Mga Pangutana ug mga Tubag
“Unsay akong buhaton kon sa eskwelahan tukion ang hilisgutan nga supak sa mga pagtulun-an sa ebanghelyo, sama sa aborsyon?”
Adunay daghang mga paagi sa pagtubag—o dili—depende sa sitwasyon. Una, hunahunaa kon unsa kaha ang mahitabo kon ikaw ba mosulti o dili mosulti og usa ka butang. Kon ang imong kahilom makapahunahuna sa uban nga kamo uyon sa usa ka butang nga imong nahibaloan nga sayop, mahimo kang mangita og yanong paagi sa pagsulti sa imong wala pag-uyon. Kon ikaw naghunahuna nga ang imong mga komentaryo maoy hinungdan sa panagbingkil, nan makapangita ka og laing okasyon nga makakomentaryo. Hinoon, kon ang imong klase matinahuron sa usag usa ug ang magtutudlo naghangyo og partisipasyon, mahimo kang mag-ampo alang sa inspirasyon ug dayon ipasabut ang imong mga gituohan.
Makapangandam kang daan kon makahibalo ka nga ang imong klase maghisgot og piho nga hilisgutan. Agig dugang sa mga kasulatan ug mga pakigpulong sa komperensya kabahin sa hilisgutan, tan-awa sa Matinud-anon sa Tinuhoan, Mga Baruganan sa Ebanghelyo, o Alang sa Kalig-on sa Kabatan-onan. Mahimo usab kang magpraktis sa pagpasabut sa mga hilisgutan diha sa family home evening. Kon andam ka na, pakigsulti sa imong magtutudlo o sa imong mga kaklase.
Ang paagi sa imong pagtubag sama kaimportante sa unsay imong isulti. Pagmatinahuron ug paningkamot nga dili mogamit sa mga terminolohiya sa Simbahan. Ang imong mga kaklase dili makasabut kon ikaw moingon, “Usa ka tigtambag sa Young Women sa akong ward mitudlo nako nga …”
Unsa ang labing importante mao nga ikaw makahibalo unsa ang gitudlo sa Simbahan ug unsa ang gisulti sa Espiritu Santo nimo aron ikaw dili malingla sa mga sayop nga imong madungog o mabasa sa klase.
Hinumdumi Kinsa ang Imong Girepresentaran
Kon nag-atubang niini nga mga sitwasyon, hinumdumi nga mahimong lahi ang gibati sa uban sa mao nga hilisgutan kay kanimo. Ayaw pag-inarogante o mapugsanon, apan ayaw kahadlok sa pagpanalipod sa imong mga gituohan. Hinumdumi nga ikaw nagrepresentar ni Kristo.
Madeline K., edad 16, Wyoming, USA
Pagmabination
Akong gibati nga ako kinahanglan nga mopakigbahin sa akong panglantaw sa matinahuron nga paagi ug usab mosulti nganong mituo ko niini. Wala ko magtuo nga kinahanglang motuo sila sa akong gituohan, apan ako nagtuo nga sila kinahanglang masayud unsay akong baruganan sa piho nga mga hilisgutan ug makasabut sa akong panglantaw.
Sabrina S., edad 16, Oregon, USA
Pagmatinahuron
Importante nga kita paminawon, apan importante usab kaayo nga magmatinahuron sa pagtuo sa uban. Ayaw pakiglalis. Ang panaglalis makamugna og mga kaaway ug kalibug. Kon ang usa ka ideya gihisgutan nga supak sa atong relihiyon, pagpabilin nga kalma, mag-focus ug magmatinahuron, ug dili malimot sa pagpaminaw sa Espiritu. Adunay mga butang nga dili nato masabtan nga nasabtan sa Dios. Kita kinahanglang maminaw ug magkat-on gikan sa Iyang Espiritu.
Hannah M., edad 18, Utah, USA
Pagpakigbahin kon Unsa ang Gitudlo sa Simbahan
Maningkamot ko sa pagtubag sa ingon nga mga pangutana kutob sa akong mga mahimo tungod kay ang akong mga higala ug mga magtutudlo wala masayud, gawas kon ako mosulti kanila, sa baruganan sa Simbahan sa ingon nga mga hilisgutan. Pinaagi sa pagbuhat niini, sila makahibalo sa ilang pakisayran sa umaabut, ug kamo makabenepisyo sa espirituhanong paagi. Hinumdumi: “Pasigaa ninyo ang inyong kahayag sa atubangan sa mga tawo aron makita nila ang inyong mga maayong buhat ug dayegon nila ang inyong Amahan nga anaa sa langit” (Mateo 5:16).
Joshua M., edad 16, Manchester, England
Tabangi ang Uban nga Maghunahuna kon Unsa Ang Matarung
Ipakigbahin ang imong mga pagbati sa matinuorong paagi. Daghang mga hilisgutan sa eskwelahan, sama sa aborsyon, ang gidibatehan pag-ayo, busa ayaw kaulaw sa pagtingog. Maayo kini nga kahigayunan sa pagpakigbahin sa ebanghelyo ug sa mga sumbanan nga atong gituohan. Kon ikaw makigbahin sa imong mga gituohan, makatabang ikaw sa mga tawo nga maghunahuna kon unsa ang matarung.
Madison R., edad 14, North Carolina
Korhii ang Sayop nga Doktrina
Kita sakop sa Simbahan nga missionary-minded diin kitang tanan gitawag sa pagsangyaw; busa, dili kita motugot nga ang sayop nga doktrina mokaylap. Sa ingon nga mga sitwasyon, kinahanglan kita nga mamulong sa pagkorihir sa bisan unsang sayop nga doktrina ug pagtabang sa mga tawo nga makasabut sa panglantaw sa gipahiuli nga ebanghelyo kalabut sa hilisgutan.
David M., edad 16, Kasaï-Occidental Province, Democratic Republic of Congo
Sayri ang Baruganan sa Simbahan
Diha ko sa kurso diin ang kontrobersyal nga mga hilisgutan kanunayng gituki. Ang unang butang nga buhaton mao ang pagtahud sa pagtuo sa uban, sama sa imong gipaabut gikan sa imong isig ka kauban sa klase. Kon ang hilisgutan direkta nga sumpaki sa simbahan, sa gawasnong paagi ipahayag ang imong opinyon. Dili kinahanglang hisgutan nimo ang Simbahan sa imong tubag. Hinoon, siguroha nga nakahibalo ka sa baruganan sa Simbahan niining mga butanga.
Joseph Z., edad 18, Maryland, USA
Paglikay sa Panagbingkil
Akong ipasabut ang akong opinyon, manalipod sa akong mga baruganan ug mga doktrina sa Simbahan, magtahud sa mga ideya sa uban. Dili ko makiglalis, nga mopapahawa sa Espiritu, nga makaimpluwensya sa uban sa positibong paagi.
Daiana V., edad 15, Buenos Aires, Argentina