Ang Pagsalig sa Katakus
Gikan sa usa ka fireside alang sa kabatan-onan nga gihatag niadtong Disyembre 31, 2006.
Gusto kong mamulong og klaro kon unsaon sa pagbaton og usa ka espesyal kaayo nga matang sa pagsalig.
Ang akong mensahe kaninyo mao ang mahitungod sa paglaum ug pagdasig karon ug sa tibuok ninyong kinabuhi. Adunay daghan nga mga kasamok sa kalibutan, apan sa kanunay adunay mga kasamok sa tanang panahon. Ayaw og kahasol niini, ug ayaw kasagmuyo niini. Ang umaabut nga katuigan puno sa maanindot nga mga oportunidad ug talagsaong mga panalangin. Kita padayon nga adunay mga paglambo sa siyensya ug teknolohiya, medisina ug komunikasyon—kining tanan may kalabutan sa pagpalambo sa atong kinabuhi. Nagpuyo kamo sa labing mahimayaon nga panahon sa kalibutan, uban sa daghan pang mga panalangin nga moabut ngadto sa daghan pang mga tawo sa tibuok kalibutan kay sa bisan unsang panahon sa kasaysayan. Hinumdumi—ang inyong lola wala mangandoy og usa ka digital tablet dihang siya sama pa ninyo og edad, ug ang inyong lolo walay ideya kon unsaon pag-text. Busa, pagmalipayon ug pagmahimsog ug pagmalaumon.
Ako mohisgut og tipik niini tungod kay ang usa ka artikulo nga akong gibasa bag-ohay lang miingon nga ang labing komon nga sakit sa mga kabatan-onan karon dili diabetes o sakit sa kasingkasing o kanser. (Kadtong mga matang sa mga problema sagad gireserba alang sa akong mga kaedad, dili sa inyoha.) Ang sakit nga sagad giantus sa mga tin-edyer ug sa nag-edad og mga 20 anyos, sigon sa report, mao ang pagduha-duha, kahadlok mahitungod sa umaabut, ubos nga pagsalig sa kaugalingon, ug kakulang sa pagsalig sa ilang kaugalingon ug sa kalibutan nga naglibut kanila.
Bisan og magulang kaayo ko kay kaninyo, nasabtan gyud nako kana nga mga matang sa mga kabalaka tungod kay sa batan-on pa ko nakasinati usab ko og mga sitwasyon diin ako wala kaayoy pagsalig sa kaugalingon. Nakahinumdom ko nga naningkamot aron modako ang grado, nangandoy nga makaangkon og scholarship, ug natingala kon nganong ang uban mas hanas niana nga kategoriya kay kanako. Nakahinumdom ko sa mga katuigan sa mga athletic sport nga akong gisulayan sa pagdula uban sa pagsalig nga gikinahanglan alang sa kalampusan sa mga sport sa high school ug sa kolehiyo, gusto kaayo kong modaug sa big game o maangkon ang gitinguha nga championship. Labi pa nakong nahinumduman ang kakulang sa pagsalig bahin sa mga babaye, nga kasagaran maoy tighatag og kabalaka sa mga lalaki. Ako mapasalamaton nga si Sister Holland namasin kanako. Oo, akong mahinumduman ang tanan nga mga butang nga inyong nahinumduman—dili sigurado mahitungod kon unsay akong dagway o madawat ba ko o unsay akong kaugmaon.
Ang akong katuyoan dili ang paghisgut sa tanan nianang problemaha nga giatubang sa usa ka batan-on nga makahatag og pagduha-duha ug kakulang sa pagsalig, apan gusto kong mamulong og klaro kon unsaon sa pagbaton og usa ka espesyal kaayo nga matang sa pagsalig—usa ka pagsalig, nga kon maangkon sa saktong paagi, makahimo og kahibulongan sa matag aspeto sa atong kinabuhi, ilabi na sa pagsalig sa atong kaugalingon ug unsaon nato paglantaw ang umaabut. Sa paghimo niini nga punto, kinahanglan kong moasoy og istorya.
