Mga Pioneer sa Matag Yuta
Zimbabwe Yuta sa Katahum, Mga Tawo nga may Hugot nga Pagtuo
Ang Zimbabwe adunay mauswagon nga komunidad sa mga Santos sa Ulahing mga Adlaw.
Ang Katahum sa Zimbabwe
Gikonsiderar nga usa sa Pito ka Natural nga mga Katingalahan sa Kalibutan, ang Victoria Falls sa utlanan sa Zimbabwe dili ang pinakalapad ni ang pinakalawom nga busay sa kalibutan—apan daghan ang miangkon nga kini ang kinadaghanan og tubig. Sobra sa usa ka milya (1.6 km) ang gilapdon, ang buhagay sa mga tubig mohagsa gatusan ka pye (108 m) ngadto sa mga bato sa ubos. Ang nagdahunog nga busay makahimo og dagkong mga pinisik nga dili na nimo makita ang ubos sa busay atol sa ting-ulan.
Ang Victoria Falls usa lang sa daghang matahum nga talan-awon sa Zimbabwe. Nahimutang sa habagatang-silangang Africa, ang Zimbabwe (kaniadto Southern Rhodesia) nagdani sa mga biyahidor sa tibuok kalibutan sa pagsinati sa nasudnong parke, kalasangan, katahum, ug kultura niini.
Ganahan man kamo nga mobiyahe sa wildlife safari o mosulay sa white-water rafting ngadto sa nagdahunog nga Zambezi River, ang Zimbabwe may daghang ikahalad—lakip ang nag-uswag nga komunidad sa mga Santos sa Ulahing mga Adlaw.
Ang Simbahan sa Zimbabwe
Adunay sobra sa 23,000 ka mga miyembro sa Simbahan ang nagpuyo sa Zimbabwe. Ang gidaghanon sa miyembro paspas nga misaka sa milabayng 35 ka tuig. Sama pananglit sa wala pay 1980, adunay sobra sa 1,000 lang ka mga miyembro.
Ang propetikanhong deklarasyon nga giisyu ni Presidente Spencer W. Kimball (1895–1985) niadtong Hunyo 8, 1978, nga ang “tanan nga takus nga lalaki nga sakop sa Simbahan mahimo nga i-orden sa pagkapari sa walay pag-isip sa kaliwat o kolor” (Opisyal nga Pahayag 2) adunay positibo nga epekto sa pagtubo sa Simbahan sa Zimbabwe.
Daghang mga Santos sa Ulahing mga Adlaw nakatabang sa paglig-on sa Simbahan sa Zimbabwe. Ania ang mubong pagpaila niadtong mga pioneer.
Mga Modernong Pioneer sa Zimbabwe
Hubert Henry Hodgkiss
Ang mga misyonaryo gipadala ngadto sa Southern Rhodesia sulod sa limitado nga panahon sa sayong bahin niadtong 1930. Apan niadtong 1935 ang tanang misyonaryo gipapahawa sa Southern Rhodesia (nga kaniadto kabahin sa South African Mission) ug ang area wala pabutangi og misyonaryo tungod sa kakulang sa misyonaryo ug sa kalayo gikan sa mission home sa Cape Town, South Africa.
Niadtong Septyembre 1950, walo ka misyonaryo gipadala aron ablihan pag-usab ang Southern Rhodesia. Lima ka bulan ang milabay, ang unang bunyag sa dapit nahitabo.
Natawo sa England niadtong 1926, si Hubert Henry Hodgkiss mibalhin sa Salisbury, Southern Rhodesia, niadtong 1949. Una siyang nasayud kabahin sa Simbahan gikan sa usa ka higala nga nagpatudlo sa ebanghelyo. Si Hugh adunay pagduha-duha sa gipahiuli nga ebanghelyo ug nagplano nga ipakita sa iyang higala nga ang Simbahan dili tinuod. Apan human sa seryusong pagsisik sa ebanghelyo, nakamugna si Hugh og pagpamatuod sa katinuod niini ug mihukom nga magpabunyag. “Nasayop ko,” miingon siya sa iyang higala. “Magpamiyembro ko sa Simbahan”1
Si Hugh nabunyagan niadtong Pebrero 1, 1951, nagtimaan sa unang bunyag nga kinabig sa Southern Rhodesia. Siya nalingaw nga makauban ang mga tawo ug nakighigala kon maasa man siya. Ang iyang pagkamahigalaon nagtugot kaniya nga makahimo og dakong kontribusyon sa pagtubo sa Simbahan sa dapit.
Niadtong 1959 si Hugh nahimong presidente sa Salisbury Branch. Ang iyang mga magtatambag mga lokal nga mga miyembro. Kini ang unang higayon nga ang kapangulohan sa branch gilangkuban sa lokal nga mga miyembro. Sa wala pa kini, ang full-time nga mga misyonaryo mao ang nagbuhat sa responsibilidad sa kapangulohan sa branch.
Ernest Sibanda
Nahimamat ni Ernest Sibanda ang duha ka Mormon nga misyonaryo nga nagbiseklita—Elder Black ug Elder Kaelin—niadtong Disyembre 1978. Gibinlan siya nila og Basahon ni Mormon. Sa wala pa sila mobisita, daghang tuig na si Ernest nga nagtuon og relihiyon. Gani, siya nahimong magtutudlo sa ilang simbahan sulod sa siyam ka tuig ug pastor sulod sa tulo ka tuig.
