Naan in Katak an Kōrā
Mijen eo Ekwojarjar an Jisōs Kraist: Rilo̧mo̧o̧r im Ripinm̧uur
Jar im katak ennaan in im pukōt n̄an jeļā ta eo n̄an kwaļo̧k. Ewi wāween meļeļe mour im mijen eo an Rilo̧mo̧o̧r eo naaj kōļapļo̧k tōmak eo am̧ ilo E im kōjeram̧m̧an ro otemjej kwōj oņaaki jen loļo̧k ko an kōrā? N̄an meļeļe ko reļļapļo̧k, etal n̄an reliefsociety.lds.org.
Tōmak, Baam̧le, Deeor
Ilubwilijin taitōļ eo elukkuun em̧m̧an an Jisōs Kraist ej Ripinmuur,” Elder D. Todd Christofferson jen Doulul eo an Jon̄oulruo Rijilōk ro eaar ba. “Pinmuur ej meļeļein kōļļāik juon eddo ak juon m̧uri. Pinmuur emaron̄ barāinwōt n̄an lo̧mo̧o̧ren ak kanemkwoj āinwōt kōļļāik juon m̧uri. … Kajjojo iaan meļeļe kein rej kwaļo̧k jekjek ko roktak an Pinmuur eo eļap eaar tōprak jen Jisōs Kraist kōn Pinmuur eo An, eo ekitbuuj, ilo naan ko an tikjinede eo, ‘n̄an bōk ļo̧k jān jerawiwi im ruwōn, āinwōt jen juon en̄taan kar kōm̧m̧ane n̄an rijerawiwi eo.”1
Linda K. Burtōn, būreejtōn eo eļap an Doulul eo an Kōrā, ear ba: Jemedwōj Ilan̄ … eaar jilkintok Nejin Jitōn Bōro Emake Wōt im Nejin M̧aan ewāppen n̄an en̄taan kōn jerawiwi ko ad, bōro ko ad rerub, im aolep men rej jab jejjet ilo mour ko ad kajjojo.
“… Juon Kōrā eo eaar jelm̧ae mālijjon̄ im būrom̧ōj ium̧win iiō ko kar ba ke eaar jan̄, ‘iaar jino kile bwe iaar āinwōt 20 taļa—enokjōk, potak, ettonoon, kōwaan e, im jejtokjen. Ak … ij aorōk wōt likio in 20 taļa.’ Kōrā in ejeļā bwe eaar … bwe an aorōk n̄an [Anij] n̄an jilkinļo̧k Nejin n̄an pinmuur n̄an e, make. Aolep sister ilo Kabun̄ in rej aikuj in jeļā ta in kōrā in ejeļā.”2
Jān Jeje ko Rekwojarjar
Jān Bwebwenato eo Ad
Ilo Kalim̧m̧ur M̧okta jej riit kōn kōrā ro, ro ewōr etaer im ro ejjeļo̧k, me raar kōjerbal tōmak ilo Jisōs Kraist, kar katak im mour kōn katak ko An, im kar kam̧ool kōn kwaļo̧k eo An, kabwilōn̄lōn̄ ko, im An utiej.
Jisōs eaar jiron̄ ļo̧k kōrā eo ilo aibōj laļ eo:
“Jabdewōt eo ej idaak dān eo I naaj leļo̧k n̄an e, e jāmin bar maro indeeo; a dān eo I naaj leļo̧k n̄an e, enaaj aebōj ilo e im naaj to̧o̧rļo̧k n̄an mour indeeo.
“Kōrā e ba n̄an E, Irooj, Kwōn letok dān in n̄an eō, bwe in jab maro. …
“Ijeļā bwe [Messaia] ej itok, eo ej ņaetan Kraist:… n̄e Ej itok, Enaaj kwaļo̧k men otemjej n̄an kom̧.
“Jisōs e ba n̄an e, N̄a E, N̄a Ij kōnono n̄an eok.”
“Innām kōrā eo ej likūt kein itōk” im ej ilo̧k n̄an jikin kweilo̧k im ba n̄an armej raņ. (Lale Jon 4:6–30.)