ko nga makaalagad sa kabatan-onan ug sa pagpamatuod nga ang Pag-ula ni Jesukristo makaayo kanato gikan sa sala, pisikal nga kasakit, ug masulub-on nga kasingkasing. Nasayud ko niini tungod sa kalooy nga gihatag ngari kanako—tungod kay ako “giliyokan sa kahangturan sa mga bukton sa iyang gugma” (2 Nephi 1:15).