Paghimo sa Komperensya nga Kabahin sa Atong Kinabuhi

Si Presidente Dieter F. Uchtdorf, Ikaduhang Magtatambag sa Unang Kapangulohan, mitudlo nga kita makapili sa pagpasalamat sa bisan unsang malisud nga mga butang nga mahitabo sa atong mga kinabuhi (pahina 70). Ang pagkamapasalamaton makatabang nato nga mas magmalipayon ug mas mabination ug adunay hugot nga pagtuo ug pagsalig sa Dios. Unsa ang inyong bation kon kamo mapasalamaton? Unsay inyong mabuhat sa pagbati sa pasalamat matag adlaw?

Si Bonnie L. Oscarson, kinatibuk-ang presidente sa Young Women, misulti mahitungod ni Sarah, usa ka batan-ong babaye kinsa mikuyog sa iyang mama sa pagtabang ni Brenda, usa ka babaye nga dunay multiple sclerosis. Si Sarah misudlay sa buhok ni Brenda, mibutang og lotion sa iyang mga kamot, mimasahe sa iyang mga tudlo ug mga bukton, ug mitabang kaniya nga makapaugnat (pahina 119). Paghunahuna og mga paagi nga kamo makaserbisyo. Bisan kon kamo batan-on, daghang mga butang ang inyong mahimo.

Si Elder L. Tom Perry sa Korum sa Napulog Duha ka mga Apostoles mitudlo mahitungod kon sa unsang paagi ang nagmaneho mogamit og kasangkapan sa pangabayo ug bokado aron sa paggiya og pundok sa mga kabayo (pahina 100). Ang nagmaneho nasayud sa labing maayo, ug ang kabayo nagsunod sa giya sa nagmaneho, sama nga ang Ginoo nasayud unsa ang labing maayo alang kanato, ug kita magmalipayon kon kita mosunod Kaniya. Ang kasangkapan sa pangabayo ug bokado sama sa aghat sa Espiritu Santo. Kanus-a kamo mibati nga ang Espiritu Santo naggiya kaninyo? Unsay inyong gibati?

Si Jean A. Stevens, unang magtatambag sa kinatibuk-ang kapangulohan sa Primary, misulti og usa ka istorya mahitungod sa usa ka batang lalaki kinsa nabiyaan sa katapusang bus nianang adlawa ug naglakaw pauli (pahina 81). Sa layo pa kaayo siya sa ila, siya nahadlok ug miluhod aron mag-ampo. Minutos ang milabay, si Sister Stevens naaghat pinaagi sa Espiritu sa paghunong ug sa pagtabang kaniya.Makahunahuna ba kamo sa mga panahon dihang ang Langitnong Amahan mitubag sa inyong mga pag-ampo? Sa unsang paagi kamo mitabang sa pagtubag sa pag-ampo sa laing tawo?

Si Presidente Thomas S. Monson nagtudlo nga kita kinahanglan “sa kaisug sa pagsulti og dili kon gikinahanglan, sa kaisug sa pagsulti og oo kon kini angay, sa kaisug sa pagbuhat sa sakto nga butang tungod kay kini husto.” Samtang kamo magtuon niini nga pakigpulong (pahina 66), paghunahuna sa mga hagit nga inyong giatubang. Unsa nga mga plano ang inyong mahimo sa pagpalambo niining matanga sa kaisug?

Si Elder Jeffrey R. Holland sa Korum sa Napulog Duha ka mga Apostoles mipahinumdom nato nga kon kita nahigugma sa Manluluwas, atong tumanon ang Iyang mga sugo ug higugmaon ang uban sama sa Iyang paghigugma (pahina 6). Bisan kon buhaton nato kini, kita kinahanglang andam nga manalipod sa atong mga gituohan “uban sa maayong kabubut-on ug uban sa kalooy.” Aduna ba kamoy kaila kinsa supak sa bisan unsa sa inyong pagtuo? Sa unsang paagi kamo magmatinahuron samtang kamo maghisgot ug manalipod niadtomg mga pagtuo?

