Juon Jolet eo Ejjeļo̧k Wōnāān an Kōjatdikdik

Ro jeiū im jatū, jet iaami raar karuwaineneik tok er n̄an kweilo̧k in jen mijenede ro an Kabun̄ eo an Jisōs Kraist im Armej ro Rekwojarjar ilo Raan-ko Āliktata. Mijenede rein bōlen emōj aer karuwaineneik kom̧ n̄an kōm̧m̧an kālet in bujen ippān Anij jān peptaij.

Jet iaami rej ron̄jake kōnke kom̧ kar bōk karuwainene in jen juon jinen im jemān, juon kōrā pāleen, ak bōlen juon ajri, eaar lewaj n̄an eok ilo kōjatdikdik bwe kwonaaj kālet n̄an likūt bujen ko em̧ōj am̧ kar kōm̧m̧ani ippān Anij ilo ioļapān mour eo am. Jet iaami rej ron̄jake em̧ōj aer kar kōm̧m̧ani kālet eo n̄an ro̧o̧ltok n̄an ļoor Rilo̧mo̧o̧r eo im rej en̄jake rainin lan̄lōn̄ in An karuwainene.

Jekdoon wōn kwe im ia n̄e kwōj pād ie, kwōj kabwijer ilo peim̧ m̧ōņōņō an elōn̄ armej eļapļo̧k jen am̧ maron̄ antone. Aolep raan im aolep awa komaron̄ kālet n̄an kōm̧m̧an ak kōjparok juon bujen ippān Anij.

Jekdo̧o̧n ia kwoj pād ie ilo iaļ eo n̄an deļo̧n̄e menin letok an mour indeeo, ewōr am̧ iien em̧m̧an n̄an kwaļo̧k n̄an elōn̄ armej iaļ eo n̄an m̧ōņōņō eļapļo̧k. Eļan̄n̄e kwoj kālet n̄an kōm̧m̧an ak kōjparok juon bujen ippān Anij, kwoj kālet eļan̄n̄e kwonaaj likūt juon jolet in kōjatdikdik n̄an ro remaron̄ ļoor waanjon̄ak eo am.

Kwe im n̄a kar jeram̧m̧an kōn kalim̧m̧ur eo an baj jolet jab in. Eļap aō m̧uri kōn m̧ōņōņō eo aō ilo mour in n̄an juon em̧m̧aan ijjan̄in kar iioone ilo mour in. Ekar juon eo eatimjinemjen eo ekar juon jim̧aan jim̧aaō. Eaar kōjolet eō kōn juon jolet eo ejjeļo̧k wōņāān an kōjatdikdik. Ikōņaan kwaļo̧k jet iaan m̧ōttan ko ekar kōm̧m̧ani bwe en ejaake menin jolet in n̄an eō.

Etan ekar Heinrich Eyring. Ekar ļotak āinwōt juon eo em̧weie. Jemān, Edward, ekar ļap jikin ilo Coburg, im ņaetan Germany. Jinen ekar Viscountess Charlotte Von Blomberg. Jemen eaar rilale āne ko āneen Kiin̄ eo an Prussia.

Heinrich ekar m̧aanje eo nejin Charlotte im Edward. Charlotte ekar mej ke ej 31 an iiō, ālkin ļotak eo an ajri eo nejin kein kajilu. Edward eaar mej jidik iien tokālik, ālkin an kar luuji aolepān men ko m̧weien im jeram̧m̧an ko an ilo juon likjab in jikin kōm̧m̧an jāān. Ekar 40 wōt an iiō. Eaar ilo̧k jen jilu ajri ro ratamjinemjen.

Heinrich, jim̧aan-jim̧aan-jim̧m̧a, ekar luuji ro jinen im jemen im jolet ko reļļap an mour in. Ekar ejjeļo̧k ippān juon jāān bōroro. Ekar ļo̧o̧ki ilo bwebwenato ko an ke ekar en̄jake ke kōjatdikdik eo em̧m̧antata ekar bwe en ilok n̄an Amedka. Jekdoon n̄e ekar ejjeļo̧k nukin ak m̧ōttan ijo, elōn̄ an kar en̄jake in kōjatdikdik in etal n̄an Amedka. Ekar m̧okta etal n̄an New York City. Tokālik ekar em̧m̧akūt ļo̧k n̄an St. Louis, Missouri.