Ang Mithi sa Personal nga Katakus
Daghang tuig na ang milabay, sa wala pa ko matawag isip General Authority, miapil ko isip usa ka mamumulong sa komperensya sa young adult. Ang komperensya gitapos uban sa usa ka miting sa pagpamatuod diin ang gwapo, batan-ong returned missionary mibarug aron magpamatuod. Buotan siya tan-awon, limpyo, ug masaligon—ingon gayud sa panagway sa usa ka returned missionary.
Sa iyang pagsugod og sulti, ang mga luha milugmaw sa iyang mga mata. Siya miingon nga siya mapasalamaton nga mobarug taliwala sa maayo kaayo nga grupo sa batan-ong mga Santos sa Ulahing mga Adlaw ug bation ang kanindot sa kinabuhi nga iyang gipaningkamutang subayon. Apan kana nga pagbati nahimo lamang posible, siya miingon, tungod sa iyang kasinatian pipila ka tuig na ang milabay, usa ka kasinatian nga nakaumol sa iyang kinabuhi sa kahangturan.
Dayon misulti siya bahin sa iyang pagpauli sa balay gikan sa usa ka date human siya na-orden nga elder sa edad nga 18. Usa ka butang ang nahitabo niini nga date nga dili niya ikapasigarbo. Siya wala modetalye, ni mohimo niini diha sa publiko. Hangtud karon wala ko masayud sa panghitabo, apan ingon kini kaimportante ngadto kaniya nga naapektuhan ang iyang espiritu ug pagsalig sa iyang kaugalingon.
Samtang naglingkod siya sa iyang sakyanan sa makadiyot sa driveway sa iyang kaugalingong panimalay, naghunahuna sa mga butang ug mibati og tinud-anay nga kasubo sa nahitabo, ang iyang mama nga dili miyembro sa simbahan nagdagan gikan sa balay diretso sa iyang sakyanan. Diha-diha miingon ang iyang mama nga ang manghod niya nga lalaki bag-o lang nahulog sa panimalay, napantok ang ulo ug nagkirig-kirig. Ang amahan nga dili miyembro sa simbahan diha-diha dayon mitawag og ambulansya, apan dugay-dugay pa kining moabut.
“Dali ug buhata ang imong mahimo,” siya mituaw. “Wala ba moy himoon sa inyong Simbahan sa panahon nga sama niini? Ikaw aduna sa ilang priesthood. Dali ug buhata ang imong mahimo.”
Ang iyang inahan wala kaayo masayud bahin sa Simbahan nianang higayuna, apan siya dunay nasayran bahin sa mga panalangin sa priesthood. Apan, niining gabhiona dihang ang usa ka tawo nga iyang gihigugma og maayo nagkinahanglan sa iyang hugot nga pagtuo ug sa iyang kalig-on, kining batan-ong lalaki walay mahimo. Tungod sa pagbati nga iyang gipanlimbasugan ug sa dili maayong butang nga bag-o lang niyang gihimo—bisan unsa man kadto—dili siya makaduol sa atubangan sa Ginoo ug pangayoon ang panalangin nga gikinahanglan.
Migawas siyag dali sa sakyanan ug midagan paingon sa panimalay sa usa ka takus nga mas edaran nga lalaki sa ward nga nakighigala niya sukad sa iyang pagkakabig mga duha o tulo ka tuig na ang milabay. Mipasabut siya, ug ang duha mibalik sa balay sa wala pa miabut ang mga paramedic. Ang malipayong katapusan niini nga istorya sama sa gisulti diha sa miting sa pagpamatuod mao nga kining mas edaran nga lalaki mihatag diha-diha dayon og usa ka malumo, gamhanan nga panalangin sa priesthood, nga nakapakalma ug nakapapahulay sa samaran nga bata dihang ang medikal nga tabang miabut. Ang dinaliang pagbiyahe ngadto sa ospital ug pag-eksamin og maayo mipadayag nga walay permanenting kadaut ang nahimo. Ang makuyaw nga panahon alang niini nga pamilya milabay ra.