Daghang mga mamumulong direktang namulong ngadto sa mga kabatan-onan. Sama pananglit, si Elder Neil L. Andersen sa Korum sa Napulog Duha ka mga Apostoles mihatag og daghang mga sugyot ngadto sa kabatan-onan kon unsaon sa pagbuntog sa “espirituhanong alimpulos”, sama sa pagpangita og kalinaw diha sa templo (pahina 18). Samtang kamo magbasa sa iyang ug uban pang mga pakigpulong sa kinatibuk-ang komperensya, ikonsiderar ang pagsulat sa mga ideya kon unsaon nga magpabiling lig-on.

Usa sa pinakadautan karon mao ang pornograpiya. Si Linda S. Reeves, ikaduhang magtatambag sa kinatibuk-ang kapangulohan sa Relief Society, miingon nga ang labing maayong panagang batok sa mga dautan mao ang usa ka lawom ug makanunayong pagpamatuod sa ebanghelyo ni Jesukristo (pahina 15). Unsa ka lig-on ang inyong personal nga panagang? Unsay inyong mabuhat sa paglig-on niini?

Si Presidente Thomas S. Monson nagtudlo nga samtang kita makasabut sa “dili matupngan nga gasa” sa Pag-ula, kita mapuno og gugma sa Langitnong Amahan, sa Manluluwas, ug sa tanang mga anak sa Dios (pahina 91). Sa unsang paagi kini nga kahibalo makapalambo sa inyong pagtuon sa kinabuhi ug Pag-ula sa Manluluwas atol sa personal ug pamilya nga pagtuon sa kasulatan ug samtang diha sa klase sa simbahan?

Si Presidente Henry B. Eyring, Unang Magtatambag sa Unang Kapangulohan, miingon nga utang niya ang iyang kalipay sa usa ka apohan sa tuhod kinsa mipasakop sa Simbahan, matinud-anong miserbisyo, ug nagpabilin nga makanunayon hangtud sa katapusan, mibilin sa iyang pamilya og usa ka panulundon sa paglaum (pahina 22). Hunahunaa ang paghimo og lista sa tanan sa inyong pamilya ug pagsulat kon unsa nga mga pakigsaad ug mga ordinansa nga ilang gikinahanglan aron magpadayon diha sa dalan sa pakigsaad. Paghimo og plano aron sa pagtabang sa mga sakop sa inyong pamilya nga makadawat sa ilang sunod nga mga pakigsaad. Inyong masusi ang mga paagi nga ang inyong mga pakigsaad dunay mas importante nga bahin sa inyong kinabuhi aron kamo makahatag sa inyong pamilya og panulundon sa paglaum.

Si Elder David A. Bednar sa Korum sa Napulog Duha ka mga Apostoles namahayag nga ang kalisdanan makadala nato sa pagsalig sa “maayong buhat, kalooy ug grasya sa Balaang Mesiyas,” kinsa “motabang kanato sa pagpas-an sa atong mga luwan uban sa kasayon” (pahina 87). Samtang kamo mobasa sa iyang pakigpulong ug sa mga pakigpulong nga nagsugod sa pahina 9, 18, 70, 81, ug 106, pangitaa ang mga paagi nga ang Manluluwas ug ang Iyang ebanghelyo makatabang kaninyo sa pag-atubang sa mga hagit sa kinabuhi.

Ang kurikulum sa kabatan-onan niadtong Mayo nag-focus sa mga propeta ug mga pagpadayag. Isip kabahin sa inyong panaghisgutan sa ebanghelyo uban sa kabatan-onan diha sa panimalay ug sa simbahan, hunahunaa ang pagtuon sa mga pakigpulong ni Elder Lawrence E. Corbridge (pahina 103) ug Marcos A. Aidukaitis (pahina 108) sa Seventy, nga mangita sa mga tubag sa mosunod nga mga pangutana: Nganong dili man lang pasagdan sa mga tiglibak si Joseph Smith? Sa unsang paagi kita makaila sa kamatuoran sa kalibutan nga nagsige og ataki sa mga pagtulun-an sa ebanghelyo?