Devin G. Durrant
Ikaduhang Magtatambag sa Kinatibuk-ang Kapangulohan sa Sunday School
Si Devin G. Durrant gitawag isip ikaduhang magtatambag sa kinatibuk-ang kapangulohan sa Sunday School, posible nga daghang miyembro sa Simbahan mahinumdom sa malampuson niyang mga adlaw sa Brigham Young University basketball jersey.
Ang sports, siyempre, adunay importante nga bahin sa kinabuhi ni Presidente Durrant. Siya gani migahin og panahon sa NBA batok sa pinakamaayo nga magdudula sa Estados Unidos. Apan siya nahimong mas labaw pa kaysa usa ka sikat nga atleta: misyonaryo siya sa Madrid, Spain, usa ka bana, amahan, apohan, usa ka tigsulat, negosyante, matinud-anon nga miyembro, ug presidente sa Texas Dallas Mission sa milabayng duha ug tunga ka tuig.
Si Presidente Durrant, natawo niadtong Oktubre 20, 1960, sa Siyudad sa Brigham, Utah, miingon nga ang iyang panimalay sa bata pa siya nakahimo og mahinungdanong tahas sa pag-andam kaniya alang sa matag tahas sa kinabuhi. Ang iyang mga ginikanan, si George ug Marilyn Durrant, batid nga mga magtutudlo.
“Sigurado, nanudlo sila pinaagi sa ilang mga pulong—mao gayud, ang talagsaong pagtulun-an nga akong nasinati sa panimalay mao ang pagkakita kon giunsa nila sa pagpakabuhi.”
Si Presidente Durrant ug ang iyang asawa, si Julie Mink Durrant, nasayud kaayo sa kaimportante sa lig-ong mga magtutudlo alang sa pag-andam og mga misyonaryo sa umaabut.
“[Ang mga misyonaryo sa umaabut] natudloan og maayo sa ilang mga ginikanan diha sa panimalay ug sa ilang mga magtutudlo sa simbahan ug sa maayo kaayong mga programa sa seminary ug institute.”
Ang programa sa Sunday School, dugang pa niya, nagtugot sa mga magtutudlo ug sa mga estudyante sa tanang pangidaron “sa pagtudlo sa pamaagi sa Manluluwas.”
Si Presidente ug Sister Durrant naminyo sa Salt Lake Temple niadtong Abril 23, 1983, ug ginikanan sila sa unom ka anak ug adunay unom ka mga apo.
Sa wala pa ang iyang tawag sa pagka-presidente sa misyon, miserbisyo siya isip usa ka bishop, magtatambag sa kapangulohan sa stake, sakop sa kapangulohan sa Sunday School sa stake, ug magtutudlo sa institute.
Iyang naangkon ang undergraduate degree sa American Studies sa Brigham Young University ug usa siya ka MBA gikan sa University of Utah. Siya ang tag-iya sa usa ka kompanya sa real estate investment.