Kallim̧ur eo Eaar Letok n̄an Eō Kōjatdikdik

Ālkin wōt an ļeo ippa im n̄a kar m̧are, kōm̧ ar jeram̧m̧an kōn juon nejūm̧ ļaddik. Ke iaar lo an ettōn̄dikdik im kalimjōk māj ko mājen, iaar en̄jake m̧uri n̄an Jema Ilan̄. Ļaddik eo nejūm̧ eaar weppān n̄an n̄a. Ļeo ippa im n̄a kar kam̧oolol Irooj raan kajjojo kōn juon menin letok eo eaorōk.

Ilo Pāpode 19, 2009, Iaar kōppopo in jepļaak n̄an bar jikuul n̄an iiō in kūlaaj ko aō āliktata. Ļeo ippa im n̄a kar jab jeļā bwe raan eo tok juon ļaddik eo nejūm̧ ejitenbōro en kar bōk juon piba im kar ilo̧k jen mour in.

Eaar juon en̄jake epen n̄an n̄a n̄an bōke. Membōr ro ilo ward eo am̧ raar itok n̄an m̧weo im̧ōm̧ n̄an kaenōm̧m̧an kōm̧ kōn eoon ko im al ko im jar ippam̧. Iaar m̧ōņōņō kōn naan in tiriam̧o ko aer, bōtaab būrom̧ōj eo aō kōn ļaddik eo nejū eaar wōnm̧aanļo̧k wōt. Jabdewōt iien iaar ļōmņak kōn e, māj ko māja raar erom obrak kōn kōmjaalaļ.

Emen raan ālkin mej eo an, iaar en̄jake n̄an ekkatak Teachings of Presidents of the Church: Joseph Smith Ke iaar jibwe bok eo, ej peļļo̧k ilo peiū n̄an jepta eo kar taitōļ in “Naan ko an Kōjatdikdik im Kaenōm̧m̧an ilo Iien Mej.” Iaar jino riit im kar lukkuun m̧weer kōn kabūrom̧ōjmōj eo ejelet Joseph im Em̧m̧an ke raar jino baam̧le eo aer. Ke iaar tōpar juon naan ekadu jān Rikanaan eo eaar kwaļo̧k ilo ilomej eo an leddik eo ruo-iiō dettan, iaar en̄jake āinwōt eļan̄n̄e dān m̧ōļo eaar lutōk ioon bōra, kōmeraik ļo̧k ļōmņak in būrom̧ōj ko aō.

Iaar kūr tok ļeo ippa. Kōm̧ ar riit ippān doon: “Iaar … kajjitōk kajjitōk eo, etke ajri ro reddik, ajri ro ejjeļo̧k aer jerawiwi, rej bōk er jān kōj. … Irooj ej bōkļo̧k elōn̄, em̧ool ilo aer iddik wōt, bwe ren maron̄ eļļā … būrom̧ōj ko im nana ko an laļ in rainin; raar lukkuun erreo, lukkuun aiboojoj, n̄an mour ioon laļ in; kōn menin, eļan̄n̄e ejim̧we ad meļeļe, ijelo̧kin būrom̧ōj ewōr unin ad m̧ōņōņō ilo aer deeor jān nana, im enaaj bar m̧ōkaj ad bōk er juon alen.”

Rikanaan eo eaar ba: “Juon kajjitōk maron̄ in kajjitōk—‘M̧am̧a ro ren ke bar bōk ajri ro nejier indeeo?’ “Aaet! “Aaet! M̧am̧a ro, kom̧ naaj bōk ajri ro nejimi; bwe enaaj wōr aer mour indeeo, bwe m̧uri eo aer em̧ōj kōļļāiki.”¹

Jān tōre eo kōm kar riiti naan ko raiboojoj, jar ko an baam̧le eo am raar obrak kōn kam̧oolol kōn kallim̧ur eo kōn Pinmuur eo an Jisōs Kraist kom̧ naaj bar pād ippān ļaddik eo nejim.

Rainin ewōr jilu nejūm̧ ajri ro raiboojoj, jatin ļaddik eo nejūm̧ ekar mej. Kōm̧ij katakin er m̧ool eo im ko̧jpeļ eo indeeo, eo enaaj tōl ļo̧k er n̄an Jemeer Ilan̄ im n̄an aer Rilo̧mo̧o̧r, Jisōs Kraist.

Ijeļā bwe ennaan eo an Rikanaan Joseph Smith kōn mour ālkin mej ej m̧ool. Inaaj m̧ōņōņō indeeo kōn kōjatdikdik, aenōm̧m̧an, lan̄lōn̄, im lem̧ōņōņō eo ej itok n̄an baam̧le eo am̧—jim̧or ilo rājet in ron̄ol eo.