Ilo St. Louis, juōn iaan rijerbal ro m̧ōttan eaar juon iaan Armej ro Rekwojarjar ilo Raan-ko Āliktata. Jān e eaar bōk juon kape in juon peba pamphlet kar jeje jān Elder Parley P. Pratt. Ekar riiti innām ekkatak aolep naan emaron̄ in kar katak kōn Armej ro Rekwojarjar ilo Raan-ko Āliktata. Ekar jar n̄an jeļā eļan̄n̄e ekar lukkuun wōr enjeļ ekar waļo̧k n̄an armej, eļan̄n̄e ekar wōr rikanaan emour, im eļan̄n̄e ekar lo kabun̄ eo em̧ool kar kwaļo̧k tok.

Ālkin ruo allōn̄ in tiljek etale in ekkatak im jar, Heinrich eaar wōr juon an ettōņak me kar jiron̄ e n̄an peptaij. Juon em̧m̧aan eo etan im priesthood eo an ij likūt wōt ilo ittiņo̧, Elder William Brown, ekkar kōm̧m̧ane kain̄i eo. Heinrich eaar peptaij ilo juon ļwe in dān in wōt ilo M̧aaj 11, 1855, at 7:30 ilo jibbon̄.

Ij tōmak ke Heinrich Eyring ekar jeļā ke ta in ij katakin kom̧ rainin ej m̧ool. Ekar jeļā ke m̧ōņōņō eo an mour indeeo ej itok jen kotaan ko ilo baam̧le im rej wōnm̧aanļo̧k n̄an indeeo. Jekdoon n̄e ekāāl an lo karōk in m̧ōņōņō eo an Irooj, ekar jeļā ke kōjatdikdik eo an n̄an lan̄lōn̄ eo ejjeļo̧k jem̧lokin ej pedped wot ioon kālet ko an ro jet n̄an ļo̧o̧r waanjon̄ak eo an. Kōjatdikdik eo an kōn mour indeeo ej pedped wot ioon armej ro rejjanin kar lotak.

Āinwōt m̧ōttan jolet in kōjatdikdik eo an baam̧le eo am, ekar likūt juon bwebwenato n̄an ro bwijjin.

Ilo bwebwenato in imaron̄ en̄jake iakwe in an n̄an kōm̧ ro renaaj kar ļoor e. Ilo naan ko an ij en̄jake kōjatdikdik eo an bwe ro bwijjin remaron̄ in ļoor e ilo iaļ in ļo̧k n̄an m̧weo im̧ōn ilan̄. Ekar jeļā enaaj kar juon kālet eo em̧m̧an n̄an kōm̧m̧ane bōtaab elōn̄ kālet dikdik ko. Ij kout jān bwebwenato eo an:

“Jān iien eo ikar jinoin tata ron̄ an Elder Andrus kōnono … Aolep iien ij kobaļo̧k ilo kweilo̧k ko an Armej ro Rekwojarjar ilo Raan-ko Āliktata im elukkuun jeja an jab kobaļo̧k ilo iien kweilo̧k kein, kōnke ej aō eddo n̄an kobaiļo̧k ilo kweilo̧k kein.

“Ikar jei ilo bwebwenato ko aō bwe ro nejū ren maron̄ ļoor waanjon̄ak ko aō im jamin jowan kōn eddo in n̄an kobaļo̧k ippān ro rekwojarjar.”¹

Heinrich ekar jeļā bwe ilo iien kweilo̧k in kwojkwoj eo jemaron̄ kōkāāl kalim̧m̧ur ko ad n̄an iien otemjej keememej Rilo̧mo̧o̧r eo im bwe Jetōb eo An en pād ippād.

Ekar Jetōb eo eaar rejtake e ilo mijen eo ke eaar kūr jejjo wōt allōn̄ an kar bōk bujen peptaij eo. Eaar door āinwōt an waanjon̄ak jolet an pād tiljek n̄an mijen eo an ium̧win jiljino iiō ko ilo ta eo kar ņa etan Indian Territories. N̄an bōk kōtļo̧k eo an jān mijen eo an, eaar etetal jān Oklahoma n̄an Salt Lake City, juon kōtaan eo emaron̄ 1,100 m̧aiļ ko (1,700 km).

