“Sayon ra Kaayo Kana, Lolo!”
Gikan sa pakigpulong sa Abril 2013 nga kinatibuk-ang komperensya.
“Kamo nagasusi sa mga kasulatan, kay nagahunahuna man kamo nga pinaagi niini makakaplag kamo sa kinabuhing dayon: ngani kini mao ang nagapanghimatuod mahitungod kanako” (Juan 5:39).
Gimahal nako ang Basahon ni Mormon ug ang akong Manluluwas, nga si Jesukristo. Usa ka adlaw nangutana ko sa akong apong babaye nga si Raquel kon unsay iyang hunahuna bahin sa paghimo og tumong sa pagbasa sa Basahon ni Mormon. Bag-o lang nakat-on si Raquel sa pagbasa.
“Apan, Lolo,” siya miingon, “lisud kaayo na. Baga kana nga libro.”
Dayon gihangyo nako siya sa pagbasa kanako og usa ka pahina. Nagkuha ko og stopwatch ug giorasan ang iyang pagbasa. Miabut lang og tulo ka minuto ang iyang pagbasa sa pahina.
Among basahon ang Basahon ni Mormon sa Kinatsila, ug ang bersyon sa Basahon ni Mormon sa Kinatsila dunay 642 ka mga pahina. Giingnan nako siya nga kini molungtad og 1,926 ka minuto sa pagbasa sa tibuok nga basahon.
Nakapahadlok hinoon niya kini, mao nga akong gibahin kana sa 60 ka minuto. Giingnan nako siya nga 32 ka oras ra ang pagbasa sa basahon. Wala kaabut og usa ka adlaw ug tunga!
Dayon siya miingon nako, “Sayon ra kaayo kana, Lolo.”
Misobra og gamayng panahon ang pagbasa ni Raquel, iyang igsoon nga lalaki, Esteban, ug among mga apo sa Basahon ni Mormon. Kini tungod kay kon mobasa kami niini, kami kinahanglan nga mogahin og panahon sa pag-ampo ug sa paghunahuna kon unsay among gibasa.
Sama ni Raquel ug Esteban, kitang tanan makakat-on sa paghigugma sa mga kasulatan. Dayon ang matag usa nato makasinggit: “Pagkatam-is gayud sa imong mga pulong sa akong pagtilaw! oo, labing matam-is pa kay sa dugos sa akong ba-ba!” Mga Salmo 119:103.