Elder Lynn G. Robbins
Kapangulohan sa Seventy
Sukad nga gitawag isip General Authority niadtong Abril 1997, si Elder Lynn G. Robbins nakatagamtam sa “tam-is nga panalangin nga mahimamat ang mga Santos sa tibuok kalibutan.”
“Mobati kamo diha-diha dayon og kasuod uban sa mga tawo bisan asa mo moadto,” siya miingon.
Si Elder Robbins naglaum nga mopadayon sa pakighimamat sa mga Santos sa Ulahing mga Adlaw sa tibuok kalibutan samtang nagserbisyo isip usa ka sakop sa Kapangulohan sa Seventy.
Si Lynn Grant Robbins natawo niadtong Oktubre 27, 1952, sa Payson, Utah, ngadto kang Joshua Grant ug ni Evelyn R. Robbins. Siya migahin sa sayong bahin sa iyang kinabuhi sa Springville, Utah, diin iyang nahimamat si Jan Nielson, nga iyang nakaila sukad pagkabata. Sila naminyo niadtong Hunyo 27, 1974, sa Manti Utah Temple ug mga ginikanan sa pito ka mga anak; sila adunay 15 ka mga apo.
Si Elder Robbins nakadawat og bachelor’s degree sa Spanish ug political science didto sa Utah State University ug MBA sa international management gikan sa American Graduate School of International Management sa Glendale, Arizona, USA. Siya mao ang cofounder ug senior vice president sa Franklin Quest.
Si Elder Robbins nagserbisyo isip presidente sa Uruguay Montevideo Mission sa dihang nadawat niya ang iyang call ngadto sa Ikaduhang Korum sa Seventy. Paglabay sa tulo ka tuig siya nahimong sakop sa Unang Korum sa Seventy. Nakaserbisyo siya isip presidente sa South America South Area, sa Central America Area, ug sa North America West Area. Nakaserbisyo usab siya sa North America Central Area.
Usa ka dako nga panalangin niini nga pagserbisyo mao ang kahigayunan sa pagbalik ngadto sa Argentina, diin siya miserbisyo isip full-time nga misyonaryo. Samtang didto sa Argentina isip usa ka batan-ong elder, miserbisyo siya sa Jujuy, usa ka dapit nga dunay usa ka branch. Sa dihang siya mibalik ngadto sa area paglabay sa mga katuigan, siya nakakita og usa ka stake sa Simbahan nga may usa ka dosena nga mga unit.
“Makita ninyo kana sa tibuok kalibutan,” siya miingon. “Kini ang panahon sa mga milagro.”