Ālkin wōt ekar kūr jen rikanaan an Anij n̄an em̧akūt n̄an turōk in Utah. Jān ijo ekar bar eoron̄ juōn kūr n̄an jerbal ilo kapijuknen eo an Germany. Innām ekar bōk karwainene eo jen juōn Rijilōk an Irooj Jisōs Kraist n̄an jipan̄ kalōk juōn jikin n̄an Armej ro Rekwojarjar ilo Raan-ko Āliktata ilo tuion̄ in Mexico. Jen ijin kar kūr i n̄an jerbal āinwōt juon mijenede bar juon alen ilo Mexico City. Eaar kautiej kūr kein. Kar kalbwini ilo juon lōb jidikdik ilo Colonia Juárez, Chihuahua, Mexico.

Ij ba meļeļe kein ejjab bwe in kwaļok kōn bun̄bun̄ ko an ak kōn ta ko ekar kōm̧m̧ani ak n̄an ro bwijjin. Ij ba bwe in kautiej e kōn waanjon̄ak in tōmak im kōjatdikdik eo ekar pād iburuwōn.

Ekar eoron̄ kūr kein kōn tōmak eo an bwe Kraist eo em̧ōj an jerkakpeje im Jemedwōj Ilan̄ rekar waļo̧k n̄an Jospeh Smith ilo bukwōn wōjke ko ilo New York. Ekar eoron̄i kōnke ewōr an tōmak bwe kii ko an priesthood eo ilo kabun̄ eo an Irooj em̧ōj aer jepļaaktok kōn kajoor in liāp baam̧le n̄an indeeo, eļan̄n̄e enaaj ļap tōmak ippāer n̄an dāpij bujen ko aer.

Āinwōt Heinrich Eyring, aļap eo aō, komaron̄ in eo m̧oktata ilo baam̧le eo am̧ n̄an tōl iaļ eo n̄an mour indeeo ilo iaļ in an bujen ko rekwojarjar kōm̧m̧ani im kōjparok kōn tenwadik im tōmak. Kajjojo bujen ej itok ippān eddo ko an im kalim̧m̧ur ko. N̄an kōjwōj, āinwōt an kar n̄an Heinrich, eddo kein rej jet iien pidodo ak enan̄in aolep iien rej eppen. Ak kememej, bwe eddo kein jet iien remaron in eppen kōnke wūn eo ej n̄an kōm̧m̧an bwe jen wōnm̧aanļo̧k ilo iaļ in n̄an mour indeeo ippen Jemedwōj Ilan̄ im Nejin Jitenbōro, Jisōs Kraist, ilo baam̧le ko.

Kwōj ke keememej naan ko jen bok in Abraham:

Anij ekar kwaļo̧k n̄an Abraham bwe ewōr juōn ej pād ilubwilijid im ej āinwōt Anij, im ekar ba n̄an ro rekar pād ippān bwe ren etal ippān: Bwe ren etal ippān n̄an laļ im bōk men ko im kōm̧anm̧an laļin eo jemaron̄ jokwe ie:

Anij eaar ba bwe renaaj kam̧oole er n̄an lale eļan̄n̄e renaaj kōm̧m̧ane aolep men ko me Irooj aer Anij enaaj kean̄ er;

Im eļan̄n̄e renaaj kōjparok ijo kuņaer m̧oktata naaj bar leļok n̄an er, im eļan̄n̄e jeban kōm̧m̧ane ijo koņaad innām jejjab maron̄ in bōk aiboojoj ilo ejja aelōn̄ in kiin̄ eo ippān ro rekar rekar kōm̧m̧ane ijo koņaer m̧okta, im ro rekar kōm̧m̧ane ijo koņaer tokālik naaj leļok aiboojoj n̄an er n̄an indeeo im indeeo.²

Kōjparok ijo koņaad kein karuo ej pedped wōt ioon ad kōm̧m̧ani bujen ko ippān Anij im tiljek ilo ad kōm̧m̧ane eddo eo emenin aikuj jān kōj. Ej bōk tōmak ilo Jisōs Kraist āinwōt ad Rilo̧mo̧o̧r n̄an kōjparok bujen ko rekwojarjar ad n̄an aolepān ad mour.

