Naghulat diha sa Lobby

Usa ka gabii akong gidala ang akong tulo ka mga manghud ngadto sa templo aron sa paghimo og mga bunyag. Samtang ang temple worker nagsusi sa among mga rekomend, iyang nadiskobrehan nga ang rekomend sa akong igsoong babaye walay pirma sa bishop. Akong gisulatan ang usa ka porma aron dad-on ngadto sa temple recorder, kinsa motawag sa bishop. Dayon ang temple worker misusi sa rekomend sa akong igsoong lalaki ug nahibaloan nga wala pa kini ma-activate. Duna koy ballpen, mao nga akong gikuha ang porma nga gihatag namo ug nagsugod sa pagsulat niini.

Nasayud ko nga ang akong igsoong lalaki ug babaye dili makasulod nga dunay sayop ang ilang mga rekomend, apan ako mibati nga responsable alang nila, ug hangtud nga ako motabang nila sa pag-atiman niining mga sayop, dili usab ako makasulod. Lain ang akong gibati nga dili makasulod sa templo. Mibiya mi sa bunyaganan ug misaka sa itaas nga entrada sa templo aron ipasabut ang among sitwasyon sa front desk. Ang temple recorder miingon nga iyang masulbad ang problema sa pipila lamang ka minuto, mao nga kaming upat milingkod aron maghulat diha sa lobby.

Samtang naglingkod ko didto, ang akong kalagot nahimong kahigawad. Wala kami pasudla tungod sa yano kaayong mga sayop, apan kini mao ang tanan nga kalainan tali sa paghulat ug sa pagsulod sa balay sa Ginoo. Usa kini ka malisud nga adlaw, ug ako nanghinaot nga ang templo motabang nako nga mobati og kalinaw. Ang mga sayop dili akong binuhatan, apan sa dihang nagkadugay ang among paghulat, hapit na ako makahilak. Naningkamot kong magbinuotan pinaagi sa pag-adto sa templo ug sa pagpakita og ehemplo sa pagtambong sa templo alang sa akong mga igsoon. Nganong wala man kami pasudla nga gusto man unta kaayo ko nga mosulod?

Ug dayon ako nakaamgo: kon ako mobati nga nawad-an og kadasig nga wala pasudla sa templo tungod sa pipila ka klerikal nga sayop, unsa kaha ang akong bation kon wala ko pasudla tungod sa akong kaugalingong mga sayop—nga dili takus nga mosulod sa templo? Samtang naghunahuna ako niini, sa kalit mikalma ko. Akong gibati nga ako nakakat-on sa leksyon nga gusto sa Dios nga akong makat-unan. Misaad ko Kaniya nga maningkamot ko kanunay nga mahimong takus nga mosulod sa templo. Misaad ko nga dili gayud mahimong dili ko pasudlon sa balay sa Ginoo tungod sa akong kaugalingong mga sayop; dili ko gusto nga ang akong mga aksyon maoy makaingon nga anha lang ko sa lobby.

Dayon nianang gabhiona aduna koy sabut sa akong bishop sa pagbag-o sa akong rekomend sa templo. Sa wala pa ko moadto, akong gisusi ang bisan unsa nga mga sayop sa akong kaugalingon nga makapugong nako sa pagsulod sa templo. Sa dihang ang bishop nangutana kon ako takus ba nga mosulod sa balay sa Ginoo, mapasalamaton kaayo ko nga ako nakaingon og oo.