Ang Linain nga mga Saksi Nagpamatuod sa Buhi nga Kristo
Ang mga sakop sa Unang Kapangulohan ug Korum sa Napulog Duha ka mga Apostoles mga modernong mga propeta, manalagna, ug tigpadayag kinsa mobarug isip “talagsaon nga mga saksi sa ngalan ni Kristo sa tibuok nga kalibutan” (D&P 107: 23). Sa ingon, sila adunay responsibilidad sa pagpamatuod sa kabalaan ni Jesukristo ug sa Iyang misyon isip Manluluwas ug Manunubos sa kalibutan.
Sa mosunod nga mga kinutlo, kining pinili ug sinugo nga mga tawo mipakigbahin sa ilang mga pagpamatuod sa Pag-ula sa Manluluwas, Pagkabanhaw, ug buhing kamatuoran.
Si Jesus Mao ang Atong Manunubos
“Sa tibuok nakong kasingkasing ug tumang pagbati sa akong kalag, mangusog ako sa akong tingog agig pagpamatuod isip usa ka linain nga saksi ug mamahayag nga ang Dios tinuod gayud nga buhi. Si Jesus Iyang Anak, ang Bugtong Anak sa Amahan sa unod. Siya ang atong Manunubos; Siya ang atong Tigpataliwala sa Amahan. Siya kadto ang namatay sa krus aron sa pagtubos sa atong mga kasal-anan. Nahimo Siya nga unang mga bunga sa Pagkabanhaw. Tungod kay Siya namatay, ang tanan gayud mabuhi pag-usab. ‘O, pagkanindot niining pulonga: ‘Ako nasayud nga ang akong Manunubos buhi!”’ [“Ako Nasayud Nga Akong Manunubos Buhi” Mga Himno ug mga Awit sa mga Bata, nu. 38].”
Presidente Thomas S. Monson, “Ako Nasayud Nga Ang Akong Manunubos Buhi!” Ensign o Liahona, Mayo 2007, 25.
Ako Usa ka Saksi
“Saksi ako sa Pagkabanhaw sa Ginoo sama kasigurado nga didto ko sa gabii uban sa duha ka disipulo sa balay sa Emaus. Nahibalo ko nga buhi Siya sama kasigurado kang Joseph Smith dihang nakita niya ang Amahan ug ang Anak sa kahayag sa nagsanag nga kabuntagon sa kakahoyan sa Palmyra. …
“… Mopamatuod ako isip saksi sa nabanhaw nga Manluluwas ug atong Manunubos.”
Presidente Henry B. Eyring, Unang Magtatambag sa Unang Kapangulohan, “Umari Kanako, Ensign o Liahona, Mayo 2013, 25.
Ang Pag-ula ug Kaluwasan
“Ang Dios nga Amahan mao ang tigpasiugda sa ebanghelyo; kini mahinungdanong bahin sa plano sa Dios sa kaluwasan, o plano sa katubsanan. Kini gitawag nga ebanghelyo ni Jesukristo tungod kay ang Pag-ula ni Jesukristo ang mohimo sa katubsanan ug kaluwasan nga posible. Pinaagi sa Pag-ula ang tanang lalaki, mga babaye, ug mga bata walay kondisyon nga gitubos gikan sa pisikal nga kamatayon, ug ang tanan matubos gikan sa ilang kaugalingong mga sala uban sa kondisyon sa pagdawat ug pagsunod sa ebanghelyo ni Jesukristo… .
“Niini ako mohatag og saksi uban sa tibuok nakong kasingkasing ug hunahuna.”
Presidente Dieter F. Uchtdorf, Ikaduhang Magtatambag sa Unang Kapangulohan , “Wala Ba Kita’y Rason nga Maglipay?” Ensign o Liahona, Nob. 2007, 19, 21.
Si Jesus Mao ang Kristo
“Ako nasayud nga ang Dios mao ang atong Amahan. Iyang gipaila ang Iyang Anak, si Jesukristo, ngadto kang Joseph Smith. Ako mamahayag kaninyo nga ako nasayud nga si Jesus mao ang Kristo. Ako nasayud nga Siya buhi. Siya natawo sa tunga-tungang panahon. Siya nagtudlo sa Iyang ebanghelyo ug gisulayan. Siya nag-antus ug gilansang sa krus ug nabanhaw sa ikatulong adlaw. Siya, sama sa Iyang Amahan, adunay lawas nga unod ug bukog. Siya mihimo sa Iyang Pag-ula. Kaniya ako mosaksi. Kaniya ako usa ka saksi.”