Kōnke Adam im Eve rekar kōm̧m̧ane wōtlo̧k eo, ewōr ad kapo, melijjon̄, im mej āinwōt jolet eo an aolepen laļin: Mekarta, Jemedwōj Ilan̄ eo ej iakwe kōj ej letok n̄an kōj menin letok eo an Nejin Jitōnbōro, Jisōs Kraist, āinwōt ad Rilo̧mo̧o̧r. Menin letok in eļap im kōjeram̧m̧an eo an Pinmuur eo an Jisōs Kraist ej bōk menin jolet eo n̄an aolepen laļ: kalim̧ur eo an Jerkakpeje eo im maron̄ eo an mour indeeo n̄an aolep ro im rej lotak.

Kōjeram̧m̧an eo eļaptata an aolep kōjeram̧m̧an ko an Anij, mour indeeo, enaaj itok wōt n̄an kōj ilo ad kōm̧m̧an bujen ko ilo kabun̄ eo em̧ool an Jisōs Kraist jen rikarejeran ro An em̧ōj kōmālim er. Kōn wōtlo̧k eo, jej aolep aikuiji karreo eo an peptaij im likūt iood pā ko n̄an bōk menin letok eo an Jetōb Kwōjarjar. Kain̄i kein rej aikuij in kōm̧m̧an jen ro rej kabwijer mālim eo an priesthood eo ejim̧we. Innām, kōn jipan̄ eo an Jetōb eo an Kraist im Jetōb Kwōjarjar, jemaron̄ kōjparok aolep bujen jej kōm̧m̧ani ippen Anij, eļaptata ko liļok ilo tampeļ ko An. Ilo jōkjōk in wōt, im kōn jipan̄ in, jabdewōt emaron̄ bōk jolet eo an āinwōt ajri eo nejin Anij ilo baam̧le eo indeeo.

N̄an jet ro rej ron̄jake n̄a, emaron̄ in juōn ettōņak eo ejej tokjen.

Em̧ōj ami lo ro jinen im jemen im rej būrom̧ōj kōn ajri ro rej kōwaan ak rej kālet n̄an rupe bujen ko aer ippān Anij. Ak rein jinen im jemen remaron̄ bōk kaenōm̧m̧an in bōro im kōjatdikdik jen bwebwenato ko an jinen im jemen ro jet.

Alma im ļaddik ro nejin Kiin̄ Mosaia rekar ro̧o̧l jen aer kar jum̧ae ņae bujen ko im kien ko an Anij. Alma eo edik ekar lo an ļaddik eo nejin Corianton oktak jen jerawiwi eļap n̄an tōmak ilo jerbal eo. Bok in Mormon eo ej bar āinwōt ļo̧o̧k e kabwilōn̄lōn̄ in an kar Rileman ro raar likūt itu rāejet m̧anit in dike mour jim̧we n̄an delon̄ bujen n̄an mej bwe ren kōm̧m̧an aenōm̧m̧an.

Juōn enjeļ kar jilkintok n̄an Alma eo edik im ļomaro nejin Mosaia. Enjeļ eo ekar itok kōn tōmak im jar ko an jemeer im armej ro an Anij. Jen waanjon̄ak ko an kajoor eo an pinmuur eo ej jerbal ilo būruwōn armej, kwōmaron̄ bōk peran im kaenōm̧m̧an.

Irooj eaar letok n̄an kōj aolep unin kōjatdikdik ilo ad kakkōt n̄an jipan̄ ro jej iakwe er bōk jolet eo aer indeeo. Ekar kōm̧m̧an kallim̧ur n̄an kōj ilo ad kajjeon̄ n̄an boktok armej n̄an E, jekdoon ke rej ko rej karwainene eo an n̄an kōm̧m̧ane. Ilo aer ko rej kabūrom̧ōj E, Ak E ejjab bōjrak, innām bar āinwōt kōj. Ekar kōm̧m̧ane waanjon̄ak eo em̧m̧antata n̄an kōj kōn iakwe eo An emakijkij: “Im bar juon alen, ewi lōn̄ in Aō kar kakwelo̧ktok kom̧ āinwōt juon lo̧lo̧ ej kakwelo̧ktok jojo ko nejin ium̧win pā ko pein, aaet, O kom̧ armej in imōn Israel, ro raar bun̄, aaet, O kom̧ armej in im̧ōn Israel, kom̧ ro rej pād iJerusalem, āinwōt kom̧ ro raar bun̄; aaet, ewi lōn̄ in Aō kar kakwelo̧ktok kom̧ āinwōt lo̧ļo̧ eo ej kakwelo̧ktok jojo ko nejin, im kom̧ kar jab kōņaan.”³

