2014
Tabu Misin blong Jisas Kraes: Laet Blong Wol
Maj 2014

Visiting Tijing Mesej, Maj 2014

Tabu Misin blong Jisas Kraes: Laet blong Wol

Stadi gud long toktok ia mo lukaotem blong save wanem blong serem. ?Olsem wanem bae andastanding blong yu long laef mo misin blong Sevya bae i mekem fet blong yu long Hem i kam antap mo bae i blesem olgeta we yu stap lukaotem olgeta tru long visiting tijing? Blong kasem moa infomesen, go long reliefsociety.lds.org.

Fet• Famle • Help

Taem yumi kam blong andastanem se Jisas Kraes Hem i Laet blong Wol, fet blong yumi long Hem bae i gro, mo bae i kam wan laet long ol narawan. Kraes i testifae abaot ol wok blong Hem olsem tru laet ia we i laet blong evri man mo woman we i kam long wol (luk long D&C 93:2) mo askem se yumi “leftemap laet ia [blong Hem] blong mekem se i save saen long wol” (3 Nifae 18:24).

Ol profet oli testifae tu abaot Laet ia blong Kraes. Presiden Henri B. Aering, Fas Kaonsela long Fas Presidensi, i talem: “Evri taem we yu jusum blong laef moa olsem Sevya, bae testemoni blong yu bae i kam moa strong. I no longtaem nating bae yu save yuwan se Hem nao i Laet blong Wol. … Bae yu soem long ol narawan Laet blong Kraes long laef blong yuwan.”1

Elda Kwentin L. Kuk blong Kworom blong Olgeta Twelef Aposol i tokbaot yumi olsem wan laet long wol long wei ia: “Yumi nid blong protektem gud ol famle blong yumi mo stap long fored oltaem wetem evri pipol wetem gudfasin blong mekem evri samting we yumi save mekem blong kipim laet, hop, mo fasin blong gat klin tingting long ol komuniti blong yumi.2

I Kamaot long Ol Skripja

Jon 8:12; Doctrine and Covenants 50:24; 115:5

I Kamaot long Histri blong Yumi

Ol Lata-dei Sent woman blong tedei, oli gohed blong soem laet blong olgeta.

Long wan hae bilding we i gat 80 stori long Hongkong, Jaena,wan singgel sista we hem i gat disabiliti long bodi — hem wan nomo long famle we i wan Lata-dei Sent — i mekem wan hom we i wan sef ples we hem mo ol visita i save filim we Spirit i stap. Hem i kipim ol skripja, ol lesenbuk blong Rilif Sosaeti, mo ol hymbuk kolosap. Hem i stap go long tempol blong mekem ol odinens blong ol bubu blong hem.3

Wan mama long Brasil we i gat wan stret mo gud fasin i tijim ol pikinini blong hem long laet blong gospel. Ol singsing blong praemeri i fulumap gud ea insaed long red brikis haos blong hem, mo pikja long Liahona blong tempol, ol profet blong God, mo blong Sevya i kavremap ol wol blong haos. Hem wetem man blong hem i bin sakrifaes blong sil long tempol blong mekem se ol pikinini blong tufala, oli save bon insaed long kavenan. Prea blong hem, i no jenis, i blong Lod bae i helpem hem blong tijim ol pikinini long laet, long trutok, mo long paoa blong gospel.4

© 2014 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/13 Oli letem translesen: 6/13 Translesen blong Visiting Teaching Message, March 2014. Bislama. 10863 852

Ol Not

  1. Henri B. Aering, “A Living Testimony,” Ensign o Liahona, Mei 2011, 128.

  2. Kwentin L. Kuk, “ Let There Be Light!” Ensign o Liahona, Nov. 2010, 30.

  3. Luk long Daughters in My Kingdom: The History and Work of Relief Society (2011), 163–64.

  4. Luk long Daughters in My Kingdom, 164.

?Wanem Nao Mi Save Mekem?

  1. Toktokraon long wanem i minim blong stap wan laet i go long wol tedei.

  2. Tingting hevi long olsem wanem nao, taem yu bin folem laet blong Kraes, i bin helpem yu blong stap strong tru long ol tes.