Elder Chi Hong (Sam) Wong

Isip usa ka bag-ong kinabig ug estudyante sa Brigham Young University-Hawaii, si Elder Chi Hong (Sam) Wong nakaangkon og labaw pa kay sa edukasyon—siya nakaangkon og usa ka sigurado nga kahibalo nga adunay usa ka Dios kinsa nasayud “sa mga detalye sa atong mga kinabuhi.”

Natawo niadtong Mayo 25, 1962, sa Hong Kong, China, ngadto ni Ngan Kan ug Fat Wong, si Elder Wong usa sa pito ka mga anak nga nagtubo sa usa ka gamay nga apartment.

Sa trabaho nahimamat niya si Carol Lu, kinsa mipaila-ila kaniya sa ebanghelyo. Ang batan-ong investigator nabunyagan niadtong Pebrero 14, 1982.

Usa ka tuig ang milabay, niadtong Hulyo 9, 1983, iyang giminyoan si Carol. Mibalhin sila ngadto sa Laie, Hawaii, USA, aron siya makaeskwela. Tungod kay duna lang siyay student visa, si Elder Wong makatrabaho lang og 20 ka oras sa usa ka semana. “Kinahanglan gayud namo nga mogamit sa among hugot nga pagtuo ug mga pag-ampo,” miingon siya kabahin sa panginahanglan aron sa pagpatunhay sa iyang pamilya.

Siya naningkamot og maayo aron makaangkon og scholarship, dayon mikuha siya og daghang unit kutob sa tugotan sa unibersidad. “Dili kadto sayon,” siya mihinumdom. “Sa higayon nga kita aduna niana nga kasinatian nasayud kita nga kanunay kita makasalig sa gahum sa langit.”

Ang mga Wong nabugkos didto sa Laie Hawaii Temple niadtong Agosto 9, 1984, ug ang ilang kinamagulangang anak natawo; tulo pa ka mga bata ang nadugang sa pamilya. “Kadtong mga katuigan espesyal kaayo, sagrado kaayo,” miingon si Elder Wong.

Si Elder Wong nakaangkon og bachelor of science degree sa accounting ug usa ka associate of science degree sa computer science; dayon siya mibati sa panginahanglan “nga mobalik sa Hong Kong aron moserbisyo.”

Sa wala madugay siya nakadawat og MBA gikan sa Hong Kong Open University. Si Elder Wong mao ang founder ug partner sa usa ka business ug quality consulting nga kompaniya ug mitrabaho usab sa usa ka grupo sa pagtesting ug pagsusi sa mga materyal diin siya nagsugod isip senior nga accountant ug mibiya sa kompaniya isip deputy managing director.

Sa wala pa siya mapaluyohi niadtong Abril 5, 2014, isip sakop sa Unang Korum sa Seventy, nagserbisyo siya isip usa ka bishop, presidente sa stake, ug Area Seventy.