Presidente Boyd K. Packer, Presidente sa Korum sa Napulog Duha ka mga Apostoles, “Ang Napulog Duha,” Ensign o Liahona, Mayo 2008, 87.
Panglukat sa Katawhan
“[Si Jesukristo] ang sentro sa mahangturong plano sa Amahan, ang Manluluwas nga gitagana isip lukat sa katawhan. Ang Dios mipadala sa Iyang Hinigugma nga Anak aron mobuntog sa Pagkapukan ni Adan ug Eva. Siya mianhi sa kalibutan isip atong Manluluwas ug Manunubos. Siya mibuntog sa babag sa pisikal nga kamatayon alang kanato pinaagi sa paghatag sa kaugalingon Niyang kinabuhi. Dihang namatay Siya sa krus, ang Iyang espiritu mibulag gikan sa Iyang lawas. Sa ikatulo nga adlaw ang Iyang espiritu ug ang Iyang lawas nagkahiusa sa mahangturon nga kahimtang, dili na magbulag pag-usab.”
Elder L. Tom Perry sa Korum sa Napulog Duha ka mga Apostoles, “Ang Plano sa Kaluwasan,” Ensign o Liahona, Nob. 2006, 71.
Ang Sentro nga Buhat sa Tibuok Tawhanong Kasaysayan
“Ang Pag-ula [sa Manluluwas] nahitabo sa Getsemani, diin Siya gisingot og daw apol (tan-awa sa Lucas 22:44), ug sa Golgota (o Kalbaryo), diin ang Iyang lawas gilansang ngadto sa krus ngadto sa ‘dapit sa kalabira,’ nga nagpasabut og kamatayon (Marcos 15:22; Mateo 27:33; tan-awa usab sa 3 Nephi 27:14). Kini nga walay kinutuban nga Pag-ula makapahimong gawasnon sa tawo gikan sa walay kinutuban nga kamatayon (tan-awa sa 2 Nephi 9:7). Ang Pag-ula sa Manluluwas naghimo sa pagkabanhaw nga usa ka reyalidad ug sa kinabuhing dayon nga posible alang sa tanan. Ang Iyang Pag-ula nahimong sentro nga buhat sa tibuok tawhanong kasaysayan.”
Elder Russell M. Nelson sa Korum sa Napulog Duha ka mga Apostoles, “Ang Kalinaw ug Hingpit nga Kalipay nga Mahibalo nga ang Manluluwas Buhi,” Ensign, Dis. 2011, 20; Liahona, Dis. 2011, 22.
Usa ka Sakripisyo alang sa Sala
“Nag-antus pag-ayo si Jesukristo aron isakripisyo ang Iyang Kaugalingon alang sa sala sa tanan. Kana nga sakripisyo nagtanyag og kaayo—ang putli nga Kordero—alang sa hilabihang kadautan—ang sala sa tibuok kalibutan. …
“Kanang sakripisyo—ang Pag-ula ni Jesukristo—anaa sa sentro sa plano sa kaluwasan. …
“Nasayud ko nga si Jesukristo mao ang Bugtong Anak sa Dios Amahan. Nasayud ko nga tungod sa Iyang maulaong sakripisyo, makaangkon kita og imortalidad ug oportunidad sa kinabuhing dayon. Siya ang atong Ginoo, Manluluwas, ug Manunubos.”
Elder Dallin H. Oaks sa Korum sa Napulog Duha ka mga Apostoles, “Sakripisyo,” Ensign o Liahona, Mayo 2012, 19, 22.
