Kalim̧m̧ur an Porter

Ke ļeo jemān kōrā eo pāleeō eaar mej, baam̧le eo am̧ kar kuktok ippān doon n̄an iakiakwe armej ro raar itok n̄an kwaļo̧k aer kautiej. Ilo aolepān joten eo, ke iaar loļo̧k baam̧le eo im ro m̧ōtta, emakijkij aō kar kile ļaddik eo jibūn 10 iiō dettan, Porter, ej jutak turin lio jinen ļeo ippa—eo jibūn. Jet iien eaar jutak itulikin, mije. Ke iaar jeļā pein eaar jibwe pein. Iaar lale an pein jibwe, atbakwōje jidik, im jutak ikōjaan.

Ium̧win jet raan ko ālkin jekjek jab in, iaar jab maron̄ joļo̧k pija in jān ļōmņak eo aō. Kar im̧we eō n̄an jilkin ļo̧k n̄an Porter juon email. Iaar jiron̄ e ta iaar loe im en̄jake. Iaar kakeememej e kōn bujen ko eaar kōm̧m̧ani ke eaar peptaij, kōnono jān naan ko an Alma ilo Mosaia jebta 18:

“Āinwōt kom̧ij kōņaan itok ilo wōrwōr an Anij, im kom̧ij m̧ōņōņō n̄an ineek eddo ko an ro jet, bwe ren maron̄ mera;

“Aaet, im kom̧ij m̧ōņōņō in jan̄ ippān ro rej jan̄; aaet, im kaenōm̧m̧an ro rej pād ilo aikuj in aenōm̧m̧an, im n̄an jutak āinwōt ri kam̧ool ro an Anij ilo aolep iien ko im ilo aolep men otemjeļo̧k, im aolep jikin ko kom̧ maron̄ pād ie, em̧ool m̧ae mej … bwe kom̧in maron̄ bōk mour indeeo—

“… Eļan̄n̄e en̄in ej ikdelel eo an buruōmi, ta ippāmi ņae baptaise ilo etan Irooj, āinwōt juon ri kam̧ool im̧aan mejān ke em̧ōj ami kar deļo̧n̄e juon bujen Ippān, bwe kom̧ naaj jerbal n̄an E im kōjparok kien ko An, bwe E en maron̄ lutōkleplep eļapļo̧k Jetōb eo An ioomi? (eoon 8–10).

Iaar kōmeļeļeik Porter bwe Alma eaar katakin bwe ro me rej kōņaan kar peptaij raikuj in m̧ōņōņō in jerbal n̄an Irooj kōn jerbal n̄an ro jet—kōn aolepān mour ko am̧! Iaar ba: “Ijjab jeļā eļan̄n̄e kwar kile, bōtaab wāween eo kwaar kwaļo̧k iakwe im n̄ūrbōktak n̄an Būbū, eaar kōjparok bujen ko am̧ Jej kōjparok bujen ko ad aolep raan ilo ad jouj, kwaļo̧k iakwe, im kōjparok doon. Iaar kōņaan bwe kwon jeļā eutiej būruwō kōn eok kōņ am̧ juon rikōjparok bujen! Ilo am̧ kōjparok bujen eo kwar kōm̧m̧ane ke kwar peptaij, kwonaaj kōppopo n̄an ekkapit n̄an priesthood eo. Bujen in enaaj lewaj n̄an eok eļapļo̧k iien ko rem̧m̧an n̄an kōjeram̧m̧an im jerbal n̄an ro jet im jipan̄ eok kōppopo n̄an bujen ko kwonaaj kōm̧m̧ani ilo tampeļ. Kom̧ool kōn am̧ juon waanjon̄ok em̧m̧an n̄an n̄a! Kom̧ool kōn am̧ kwaļo̧k n̄an eō ta eo ej āinwōt erom juon rikōjparok bujen!”

Porter eaar uwaak: “Būbū, kom̧ool kōn ennaan eo. Iien otemjej iaar atbakwoj Būbū, iaar jeļā bwe iaar kōjparok bujen ko, ak iaar en̄jake māņāān in būruwō im en̄jake em̧m̧an. Ijeļā bwe eaar Jetōb Kwojarjar eo ej pād ilo būruwō.”

Iaar barāinwōt en̄jake okmāņāān ilo būruwō ke iaar kile bwe Porter eaar jeļā bwe n̄e ej kōjparok bujen ko, enaaj aolep iien pād ippān Jetōb eo an [Jemedwōj Ilan̄] [lale D&C 20:77]. Menin ej juon kalim̧m̧ur kar kapidodo jān bōk menin letok eo an Jetōb Kwojarjar.