Dayon ang returned missionary nga akong gihisgutan miingon niini: “Walay bisan usa kinsa wala makasinati sa akong nasinati nianang gabhiona ang masayud sa kaulaw ug sa kasubo nga akong gibati tungod sa pagbati nga dili takus nga mogamit sa priesthood nga akong gihuptan. Mas labaw kini ka sakit nga hinumduman alang kanako tungod kay ang akong manghud nga lalaki ang nanginahanglan kanako ug ang akong minahal nga dili miyembro nga mga ginikanan nga nalisang ug naglaum kaayo nako. Apan samtang ako nagbarug sa inyong atubangan karon, mosaad ko ninyo niini,” siya miingon. “Ako dili hingpit, apan sukad niadtong gabhiona ako wala na gayud makahimo og bisan unsa nga makapugong kanako sa pagduol sa atubangan sa Ginoo uban sa pagsalig ug mangayo sa Iyang tabang kon manginahanglan niini. Ang personal nga katakus mao ang gipakig-awayan niini nga kalibutan diin kita nagpuyo,” siya miangkon, “apan mao kini ang panag-away nga akong daugon. Gibati nako ang tudlo sa panghimaraut nga mitulisok kanako makausa sa akong kinabuhi, ug dili na gyud ko gusto nga bation kini pag-usab kon ako adunay mahimo kalabut niini. Ug, siyempre,” siya mitapos, “makahimo ko sa tanan kalabut niini.”
Iyang gitapos ang iyang pagpamatuod ug milingkod. Makahulagway pa gihapon ko niya. Maaninaw pa gihapon nako ang maong sitwasyon. Ug mahinumduman pa gihapon nako ang makapasubo, makapatandog nga kahilum human sa iyang mga pakigpulong samtang ang matag usa mas namalandong sa iyang kalag, mas lig-ong misaad nga mosunod sa gamhanan nga mga pulong nga gihatag sa Ginoo:
“Himoa ang hiyas nga modayan-dayan sa inyong mga hunahuna nga walay paghunong; unya ang imong pagsalig mosamot pagkalig-on diha sa atubangan sa Dios; ug ang doktrina sa pagkapari motuhop diha sa imong kalag ingon sa mga yamog nga gikan sa langit.
“Ang Espiritu Santo mahimo nga imong kauban, ug ang inyong pagmando usa ka dili mausabon nga pagmando sa pagkamatarung ug kamatuoran” (D&P 121:45–46; empasis gidugang).
Pagtagamtam sa Espiritu sa Dios
Akong minahal nga batan-ong mga higala, batuni ang usa ka talagsaon nga kinabuhi. Hunahunaa ang labing maayo ug laumi ang pinakamaayo ug batuni ang hugot nga pagtuo sa umaabut. Kamo adunay nindot nga kinabuhi nga nagpaabut. Ang inyong Langitnong Amahan nahigugma kaninyo. Kon adunay sayop nga nabuhat, mahinulsulan ug mapasaylo kini sama sa nahitabo niining batan-ong lalaki. Kamo aduna sa tanan nga angayng pakabuhian ug planohan ug tuohan. Ang pagsunod sa inyong konsensya kon kamo mag-inusara sa inyong mga panumduman motugot kaninyo nga mobati sa Espiritu sa Dios sa usa ka personal kaayo nga paagi. Gusto ko nga matagamtam ninyo kana nga Espiritu, mobati niana nga pagsalig diha sa atubangan sa Ginoo kanunay. Unta ang mahiyason nga mga hunahuna makapalunsay sa atong binuhatan karon ug ugma ug hangtud sa kahangturan.