Ang Komperensya ug Ako

Sa una naghunahuna ko nga ang kinatibuk-ang komperensya dugay ug laay, apan sa paglabay sa panahon, naganahan ko og maayo ug naghinam-hinam niini. Ang katapusan sa semana nga kinatibuk-ang komperensya mahimong espirituhanong makapadasig, apan daling mawala kining mga pagbati kon ang normal nga kinabuhi magpadayon sa Lunes. Ang mosunod nga mga ideya nakatabang nako nga magpadayon sa pagpahimulos sa komperensya kutob sa mahimo.

Nangandam ko sa komperensya pinaagi sa pagsulat og mga pangutana, ug dayon magsulat ko samtang ang akong mga pangutana matubag. Pagkahuman, gusto nakong i-download ang mga pakigpulong sa komperensya ug musika gikan sa LDS.org ug ibutang kini sa usa ka MP3 player aron maminaw ko sa pakigpulong o himno samtang buhaton nako ang akong inadlaw nga buluhaton. Ganahan sab kong magtuon sa mga isyu sa komperensya sa Liahona. Mag-highlight ug magsulat ko diha sa kilid sa akong personal nga kopya. Kon moabut na ang sunod nga komperensya, gamit na kaayo ang akong magasin. Usahay dungan nga tun-an sa akong pamilya ang mga mensahe atol sa family home evening.

Ang pagbaton sa espiritu nga atong gibati atol sa komperensya ug pagkat-on sa mga mensahe kinahanglan nga trabahuan, apan ang pagbuhat niini nahimong dakong panalangin alang kanako. Nakadawat ko og dakong kalig-on ug giya panahon sa panginahanglan pinaagi sa pagtuon sa mga mensahe gikan sa kinatibuk-ang komperensya, ug nasayud ko nga kining mga mensahe dinasig.