Ennaan eo an Būreejtōnji eo Kein Kajuon
Juon Emjak Epen im Dim
Eaar wōr aō iien em̧m̧an jidik iien em̧oot ļo̧k n̄an jerak ļo̧k ioon juon tim̧a ekilep iturin ļo̧k lo̧jet in Alaska, USA. Tōre eo kapen eo ej m̧aanjebpopo n̄an an tim̧a eo joļo̧k juon bon̄ ilo juon āne eļamļam (bay), eaar lukkuun lale jikin eo im jekjek ko ie, āinwōt wāween an ibwij tok im pāāt ļo̧k, m̧wilaļ in dān ko, im kōtaan jān men ko rekauwōtata. Ke eaar ju būruwōn, eaar joļo̧k em̧jak eo bwe tim̧a eo en maron̄ kōjparok im lukkuun pen emjak eo an, kōtļo̧k juon iien em̧m̧an n̄an pajinjea ro n̄an alooje kōm̧anm̧an kein raiboojoj im em̧m̧an an Anij.
Ke iaar reilo̧k n̄an tōrerein pārijet, iaar kile bwe tim̧a eo eaar pāļo̧k jidik kōn jidik kajoor in kōto im ņo. Mekarta, tim̧a eo eaar depdep wōt im pād wōt ilowaan peļaak eo eaar kwaļo̧k kajoor in to im emjak eo im kajoor in emjak eo.
Kapen eo eaar jab likūt emjak eo ioon tim̧a eo, pojak n̄an lelaļ ļo̧k wōt eļan̄n̄e juon kōto enaaj jerjer im waļo̧k. Jaab, eaar emjake wa eo āinwōt juon wāween bōbrae im kar kōjparoke tim̧a eo jān an em̧m̧akūt ļo̧k n̄an dān ko rekauwōtata ak peļo̧k jidik itaak laļ ilo an pajinjea ro im rijerbal ro en̄jake kōjparok.
Ke iaar ļōmņak kōn jekjek in, Būreejtōn Uchtdorf eaar ba bwe eļan̄n̄e menin eaar jab juon iien em̧m̧an n̄an juon bwebwenato innām ej jamin naaj kattōre juon baļwun.
Etke Jej Aikuji Emjak ko
Kōttōpar eo an juon emjak ej n̄an kōjparok juon tim̧a im kapen e ilo juon jikin m̧ōņōņō kake ak n̄an jipan̄ kōjebwebweik tim̧a eo ilo lan̄ eo enana. Kōn menin, n̄an kōttōprak jibadbad kein raorōk, āinwōt bōk emjak ej jab bwe. Emjak eo ej aikuj pen, maron̄ lōke, im jejjet kōjerbal e ilo iien im jikin eo ejim̧we.
Kajjojo armej im baam̧le ko rej aikuji emjak ko barāinwōt.
Kabūrom̧ōjm̧ōj emaron̄ itok n̄e juon lan̄ ej uk ļo̧k kōj jen iaļ eo im kaam̧jak kōj n̄an ketaak kōj ippān dōkā ko. Ak jet iien jej barāinwōt pād ilo kauwōtata men̄e men otemjej rej āinwōt rem̧m̧an—kōto ko im dān ko relūr im ļaae. Ilo m̧ool, jemaron̄ in pād ilo eļap kauwōtata n̄e jej peļo̧k im oktak in m̧akūtkūt ej jab lukkuun alikkar bwe jenan̄in jab kile.
Ko̧jpeļ Eo Ej Emjak Eo Ad
Emjak ko rej aikuj pen, kajoor, im em̧m̧an kōm̧adm̧ōdi n̄an pojak n̄e aikuji. Ilo kakkobaba, rej aikuj in ekkejel ļo̧k ippān juon pedped eo emaron̄ kotak eddo in kajoor in kareel ko rej jum̧ae.
Aaet, ko̧jpeļ eo an Jisōs Kraist ej juon emjak. Kar kōpooje jen Rikōm̧anm̧an eo an men otemjej n̄an juon jibadbad ekwojarjar im kar ejaake n̄an letok kōjparok im tōl n̄an ajri ro Nejin.
Ta ko̧jpeļ eo, ālkin men otemjej, ijjelo̧kin karōk eo an Anij n̄an lo̧mo̧o̧ren ajri ro Nejin im kōro̧o̧ltok er n̄an im̧aan Mejān?
Jeļā bwe ej piktokin men otemjej n̄an peļo̧k, jej aikuj kadim emjak ko ad ioon dōkā in ko̧jpeļ eo em̧ool. Rej jab aikuj in wanlaļļo̧k ioon bok in utiej bōro ko ak un̄ūr jidik in wōt tōmak ko ad.
