Pagdapit og Kalampusan

Sa dihang si Nick Barton ug ang iyang asawa, si Morgan, mibalhin ngadto sa Arizona, USA, diin si Nick moeskwela og law, nagsugod sila sa pag-ampo alang sa misyonaryo nga mga oportunidad. “Among gihangyo ang Langitnong Amahan sa pagtabang namo nga mahimong mas sensitibo sa mga aghat sa Espiritu Santo ug mahimong maisugon sa paglihok,” miingon si Nick.

Usa ka Sabado, kinahanglan ni Morgan ang ilang sakyanan para sa trabaho, busa si Nick nagbiseklita padulong sa campus. Sa dihang oras na nga mopauli, ang biseklita nawala.

“Komon na kaayo ang kawat sa mga biseklita nga ang mga pulis nangutana kon kini duna bay ilhanan nga makatabang aron dali kining mailhan. Nakahinumdom ko nga gibutangan og label ni Morgan diha sa manobela nga nag-ingon, ‘Gihiguma Ko Ikaw.’”

Sa makausa nag-ampo si Nick. “Mihangyo ko nga makat-on unta ko niini nga sitwasyon,” siya miingon. Dayon siya misakay sa tren aron mahiduol kutob sa mahimo ngadto sa balay sa dili pa motawag sa iyang asawa ug magpakuha kaniya.

“Sa sunod nga hununganan sa tren, nakita nako ang usa ka dakong tawo nga pinabali ang kawo nga misakay sa tren, nagpas-an sa akong biseklita! Akong nakita ang ‘Gihigugma Ko Ikaw’ sa manobela, mao nga ako nasayud akoa kini,” miingon si Nick. Gipikpik niya ang abaga sa lalaki.

“Miingon ko, ‘Mangutana ko kon diin nimo nakuha kana nga biseklita.’ Mitubag siya, ‘Didto sa namaligya sa unahan.’” Mipasabut si Nick nga ang iyang biseklita gikawat. Ang batan-ong lalaki mitubag nga siya dili kawatan ug mahimong kuhaon ni Nick ang biseklita.

“Nagpasalamat ko niya ug miingon nga patawagon nako ang pulis niya aron ang ‘namaligya’ maimbestigar,” miingon si Nick. “Iyang gisulti nako nga ang iyang pangalan kay Harley ug mihatag nako sa iyang numero sa telepono. Giingnan nako siya ulian nako siya og porsyon sa iyang nabayad, tungod kay kaming duha ang nasugamak, ug mikanaog ko sa tren nga nalipay nga nahibalik ang akong biseklita.”

Apan kadto mao lamang ang sinugdanan.

“Tungod sa kakuryuso, gitawagan nako si Harley pagkasunod buntag. Miingon siya nga ang mga pulis nangimbestigar na. Dayon nangutana siya kon ang akong asawa ug ako duna bay buhaton inigka hapon. Nakaamgo ko nga siya gustong makighigala.

“Dominggo kadto, giingnan nako siya nga manimba mi apan malipay mi nga makig-uban niya sa laing higayon. Sa akong pagbutang sa telepono, akong nahunahunaan nga kini klaro nga usa ka misyonaryo nga oportunidad. Gitawagan nako siya og balik ug nangutana kon interesado ba siya nga mokuyog namo sa simbahan. Miuyon siya! Mitambong siya sa tanang mga miting ug mipahibalo nako pagkahuman nga iyang gibati nga ang mga mamumulong ug mga magtutudlo direktang nakig-istorya kaniya.

“Si Harley dunay pamilya gawas sa nasud ug mibalhin sa wala pa kami magkita,” miingon si Nick. “Apan nahimo siya namong higala, mitahud sa Simbahan, ug gipasaligan nga ang iyang Langitnong Amahan naghunahuna kaniya.”

“Usa ka adlaw, human makapaminaw sa mensahe sa komperensya, akong gibati nga kinahanglan kong makig-istorya sa pharmacy technician sa tindahan,” miingon si Hannah Rawhouser, taga-Arizona usab. “Akong gibati nga, ‘Maayo siya nga tawo. Kinahanglan nimong imbitaron siya sa kalihokan sa Simbahan.’”

Pagkasunod higayon si Hannah anaa sa drive-through, nangita siya kaniya, apan wala siya didto. Sa gihapon, nagpadayon ang mga aghat.