Jemaron̄ pedped ioon ikdelel eo eban likjab an Rilo̧mo̧o̧r eo n̄an boktok aolepen ajri in jetōb ro nejin Jemedwōj Ilan̄ n̄an ro̧o̧l n̄an m̧weo im̧weer Ippān. Aolep jinen im jemen, jibūn im jim̧m̧an, im jibūn im jim̧m̧an-jim̧m̧an retiljek rej kwaļo̧k ilo ikdeelel jab in. Jemedwōj Ilan̄ im Rilo̧mo̧o̧r rej waanjon̄ak ko reweppān kōn ta eo jemaron̄ im aikuj kōm̧m̧ane. Rejjan̄in kipel ilo jim̧we kōnke jim̧we ej aikuj kālet. Rej kōm̧m̧an jim̧we ralikkar n̄an kōj, im Rej kōm̧m̧an bwe jān lo bwe leen ko rekaijoļjoļ.

Aolep armej ro rej lotak tok n̄an mour in rej bōk Meram eo an Kraist, eo ej jipan̄ kōj lo im en̄jake ta eo ejim̧we im ta eo ebōd. Anij ej letok rikajeran ilo mour in ro remaron̄, kōn Jetōb Kwōjarjar eo, n̄an jipan̄ kōj kile eo ekōņaan bwe jen kōm̧m̧ane im ta eo ej kamoiki. Irooj ej kōm̧m̧ane bwe en em̧m̧an paltokin n̄an kelet jim̧we eo ilo an kōm̧m̧an bwe jen en̄jake im̧we ko ad kālet ko ad. Eļan̄n̄e jej kālet jim̧we eo, jenaaj lo m̧ōņōņō—iien otemjej. Eļan̄n̄e jenaaj kālet men nana, enaaj itok būrom̧ōj im ememļo̧kjeņ kake—aolep iien. En̄jake kein rej lukkuun m̧ool. Bōtaab jet ien rej rum̧wij aer itok kōn jet un ko. Eļan̄n̄e enaaj kar m̧ōkaj an itok kōjeram̧m̧an ko, kālet jim̧we eban kar kalōk tōmak. Im kōnke jet ien būrom̧ōj kake jet ien ej rum̧wij an itok, ej bōk tōmak n̄an en̄jake aikuij n̄an pikot jeorļo̧k in jerawiwi m̧o̧kajļok ijjelokin ālkin ad bōk en̄jake ko rōkabūrom̧ōjm̧ōj im kōmetak.

Jemed Liai ekar būrom̧ōj kōn kālet ko kar kōm̧m̧ane jen jet iaan ļōm̧aro nejin im baam̧le ko aer. Ekar juōn em̧m̧aan eo em̧m̧an—juon rikanaan an Anij. Aolep iien ej kam̧ool kōn ad Rilomoor, Jisōs Kraist, n̄an er. Ekar juōn waanjon̄ak in pokake im jerbal ke Irooj ekar kūri bwe en ilo̧k jen aolep m̧weie ko an laļ n̄an lo̧mo̧o̧ren baam̧le eo an jen jorrāān. Ilo jem̧ļokin mour eo an, Ekar kwaļok naan in kam̧ool n̄an ajri ro nejin. Āinwōt Rilo̧mo̧o̧r eo—im jekdoon kajoor in jokālet eo ak būruweer im n̄an lo ilju im jekļaj jimor būrom̧ōj im men ko rem̧m̧an—Liai eaar wōnm̧aanļo̧k wōt im jipan̄ boktok baam̧le eo an.

Rainin milien jen bwijjin Jemed Liai rej kwaļo̧k unin kōjatdikdik eo an n̄an er.

Ta eo kwe im n̄a maron̄ ekkatak jen waanjon̄ak eo an Liai? Komaron̄ kōm̧m̧ane ilo buul jar im ekkatak jān jeje ko rekwojarjar im ilo am̧ lale.

Ij kajjitōk bwe kwōn bōk jimor ļōmņak eo ekadu kitien im eo eaitok kitien ilo am kajjeon̄ leļo̧k jolet in kōjatdikdik eo n̄an baam̧le eo am. Ilo iien eo ekadu kitien, enaaj wōr jorrāān ko im Satan enaaj lam̧ōj. Im elōn̄ men ko n̄an kijenmej im kōttari, ilo tōmak, jeļā ke Irooj ej jerbal ilo iien eo an make im ilo jōkjōk eo an emake.

