Ekōjkan Aer Jeļā?

Būreejtōn Dieter F. Uchtdorf, Rikakipilōklōk eo Kein Karuo ilo Būreejtōnji eo Kein Kajuon, eaar leļo̧k juon ennaan n̄an sister ro ilo Doulul eo an Kōrā ro ilo 2011 kweilo̧k eo eļap an Doulul eo an Kōrā me eaar un̄ur būruwō im letok n̄an eō aenōm̧m̧an. Eaar kōnonon kōn wut eo edik forget-me-not im ekōjkan an bōlōk ko ļalem bōk jikin men ko ļalem jej aikuj in aolep iien kememeji.¹

Ālkin kweilo̧k eo leddik eo neju Alyssa eaar jiron̄ eō juon bwebwenato kōn eo m̧ōttan Jessie, eo ewōr juon an im̧ōn kōm̧m̧an m̧ōn̄ā. Ritōl ro ilo Doulul eo an Kōrā ro raar kajjitōk ippān Jessie n̄an kōm̧m̧ane juon kōm̧aolaļ im ajije ālkin kweilo̧k eo eļap an Doulul eo an Kōrā. Jessie eaar ba n̄an Alyssa em̧ōkaj an kar jeļā ta eo eaikuj in kōm̧m̧ane—250 cupcake ko. Alyssa eaar baļentier n̄an jipan̄ būk ļo̧k cupcake ko n̄an stake center eo.

Raan eo kweilo̧k eo eaar jikrōk tok, im ke Alyssa eaar ilo̧k im jipan̄, liin eaar lo Jessie ebaj jan̄ wōt. Cupcake ko raar pojak, bōtaab Jessie eaar jilkinļo̧k juon pijaer n̄an juon nukin me eaar ba rejjab lukkuun im em̧m̧an n̄an kweilo̧k eo.

Jessie eaar jino pere e make. Liin eaar ba bwe ritōl ro ilo Doulul eo an Kōrā ilo stake ren kar kōtmene jet cupcake ko rennoļo̧k jen cupcake ko an. Liin eaar kanooj kajieon̄ in pukot juon wāween n̄an kainōknōki cupcake ko, bōtaab eaar jabwe iien. Liin im Alyssa raar bōk cupcake ko āinwōt jekjek eo aer, kōn an Jessie en̄jake bwe liin kaenepataik sister ro—m̧ae iien eo Būreejtōn Uchtdorf eaar kōnono.

Ke ej kōnono kōn wut eo forget-me-not, juon pija in wut ebūļu eaar waļo̧k ilo screen eo. Eaar juon wut ejej uwaan bōtaab kanooj in aiboojoj kōn wub in bōlōk ko an. Ennaan eo an Būreejtōn Uchtdorf eaar un̄ur būruwōn kajjojo ilo an kar akweļap ippam̧ n̄an jab ebbwer kōn jon̄an dettan inōknōk ko ipeļakid me jemaron̄ meļo̧kļo̧k pedped ko ļalem ak m̧ool ko raorōk eaar katakin kōm̧.

Ālkin jar in ikkilōk eo, sister ro raar jibadōk ļo̧k cultural hall eo. Ke Alyssa im Jessie raar deļo̧n̄ļo̧k, raar lo an aolep jepooļ tebōļ in kōm̧aoļaļ eo im kajjitōk, “Ekōjkan aer kar jeļā?”

Kajjojo cupcake kar būro̧jtin̄i kōn būro̧jtin̄ mouj wōt im kainōknōke kōn juon ļalem bōlōk in forget-me-not ejej uwaan, aiboojoj, emeoeo.