“Pipila ka semana ang milabay, mibalik ko, ug didto na siya. Nasayud nga gamay ra ang akong panahon, misulti dayon ko sa akong tuyo. ‘Mosimba ka ba?’ nangutana ko. Nasurprisa siya ug dayon miingon og oo. Gihatagan nako siya sa akong business card. ‘Tawagi unya ko,’ miingon ko ug mipadagan. ‘Nan, gibuhat ko na ang akong bahin,’ naghunahuna ko. “Karon wala na koy dili maayo nga mga pagbati.’”

Sa iyang kasurprisa, mitawag siya pagkasunod adlaw ug mipaila sa iyang kaugalingon nga si Greg Eiselin. “Miingon siya nako sa wala madugay nga, tungod kay kami mga batan-on pa ug dili minyo, nagtuo siya naghangyo ko niya nga magkig-date,” siya miingon. “Apan hinoon naghisgot kami kabahin sa relihiyon sulod sa tulo ka oras, ug nagsugod siya sa pagkat-on kabahin sa Simbahan.” Karon si Elder Eiselin nagserbisyo og full-time nga misyon sa Montana, USA.

Isip 26 anyos, si Robert G. Ellis Jr. nagtrabaho isip usa ka opisyal sa pulis sa opisina sa Senado sa Washington, D.C., USA.

“Migahin ko og daghang panahon sa pagpamalandong kon unsay akong nakat-unan mahitungod ni Jesus,” siya mihinumdom. “Ang akong amahan ug inahan walay gisimbahan, apan mitugot sila nako nga mosimba, ug ako nalingaw sa pagtambong og sobra sa usa ka dosena nga mga tinuohan.” Isip usa ka bag-ong minyo nga young adult, mibati siya nga kinahanglan siyang magpabunyag—apan sa unsa nga simbahan?

“Ang akong espiritu nahasol. Gusto kong makakita og simbahan nga matinud-anon sa mga pagtulun-an ni Kristo. Ang mga tawo miingon nga ang tanang mga simbahan Simbahan sa Ginoo, apan dili sila magpanuko sa pagsulti nga ang laing mga denominasyon sayop. Nag-ampo ko, ‘gusto ko nga magpabunyag, apan wala ko masayud unsa nga simbahan ang apilan.’”

Naghinumdom sa gisulti ni Jesukristo, “Pangayo, ug kamo pagahatagan” (Mateo 7:7), si Robert nagpadayon sa pagpangamuyo. Usa ka adlaw samtang siya nagtrabaho, mibati og kabalaka pag-usab si Robert, ug ang mga luha miagas sa iyang mga mata.

“Nahadlok ko ug wala masayud kon ang akong hunahuna husto ba o sayop. Dayon mibati ko og kalinaw. Wala gayud masayud nganong gibuhat ko kini, milakaw ko padulong sa operator sa elevator ug nangutana, Unsa ang imong simbahan?’”

Ang operator sa elevator si Norman Maxfield, usa ka returned missionary nga nagtambong sa Georgetown University.

“Mitan-aw siya sa pipila ka mga basahon. Makita nako nga nasurprisa siya. Miingon siya, ‘Usa ko ka Mormon. Ngano?’

“Ako miingon, ‘gusto kong magpabunyag, apan ako wala masayud unsa nga simbahan ang apilan.’

“Siya nangutana, ‘Unsay imong gituohan?’

“Si Jesukristo,’ mapagarbuhon kong mitubag.

“Nangutana siya, ‘Mosulti ko nimo mahitungod sa akong simbahan, Ang Simbahan ni Jesukristo sa mga Santos sa Ulahing mga Adlaw?’ Samtang siya misulti nako nga ang Simbahan ni Jesukristo gipahiuli sa yuta, nasayud ko nga ang akong mga pag-ampo gitubag. Nindot kaayo ang akong gibati.”

1977 kadto. Karon si Brother ug Sister Ellis mga miyembro sa simbahan sa Virginia, USA.

Si Elder Dallin H. Oaks sa Korum sa Napulog Duha ka mga Apostoles miingon nga “kon kita mobarug isip ‘saksi sa Dios sa tanan nga mga panahon ug diha sa tanan nga mga butang’ (Mosiah 18:9), ang Ginoo moandam kanato og paagi aron kita makakita ug matukmaang komunikasyon niadtong nagpangita. Kini moabut kon mangita kita og direksyon ug kon kita molihok gikan sa usa ka sinsero ug sama kang Kristo nga gugma alang sa uban.”²

Si, Nick, Hannah, Greg, Robert, ug Norman mouyon nga ang iyang gisulti tinuod.