Ewōr men ko komaron̄ kōm̧m̧ani m̧okta, n̄e ro kwōj iakwe er rej iddik. Kememej bwe jar an baam̧le kajjojo raan, katak kōn jeje ko rekwōjarjar an baam̧le, im kwaļo̧k naan in kam̧ool ko ad ilo iien jar ļapļap eo rejjab pen im eļap aer jipan̄ n̄e ajri ro rej dik wōt. Ajri ro reddik ekkā aer en̄jake jetōb eo jen jon̄an ad kōtmene.

Eļan̄n̄e rej rūttoļo̧k, renaaj keememej al in jar ko raar al ippam̧. Em̧ool eļapļok jen keememej al, renaaj keememej naan ko ilo jeje ko rekwōjarjar im naan in kam̧ool. Jetōb kwōjarjar eo emaron̄ boktok aolep men n̄an kōļmenļo̧kijeņ eo aer, ak naan ko ilo jeje ko rekwōjarjar im al ko naaj to aer pād. Iien kakeememej kein naaj kūnōōrtok er bwe ren maron̄ kōro̧o̧ltok er eļan̄n̄e rej jōbwābwe ium̧win jet iien, emaron̄ iiō, jen iaļ eo n̄an m̧weo im ej mour indeeo.

Jenaaj aikuji ļōmņak eo aetok kitien n̄e ro jej iakwe er rej kūnōōrtok jen laļ in im kōdo in pere rej kajeon̄ in kam̧ōjņoik tōmak eo aer. Elōn̄ ad tōmak, kōjatdikdik, im iakwe n̄an tōl kōj im kōkajoorļo̧k er.

Em̧ōj aō loe bwe āinwōt rikōkapilōklōk n̄an ruo rikanaan ro an Anij remour. Rej jet armej ro kōn jet m̧wil ko rejenolo̧k. Bōtaab ewōr ippāer jim̧or lem̧ōņōņō eo iien otemjej. Eļan̄n̄e jabdewōt rej kwaļo̧k jorrāān ko kōn Kabun̄ in, uwaak eo aer iien otemjej ej “O, aolep men renaaj em̧m̧an.” Eļap aer jeļā kōn jorrāān eo eļapļo̧k jen armej ej kwaļo̧k.

Rej barāinwōt jeļā kōn wāween eo an Irooj, im aolep iien rej kōjatdikdik kōn aelōn̄ in kiin̄ eo An. Rejeļā bwe E ej jeban eo. E ekajoor-bōtata im E ekea. Eļan̄n̄e kwōnaaj kōm̧m̧an bwe En ritōl n̄an baam̧le eo am, aolep men renaaj em̧m̧an.

Jet iaan ro jibun Heinrich Eyring em̧ōj aer jebwābwe. Ak elōn̄ iaan ro jibūn-jibūn-jibūn rej ilo̧k n̄an tampeļ eo an Anij ilo 6:00 awa jibbon̄ n̄an kōm̧m̧ani kain̄i ko n̄an ro jim̧aer rejjan̄in kar iooner. Rej kōm̧m̧ane jen menin jolet eo an kōjatdikdik ekar likūt itulik. Ekar likūt itulik juōn jolet eo im elōn̄ iaan ro bwijjin rej amen e.

Ālkin aolep men jemaron̄ kōm̧m̧ane ilo tōmak, Irooj enaaj bōbrae kōjatdikdik ko n̄an kōjeram̧m̧an ko reļļapļo̧k n̄an baam̧ļe ko ad jān ad maron̄ pijaikļo̧k. Ekōņaan men ko rem̧m̧an tata n̄an er im n̄an kōj, āinwōt ro Nejin.

Jej aolep ajri ro nejin Anij eo emour. Jisōs RiNazareth eo ej Nejin Jitōnbōro im ej ad Rilo̧mo̧o̧r eo em̧ōj an jerkakpeje. En̄in ej Kabun̄ eo An Ilo ie ej pād kii ko an priesthood eo, innām baam̧le ko maron̄ pād ippān doon n̄an indeeo. En̄in ej menin jolet eo ad ejjeļo̧k wōnāān an kōjatdikdik. Ij kam̧ool bwe menin em̧ool ilo etan Irooj Jisōs Kraist, amen.