Ang Manluluwas Naggiya sa Iyang Simbahan Karon
“Ang Pag-ula ni Jesukristo maoy pinakaimportante nga bahin nga plano sa Langitnong Amahan para sa yutan-ong misyon sa Iyang Anak ug para sa atong kaluwasan. Mapasalamaton kaayo kita nga ang atong Langitnong Amahan wala mopataliwala apan hinoon mipugong sa Iyang pagkaamahan nga kinaiya sa pagluwas sa Iyang Bugtong Anak. Tungod sa Iyang walay katapusang gugma alang kanimo ug kanako, Siya mitugot kang Jesus sa pagtiwas sa Iyang giordinahan na daan nga misyon nga mahimong atong Manunubos. …
“Si Jesukristo, ang Manluluwas ug Manunubos sa tanang katawhan, dili patay. Siya buhi—ang nabanhawng Anak sa Dios buhi—mao kana ang akong pagpamatuod, ug Siya naggiya sa mga kalihokan sa Iyang Simbahan karon.”
Elder M. Russell Ballard sa Korum sa Napulog Duha ka mga Apostoles, “Ang Pag-ula ug ang Bili sa Usa ka Kalag,” Ensign o Liahona, Mayo 2004, 85, 86.
Atong Paglaum, Atong Tigpataliwala, Atong Manunubos
“Ang atong kasiguroan anaa sa [atong Langitnong Amahan] ug sa Iyang Hinigugmang Anak, si Jesukristo. Ako nasayud nga ang Manluluwas nahigugma kaninyo. Siya motabang sa inyong mga paningkamot sa paglig-on sa inyong pagpamatuod aron kini mahimong hingpit nga gahum alang sa kaayohan sa inyong kinabuhi, usa ka gahum nga mosuporta kaninyo sa panahon sa panginahanglan ug modala kaninyo og kalinaw ug kasiguroan niining panahon sa walay kasiguradoan.
“Isip usa sa Iyang mga Apostoles nga gitugutan sa pagsaksi Kaniya, maligdong kong mopamatuod nga ako nasayud nga ang Manluluwas buhi, nga Siya usa ka nabanhaw, nahimaya nga personahe sa hingpit nga gugma. Siya ang atong paglaum, atong Tigpataliwala, atong Manunubos.”
Elder Richard G. Scott sa Korum sa Napulog Duha ka mga Apostoles, “The Power of a Strong Testimony,” Ensign, Nob. 2001, 89; Liahona, Ene. 2002, 103.
Pag-inom sa Mapait nga Kopa
“Didto sa Tanaman sa Getsemani, ang atong Manluluwas ug Manunubos wala molikay sa pag-inom sa mapait nga kopa sa Pag-ula [tan-awa sa D&P 19:16–19]. Ug diha sa krus nag-antus na usab Siya sa pagbuhat sa kabubut-on sa Iyang Amahan, hangtud sa katapusan Siya miingon, ‘Tapus na’ [Juan 19:30]. Milahutay Siya hangtud sa katapusan. Agig tubag sa pagkamasulundon sa Manluluwas sa pagbarug nga lig-on, ang atong Langitnong Amahan mipahayag, “Tan-awa ang Akong Hinigugmang Anak, kinsa Ako nahimuot kaayo, kang kinsa Ako mihimaya sa akong ngalan’ [3 Nephi 11:7].
“… Atong himayaon ang ngalan sa Dios pinaagi sa lig-ong pagbarug uban sa atong Manluluwas, si Jesukristo. Ako mosaksi nga Siya buhi.”
Elder Robert D. Hales sa Korum sa Napulog Duha ka mga Apostoles, “Lig-ong Mobarug sa Balaan nga mga Dapit,” Ensign o Liahona, Mayo 2013, 51.
Bugtong Hingpit nga Anak sa Dios
“Nasayud ko nga ang Dios sa tanang higayon ug sa tanang pamaagi ug sa tanang kahimtang mao ang atong mahigugmaong Amahan sa Langit. Nasayud ko nga si Jesus mao ang Iyang bugtong hingpit nga anak, kansang kinabuhi mahigugmaong gihatag tungod sa kabubut-on sa Amahan ug sa Anak alang sa katubsanan natong tanan kinsa dili hingpit. Nasayud ko nga mibangon Siya gikan sa kamatayon aron mabuhi pag-usab, ug kay Iya kining nahimo, mao usab kaninyo ug kanako.”
Elder Jeffrey R. Holland sa Korum sa Napulog Duha ka mga Apostoles, “Nagatuo Ako,” Ensign o Liahona, Mayo 2013, 95.