Nianang gabhiona nga nadawat ni Ernest ang iyang kopya sa Basahon ni Mormon nagmata pa siya hangtud alas-2:00 sa kadlawon madasigong nagbasa. Naghinam-hinam siya nga makigkita sa mga misyonaryo sa sunod adlaw. Si Ernest miingon kanila nga siya mas nakakat-on og daghan kabahin ni Jesukristo gikan ni Joseph Smith kay sa tanang mga ministro nga iyang nakahimamat. Sa wala madugay nabunyagan si Ernest, gisundan sa iyang asawa ug mga bata mga pipila ka semana ang milabay.
Kabahin sa iyang bunyag, siya misulat “Mibati ko nga gawasnon gayud. Mibati ko nga nakagawas sa tanang dautan. Akong nakaplagan ang akong gugma para sa akong pamilya. Akong nakaplagan ang gugma para sa Simbahan.”2
Si Ernest Sibanda namatud-ang dakong kalig-on sa Simbahan. Nagserbisyo siya isip presidente sa Sunday School, klerk sa branch, ug ikaduhang magtatambag sa kapangulohan sa branch. Gituman usab niya ang usa ka buluhaton gikan sa presidente sa misyon sa South Africa sa paghubad sa mga himno gikan sa Iningles ngadto sa Shona.
Edward Dube
Niadtong Abril 2013 nga kinatibuk-ang komperensya, si Edward Dube gitawag nga mahimong sakop sa Unang Korum sa Seventy, nakapahimo kaniya nga unang General Authority sa Simbahan gikan sa Zimbabwe. Kini ang pinakabag-o sa daghang mga hitabo nga nahimong una si Elder Dube. Siya usab ang unang lumad nga presidente sa stake, unang lumad nga presidente sa misyon, ug unang lumad nga area seventy sa Zimbabwe. Si Elder Dube nahimong matinuorong pioneer sa matarung nga pagpangulo.
Sa wala pa kadto, bisan pa niana, dihay laing una para kang Elder Dube: iyang unang adlaw sa pagsimba. Duha ka tuig sa wala pa siya mosimba sa unang higayon, gihatagan siya og Basahon ni Mormon sa usa ka Santos sa Ulahing mga Adlaw diin siya nagtrabaho. Gibasa ni Elder Dube ang Basahon ni Mormon ug mibati sa impluwensya ug gahum niini.
Niadtong Pebrero 1984 gidawat ni Elder Dube ang pagdapit sa pagtambong sa miting sa pagpuasa ug pagpamatuod sa usa ka lokal nga branch. Gikulbaan siya kaayo sa iyang pagsulod sa chapel nga hapit siya mobalik og gawas diha-diha dayon.
Sa wala madugay, hinoon, ang pagbati ni Elder Dube nausab sa dihang ang presidente sa branch mibarug ug nagpamatuod sa Basahon ni Mormon. Ang pagpamatuod sa Basahon ni Mormon usa sa butang diin si Elder Dube mibati nga kapareha sila. Siya mibarug ug mipakigbahin sa iyang kaugalingong mga hunahuna ug pagbati sa Basahon ni Mormon human nagpamatuod ang ubang mga miyembro.
Sa wala madugay human niadtong unang miting sa sakrament, si Elder Dube misugod sa kinasingkasing nga pag-imbestigar sa Simbahan. Pipila ka bulan ang milabay nabunyagan siya. Dayon mialagad siya og full-time nga misyon sa Zimbabwe Harare Mission. Giminyoan ni Elder Dube si Naume Keresia Salizani niadtong Disyembre 9, 1989. Sila adunay upat ka mga anak.
Nakasaksi si Elder Dube sa daghang kalampusan ug kalisud sa mga Santos sa Zimbabwe isip resulta sa politikanhong kagubot. Niining tanang panghitabo, siya misalig sa Ginoo alang sa kalig-on ug giya. “Akong gihinumdoman ang akong kasinatian sa kinabuhi ug tinud-anay mapasalamaton ko,” siya miingon. “Ang ebanghelyo maoy pinakaimportante sa akong kinabuhi.”3
“Para nako, si Elder Dube mao ang Brigham Young o Wilford Woodruff sa Zimbabwe,” miingon si Presidente Keith R. Edwards, kanhi sakop sa Seventy nga karon nagserbisyo isip presidente sa England Missionary Training Centre. Si Presidente Edwards mao ang presidente sa misyon sa Zimbabwe Harare Mission gikan 2000 hangtud 2003 ug mitrabaho og maayo uban ni Elder Dube, kinsa nagserbisyo isip presidente sa stake nianang panahona. “Si Elder Dube adunay panan-awon kon unsay mahimo gyud sa ebanghelyo ug sa unsang paagi kini angay nga himoon”4
Misyonaryo nga Paningkamot sa Zimbabwe
Sa iyang panahon sa Zimbabwe, si Presidente Edwards nakasaksi mismo sa paglambo sa Simbahan sa yuta nga nagkadaghan ang midawat sa ebanghelyo. “Ang mga tawo sa Zimbabwe malipayon sa kinabuhi,” miingon si Presidente Edwards. “Sila malipayon ug, sa ilang kinaiya, espirituhanon kaayo. Sila sayon ra nga tudloan.”
Mipasabut si Presidente Edwards nga ang name tag sa misyonaryo—tungod kay aduna kini ngalan sa Manluluwas—mao ang usa sa labing sayon nga paagi nga ang misyonaryo makasugod og istorya ngadto sa mga Taga-Zimbabwe. Sa kasagaran ang mga lumad mobasa sa ngalan sa Simbahan ug mainteresado. “Sila moingon, ‘Kami mga higala usab ni Jesukristo.’ Kini makapasuod dayon,” miingon si Presidente Edwards.
Adunay daghan pa nga umaabut nga mga lider ug pioneer nga nagpamiyembro sa Simbahan sa Zimbabwe. “Busy kanunay ang mga misyonaryo,” miingon si Presidente Edwards.