Pija ko an Rūm̧m̧an Ded ro
Oktak im Kaarmejete ilo Finland
Ta eo ej āinwōt n̄an erom juon rūm̧m̧ad ded eo etiljek ilo Finland? Juon likao ej kwaļo̧k m̧anit eo im tōmak eo an.
Jet m̧ail ko etto ļo̧k jen parijet in Helsinki, Finland, ej m̧ōko reppan kar kaliki ioon lojet in Suomenlinna, kar kaliki ilo 18th century eo n̄an bōbrae rijodik ro. Ererakļo̧k kijoon jiljino āne ko, menin eliok titbok ej jutak kōn dim in kijejeto eo an armej in Finnish ro.
Bōtaab membōr in Finland ro rej lolo̧k em̧ ko reoktak n̄e rej lolo̧k capital en aer. Helsinki Finland Temple eo ej juon kōkkaļe in oktak eo aer im kōjparok eo rej bōke jān aer mour kōn ko̧jpeļ in.
N̄an Niilo Kervinen, juon rūm̧m̧an ded 24-an iiō jān Rovaniemi, Finland, 10 awa in iuwe ilo tūrein n̄an Helsinki kōn juon wōņāān eo edik n̄an kōļļāik kōn kōjeram̧m̧an eo n̄an jerbal ilo tam̧peļ eo.
M̧okta jen aje eo an Helsinki Finland Temple eo ilo Oktoba 2006, Niilo im membōr ro jet ilo ward eo an raar etal n̄an Stockholm Sweden Temple ak n̄an Copenhage Denmark Temple. “Tūreep ko ekkā aer bōk juon wiik ilo iien jōm̧ar,” ej kememej. Ilo̧k kōn baj im jokwe ilo em̧ nuknuk ko ilo tūreep ko rej jet iaan ememļo̧kjeņ ko rem̧m̧antata.
Aaet wōr juon tam̧peļ ilo laļ en an make juon kōjeram̧m̧an em̧m̧an. “Ke rej kōjjeļāiki kōn Helsinki temple, iaar lukkuun m̧ōņōņō,” Niilo ej ba. “Ij en̄jake wōt kajoor eo an jar in aje eo kajjojo iien ij deļo̧n̄ ļo̧k.”
Iakwe in n̄an tam̧peļ eo ekōjeno̧lo̧k Niilo jān ro m̧ōttan. “Rifinland ro raar lukkuun jerbal im lem̧ōņōņō ilo niknik bōtaab kar jolo̧k jidik iien n̄an men ko an jetōb ilo mour ko aer,” ej kōmeļeļik. Men̄e Niilo ej ba bwe eaar aolep iien jeram̧m̧an kōn ro m̧ōttan rem̧m̧an, ilo an rūtto ļo̧k oktak eo ikōtaan ekōjkan an ro m̧ōttan mour im ekōjkan an kar katakin e n̄an mour erreoļo̧k. Eaar oktak in me ekōm̧m̧an bwe Niilo en pukot naan in kam̧ool eo an make ke eaar 17 an iiō. “Iaar aikuj kōm̧m̧ane juon jokālet kōn ia eo n̄an jutak ie im wōn n̄an erom,” ej ba. “Kōn kōjeram̧m̧an ko an Irooj im kōn im̧we an baam̧le im ro m̧ōtta rem̧m̧an, Iaar bōk juon naan in kam̧ool eo ekajoor kōn Kabun̄ in.”
Ilo kōnono kōn oktak, Elder David A. Bednar jen Doulul eo an Jon̄oulruo Rijilōk ro eaar ba, “Ij kallim̧ur bwe ilo ad itok n̄an jeļāļo̧kjeņ eo an m̧ool eo im rej oktak n̄an Irooj, jenaaj pād wōt ilo pen im dim im jamin bun̄ lo̧k.”1 Men̄e ilo̧k n̄an Helsinke ebōk iien im jāān, Niilo eaar kallim̧ur n̄an juon rikaļooraņ Kraist. Im n̄an Niilo, ejjeļo̧k karmejete n̄an jidik.