Te parau apî no ni‘a i te mau hiero, te feia faatere api tei paturuhia i te amuiraa rahi ra

A iriti ai oia i te 184raa o te Amuiraa Rahi Matahiti a te Ekalesia, ua parau te peresideni Thomas S. Monson e i roto i na ava‘e e ono i ma‘iri a‘enei, « ua tere te ohipa a te Ekalesia i mua ma te haafifi-ore-hia ».

Ma te faahaamana‘o i te haamo‘araa o te Hiero no Gilbert Arizona i te 2 no mati 2014, e te haamo‘araa o te Hiero no Fort Lauderdale Florida i te mau mahana i mua nei, e te hoperaa e te haamo‘araa i te mau hiero i te mau tufaa e rave rahi i te ao nei i te mau matahiti 2014 e 2015, ua faaite te peresideni Monson e ia hope ana‘e te mau hiero atoa tei faaitehia na mua’tu i te patuhia, e 170 ïa hiero a te Ekalesia e faaohipahia na te ao atoa nei.

Ua parau oia, e « Noa’tu e te faatumu nei matou i teie taime i ta matou mau tutavaraa ia faahope i te mau hiero tei faaara-a‘ena-hia e aita hoi e faaiteraa i te parau no te mau hiero apî i teie mau mahana i mua nei, e tamau noa â ïa matou i te tuatapapa i te mau hinaaro e i te imiraa i te mau vahi no te mau hiero apî. E faarahia ïa te reira i te mau amuiraa rahi i mua nei. E nunaa patu hiero e haere hiero tatou ».

I roto i te amuiraa, ua paturuhia hoê melo apî no te peresideniraa no te Hitu Ahuru, e maha na Hui Mana Faatere, e hoê peresideniraa rahi apî no te Haapiira Sabati, e e 42 Hitu Ahuru Area.

Ua piihia o Elder Lynn G. Robbins i te peresideniraa no te Hitu Ahuru.

Ua paturuhia o Elder Jörg Klebingat no Kyiv, Ukraine, e Elder Chi Hong (Sam) Wong no Hong Kong, Taina, no te tavini i roto i te Pŭpŭ Matamua no te Hitu Ahuru. Ua paturuhia o Elder Larry S. Kacher no Midway, Utah, e Elder Hugo E. Martinez no Arecibo, Puerto Rico, ei mau melo no te Pŭpŭ Piti o te Hitu Ahuru.

Ua paturuhia o Elder Tad R. Callister, tei tavini na i roto i te peresideniraa o te Hitu Ahuru e ei melo no te Pŭpŭ Piti o te Hitu Ahuru, ei peresideni rahi no te Haapiiraa Sabati, e John S. Tanner ei tauturu matamua e Devin G. Durrant ei tauturu piti.

A hi‘o i te tabula no te mau patururaa e te mau haamauruururaa i te mau api 26–27, e a hi‘o i te parau no ni‘a i te oraraa o Elder Robbins, te mau Hitu Ahuru tei piihia iho nei, e te peresideniraa rahi no te Haapiiraa Sabati e haamata i te api 141.

Hoê hebedoma na mua‘e i te amuiraa rahi, ua tupu te amuiraa rahi a te mau vahine—na te mau vahine, te mau tamahine apî e te mau tamahine atoa mai te va’u o te matahiti e hau atu—i te Pû Amuiraa. Ua mono teie rururaa i te mau putuputuraa rahi tahito a te Sotaiete Tauturu e te Feia Apî Tamahine. I itehia te taato‘araa o te mau a‘oraa o teie amuiraa a te mau vahine i te mau api 116–28.

Hou atoa na mua‘e i te amuiraa, ua faaapîhia te tomite faatere no te Feia Apî Tamahine, ua piihia te mau tuahine no te taime matamua no roto mai i te mau vahi i rapae atu ia Roto Miti mai Peru ; Afirika Apato‘a ; Tapone ; Berezilia ; e Brooklyn, New York, HAM. A tai‘o i te mau oraraa e a hi‘o i te mau hoho‘a i lds.org/callings/young-women.

« Ua hopoi mai te Faaora i te fenua nei i te parau poro‘i no te here e te mana‘o maitai i te mau tane e te mau vahine atoa », o te parau ïa a te peresideni Monson i te hope‘araa o te amuiraa rahi. E ti‘a ia tatou ia pee tamau noa i To’na hi‘oraa ». Ua haapapû oia i te mau melo no te Ekalesia e ia vetahi ê o te faaroo ra, e « te mana‘ona‘o rahi nei to tatou Metua i te Ao ra ia tatou. E arata‘i e e haamaitai Oia ia tatou mai te mea e tuu tatou i to tatou faaroo e te ti‘aturiraa i ni‘a Ia’na ».