Allōn̄ in, ewōr juon ad iien em̧m̧an n̄an ron̄jake jān rikarejar ro an Anij ilo juon kweilo̧k eļap an Kabun̄ in. Naan ko aer, kar kobaļo̧k ippān jeje ko rekwojarjar im im̧we ko an Jetōb eo, rej bōktok juon dōkā epen im dim kōn pedped in aorōk ko an indeeo im pedped ko, ko jemaron̄ ekkejel ippāer n̄an emjak ko ad bwe jen maron̄ dim wōt im kōjparok ilubwilijin apan̄ ko im kapo ko an laļ in.
Rikanaan eo etto Hilamōn eaar katakin, “Ej ioon ejm̧aan in ad Ri Pinmuur, eo ej Kraist, eo Nejin Anij, bwe kom̧ij aikuj kalek pedped ko ami; bwe n̄e devil enaaj jilkintok kōto ko an rekajoor, aaet, mōdi ko an ilo aire, aaet, n̄e aolep wōt dekā im lan̄ rekkajoor an renaaj bun̄it eok, enaaj ejjeļo̧k an kajoor ioom̧ n̄an kinōōrļo̧k laļļo̧k eok n̄an ron̄ in būrom̧ōj im wo ejjeļo̧k jem̧ļo̧kin, kōnke ejm̧aan eo kom̧ ar ekkal ioon, eo ej pedped em̧ool, pedped eo eļan̄n̄e armej rej ekkal ioon rej jamin bun̄” (Hilamōn 5:12).
Aorōk in Emjak ko Redim
Mour ewōr juon wāween an idajon̄jon̄i emjak ko im mālijjon̄e kōj n̄an peļo̧k. Mekarta, eļan̄n̄e emjak ko ad rej jejjet pād ioon dōkā in ad Ripinmuur eo, renaaj dāpdep wōt—jekdoon kajoor in kōto eo, kajoor in ibwijļo̧k im pāātļo̧k, ak utiej in ņo̧ ko.
Aaet, juon tim̧a eo eaar jab kōm̧anm̧an n̄an pād wōt jab m̧akūtkūt ilo juon ob ijjelo̧kin eaar kōm̧anm̧an n̄an kotak emjak eo im jerak ilo m̧aļo ko an mour. Ak ej juon bwebwenato n̄an bar juon iien.
N̄an kiiō, ij bōk kainōm̧m̧an ijeļā bwe emjak eo an ko̧jpeļ eo im dōkā in ad Ripinmuur enaaj kōjparok kōj pojak im kōjparok.
Kain emjak rot in enaaj kōjparok kōj jān peļo̧k ilo kauwōtata im jerata. Enaaj letok n̄an kōj iien eaiboojoj n̄an lan̄lōn̄ kōn aiboojoj ko ban keidi rookitaktak im m̧ōttan ko reim̧we an mour.
Mour eaboojoj im wōrtokjen. Kōto, lan̄, im ņo̧ rej jerjer maron̄ kapo kōj n̄an peļo̧k n̄an kauwōtata ko loi ak jab loi, ak ennaan eo an ko̧jpeļ eo im kajoor eo an ekwojarjar enaaj kōjparok kōj ilo iaļ eo ad ļo̧k n̄an ob in kōjparok eo an Jemedwōj Ilan̄.
Jen, kōn menin, jab ron̄jake wōt kōnono ko an kweilo̧k eo an Eprōļ ak barāinwōt mour kaki ennaan ko aer āinwōt juon emjak edim n̄an mour ko ad aolep iien.
Anij en kōjeram̧m̧an im tōl kōj ilo kijejeto in eaorōk im em̧m̧an!
Katakin jān Ennaan In
Ļōmņak in kōnono kōn aorōk in emjak ko ilo iien eo baam̧le eo an Liai eaar jerkak n̄an ānen kalim̧m̧ur (lale 1 Nipai 18). Komaron̄ in kwaļo̧k 1 Nipai 18:11–15, iien ke Nipai ej loļo̧k, liaona eo ejjab jerbal, im tim̧a eo ej em̧m̧akūt kōn lan̄ ko rekauwōtata. Ta jekjek ko jej jelm̧ai n̄e jej jab kapen emjak eo ad ilo ko̧jpeļ eo? Komaron̄ in kwaļo̧k 1 Nipai 18:21–22 im kōnono kōn wāween ad maron̄ lo kōjparok jen reilo̧k n̄an Rilo̧mo̧o̧r eo.