Nasayud Ko nga ang Manluluwas Buhi
“Akong ipahayag ang akong pagsaksi ug pasalamat sa walay kinutuban ug mahangturong sakripisyo sa Ginoo nga si Jesukristo. Nahibalo ko nga buhi ang Manluluwas. Akong nasinati ang Iyang matubsanon nga gahum ug ang Iyang makaabag nga gahum, ug akong ipamatuod nga kining mga gahum tinuod ug maanaa alang sa matag usa kanato. Sa pagkatinuod, ‘sa kalig-on sa Ginoo’ makahimo kita ug makabuntog sa tanang butang samtang magpadayon kita sa atong panaw sa pagka-mortal.”
Elder David A. Bednar sa Korum sa Napulog Duha Ka mga Apostoles, “Ang Pag-ula ug ang Panaw sa Pagka-Mortal,” Ensign, Abr. 2012, 47; Liahona, Abr. 2012, 19.
Si Kristo Mituman sa Iyang Misyon
“Giangkon [sa Manluluwas] diha sa iyang Kaugalingon ang “palas-anon sa mga sala sa katawhan’ ug ang ‘mga kalisang nga mapahamtang … ni Satanas’ [James E. Talmage, Jesus the Christ, 613]. Niini nga proseso giantus Niya ang malimbungon nga mga paghusay ug ang makahahadlok, subo nga mga panghitabo nga misangput sa Iyang Pagkalansang. Kini sa katapusan misangko sa madaugong Pagkabanhaw ni Kristo pagka Dominggo sa Pasko sa Pagkabanhaw. Si Kristo mituman sa Iyang sagrado nga misyon isip Manluluwas ug Manunubos. Kita mabanhaw gikan sa kamatayon ug mahiusa ang atong mga espiritu uban sa atong mga lawas. …
“Ako mohatag sa apostolikanhon nakong pagpamatuod nga si Jesukristo buhi ug mao ang Manluluwas ug Manunubos sa kalibutan. Siya mihatag og agianan sa tinuod nga kalipay.”
Elder Quentin L. Cook sa Korum sa Napulog Duha ka mga Apostoles, “Kita Nagsunod ni Jesukristo,” Ensign o Liahona, Mayo 2010, 83–84, 86.
Ang Manluluwas Mitubos Kanato
“Ang pag-antus sa Manluluwas sa Getsemani ug ang Iyang paghingutas sa krus nagtubos nato gikan sa sala pinaagi sa pagtagbaw sa gipangayo sa kaangayan ngari kanato. Iyang kaloy-an ug pasayloon kadtong maghinulsol. Ang Pag-ula nagbayad usab sa utang nga nautang sa kaangayan nato pinaagi sa pag-ayo ug pagbayad nato sa bisan unsa nga pag-antus nga inosente natong giantus. ‘Kay tan-awa siya miantus sa mga kasakit sa tanan nga mga tawo, oo, ang mga kasakit sa tanan nga buhi nga binuhat, mga lalaki, mga babaye, ug mga bata, nga nahisakop sa banay ni Adan’ (2 Nephi 9:21; tan-awa usab sa Alma 7:11–12). …
“… Ang importante nga katubsanan anaa ni Jesukristo ug Kaniya lamang. Mapainubsanon ug mapasalamaton ako nga moila Kaniya isip Manunubos.”
Elder D. Todd Christofferson sa Korum sa Napulog Duha ka mga Apostoles, “Katubsanan,” Ensign o Liahona, Mayo 2013, 110, 112.
Ang Pagkabanhaw ug ang Kinabuhi
“Labaw sa tanan, kita mopahayag sa atong Manluluwas ug Manunubos, si Jesukristo. Ang tanan nga kita nahimo—ang tanan nga kita kanunay gayud—utang nato Kaniya. …
“Ang iyang mga pulong milanog sa tibuok siglo:
“‘Ako mao ang pagkabanhaw, ug ang kinabuhi: ang mosalig kanako, bisan siya mamatay, mabuhi siya:
“‘Ug ang tanan nga buhi ug nagasalig kanako dili na gayud mamatay’ (Juan 11:25–26).
“Mga kaigsoonan, Siya buhi. Siya nabanhaw. Siya naggiya sa Iyang balaan nga buhat dinhi sa yuta.”
Elder Neil L. Andersen sa Korum sa Napulog Duha Ka mga Apostoles, “Duol ngadto Kaniya,” Ensign o Liahona, Mayo 2009, 80.