Te faaohipa nei te Ekalesia i te mau haapiiraa totauru no te patu-faahou-raa i te fenua Philippino.

Tau ava‘e i muri a‘e i to te mata‘i rorofai Haivan ta‘iriraa i te fenua Philippino i te ava‘e Novema 2013, tei nina fatata 1.2 milioni fare e tei haapohe hau atu i te 6 200 taata, ua tamau noa te Ekalesia i te horoa i te tautururaa, ma te taui i te mau tautooraa no te pahono i te mau ati i te taurururaa no te tau maoro atu. Te hoê tautooraa manuia maitai o te faaohiparaa ïa i te mau taata aufau-ore-hia tei haapii i te patu i te mau fare no te mau taata e faaea noa ra â ma te fare ore.

E rave rahi te mau melo i muri nei i roto i te mau vahi nohoraa tei ta‘irihia e te vero tei faaite i to ratou mauruuru no te tautururaa a te Ekalesia tei fariihia e ratou, noa’tu e e ere ratou i te feia mo‘a i te mau mahana hopea nei.

• Ua ite te hoê vahine tei horo atu i roto i te hoê fare pureraa momoni i te mata‘i rorofai e ua parari to’na fare i te maruaraa te mau tumu haari i ni‘a i te fare. Aita ta’na e to’na utuafare e rave‘a no te tata‘i i te reira, ua tauturu râ te mau taata aufau-ore-hia i te patu i te hoê fare apî, e te tauturu nei oia i te tahi atu utuafare ia patu i te hoê fare. Ua parau oia, e « Ua haapii au i te rave amui i te ohipa e te mau taata i roto i te ati i ŏ nei, ia nehenehe ia matou ia ora faahou mai i [te mata‘i rorofai] »

• Te haapii nei te hoê taata tei ere i ta’na ohipa a ninahia’i ta’na vahi raveraa ohipa i te hamani i te mau fare no to’na utuafare e no vetahi ê. Ua parau oia e, « Ua ite matou e ti‘a ia matou ia tauturu te tahi i te tahi ia nehenehe te ohipa e faaoti-vitiviti-hia » ma te faaite atoa mai i to’na mauruuru i te mau tautooraa tauturu a te Ekalesia.

Ua parau te Episekopo Faatere Rahi, Gary E. Stevenson e, taa ê noa’tu i te atuaturaa i te feia vĕvĕ e tei roohia i te fifi », te ite atoa nei tatou i te ture no te faarava‘iraa ia’na iho i te faaohiparaahia i teie iho taime, e e mea maere mau te reira ». Ua parau oia e, « Te hoê o te mau mea ta matou e tamata nei i te rave o te horo‘araa ïa i te mau materia e na te feia e farii e horo‘a mai i te rima ohipa. Te hamani atoa nei te mau taata atoa o te farii i te hoê fare i to ratou iho fare ».

Te farerei nei te feia faatere no te Ekalesia e te mau ti‘a no te ohipa totauturu i te feia faatere no te mau oire no te horo‘a i te haapiipiiraa e te parau tu‘ite i te mau taata tei haapii mai i te ohipa tamuta. Ua faaohipahia te moni a te Afata Tamau no te Haapiiraa no te afa‘i mai e 20 tamuta aravihi no te tauturu i te haapiipiiraa e ua oti a‘ena e 2 000 i ni‘a i te 3 000 fare tei opuahia i te hamanihia.

Ua faaiteite mai te feia tei haapiipiihia i to ratou aravihi na roto i te hamaniraa 10 fare no te farii i muri iho te parau tu‘ite a te hau fenua e te hoê afata mauihaa a te Ekalesia, e na te reira ïa e faati‘a ia ratou ia noaa te ohipa. No te rahi o te feia hamani fare tei hinaaro-u‘ana-hia i farii ai te mau Pû Totauru Katolika ia tihepu e rave rahi hanere tamuta tei haapiipiihia e te Ekalesia Momoni.

Ua parau te Episekopo Stevenson e ua tae atu e 500 melo no te Ekalesia i te hoê rururaa i reira te feia faatere no te ekalesia i te faaiteraa i te huru o te haapiipiiraa no te ohipa e te parau tu‘ite, « e a faaitehia’i te reira ia ratou, ua poupou e ua ta‘i ratou, no to ratou ite e e nehenehe ia ratou ia ite i te hoê e‘a… no te faaamu i to ratou mau utuafare ».

Ua rave atoa te Ekalesia i te ohipa i piha‘iho i te tahi atu mau faanahoraa totauturu e rave rahi e te faatereraa hau no te fenua Philippino i te tautoo tamauraa no te opere i te maa, te pape, te mau raau rapaau, te mau pute no te ea, te mau matini horo‘a uira, te mau tauhaa no te fare, te mau tauihaa no te tunuraa maa, te mau tauihaa no te ravaai, e te mau huero maa no te tanu.

Ua haapii mai te Ekalesia e te rave‘a hau atu i te maitai no te pahono i te mau ati o te faaohiparaa ïa i te mau taata e noho ra i te vahi tei roohia i te ati, e te hooraa i te mau tauihaa i roto i te fenua ati, i piha‘iho roa i te vahi ati. Eita teie raveraa e haapapû noa e e mea tano te mau tauihaa no taua fenua ra, e tauturu atoa râ te reira i te tata‘i i te mau tereraa faufaa o taua fenua ra.

Ua faaitoitohia te mau melo na te ao taatoa nei ia pure no te mau taata i roto i te mau vahi ati atea i to ratou iho mau vahi faaearaa, e ia feruri i te faarahi i ta ratou mau ô no te haapaeraa maa aore râ i te horo‘araa i te moni i te afata totauturu a te Ekalesia.